Jekh sati palo odova ked i beba bijandžola tano najpharo olače. Tegani tano but važno i daj te ovel pe beba paše sose odova but ka pomožini e bebače te barjol sar so valjani. *

So čhivela e daja mangipa te akhari gajlja kotar piklji beba? I profesorka Dženet Krenšo ko jekh časopis vačeri so palo odova ked i daj bijani o hormoni oksitocin barjola hem „čhivela e daja mangipa te ljel pe beba ki janglja, te dikhel pe beba hem te dela te pijel thud“ (The Journal of Perinatal Education). Jekh aver hormoni kova ko isto vakti barjola „pomožini e dajače te haljol so valjani e bebače“ hem čerela te ovel popaše ola. Sose tano odova važno?

Odova soj tani i daj hem i beba odobor paše avela ando amaro manglo Devel, o Jehova kova čerdža sa. * O kralj David zahvaljisalo e Devljese so bijandilo hem so hine oljese šukar ki oljesi dajaki janglja. Ov ki jekh molitva vačerdža: „Tuče hijum dindo te arakhema sar bijandiljum, kotar me dajako vodži tu hijan mo Devel“ (Psalam 22:9, 10).

RAZMISLIN AKALJESTAR: Ako o Devel čerdža i daj mangipa te akhari gajlja odoljestar so valjani e bebače, kobor pana pobuter o Devel čače mangela te džanel sar tano svakonese amendar, kola hijam oljese čhave (Čeriba e apostolengo 17:29).

O Isus Hrist, kova najšukar pendžari Okolje kova sa čerdža, pheja: „Na biknenape lji duj čiriklje e parače koja na vredini but? A nijekh oljendar na perela ki phuv, a tumaro Dad te na džanel odoljese. A tumendže tane hem o bala sa ko šero džende. Odoljese, ma daran, tumen pobuter vredinena ando but čiriklje“ (Matej 10:29-31).

Hari manuša dikhena svakona tiknja čiriklja, a disave ni na dikhena ked dijekh čiriklji perela ki phuv. Ama, amaro Dad kova tano ko nebo dikhela svakona čiriklja. O čiriklja, čak but čiriklja, oljese niked na vredinena pobuter ando manuš. Akaljestar sikljova so na valjani te mislina so o Devel na dikhela upro amende, nego so ov čače mangela te džanel sar tano amendže.

 So sikljova ando Devljeso Lafi

• „E Jehovase jačha tane kotar na, dikhena hem e lošno manuše hem e šukar manuše“ (GODŽALJE LAFIJA 15:3).

• „E Jehovase jačha dikhena e pravednonen, hem oljese kana šunena oljengi vika“ (PSALAM 34:15).

• „Ka ovav but bahtalo ko toklo verno mangipe, sose tu dikhljan moklo pharipe; tu pendžareja miklji dukh ano vilo“ (PSALAM 31:7).

Da lji šaj te ovel diso averčhane ko amaro dživdipe ked bi džana so o Devel akhari gajlja ando amaro šukaripe hem dikhela mangipa upro amende? Odova šaj te ovel, sar so vačeri i Hana * andi Engleska:

„But puča mislijum so o Jehova na mangelama hem so na šunela meklje molitve. Mislijum soj tano odova sebepi so faljini maje vera. Isto adžahar, mislijum so kazninima ja so na šunelama sose na hijum oljese važno. Mislijum so o Devel na akhari gajlja mandar.“

Ama, akana i Hana džanela so o Jehova dikhela ola hem mangelala. So promisalo ko olako dživdipe? Oj vačeri: „Odova na hine kotar jekh puti. But berša angljeder šujum jekh biblijako vačeribe ando odova so o Isus dija po dživdipe amendže. Odova vačeribe hor khudža maje ko vilo hem pomožijama palje te ovav sigurno so o Jehova mangelama. Svako puti ked o Jehova šuja meklje molitve, man hine khuvela o rojbe, sose haljiljum so o Jehova mangelama palo sa odova. Isto adžahar, ked sikljiljum andi Biblija hem ked dželjum ko sastankija haljiljum pobuter ando Jehova, savo tano ov hem so mislini amendar. Akana dikhava kobor o Jehova pomožini amen hem mangela amen hem so ov akhari gajlja svakonestar amendar.“

Odova so pheja i Hana šaj te zorjačeri amen. Ama, sar šaj tu te džane so o Devel haljolatu hem so džanela sar tano tuče andre ko vilo? Akaljestar ka vačera ko aver članko.