1-2. So o roditeljija valjani te ćeren ked olenge ćhave pućena len diso ando amare verovanja?

 TE ŠAJ te barjaćeren pe o ćhave valjani baro trud. Ako isi tut ćhave, sigurno but trudineja tut te zorjaćere olengi vera ko Jehova hem odolese mangaja but te pohvalina tut (Pon. zak. 6:6, 7). Ama sar barjona, verovatno ka ovel len disave hor pućiba ando amare verovanja hem ando moralna merilija kola temeljinena pe ki Biblija.

² Ki početka, šaj ka brinine tut hem šaj ka misline so te ćhave pućena odova sose nane len dovoljno vera ko Jehova hem ki Biblija. Ama, sar barjona, on valjani te ovel len pućiba te šaj olengi vera te ovel zorali (1. Kor. 13:11). Odolese, na valjani te sikirine tut. Ked on pućena diso, koristin odija prilika te pomožine len pohor te razmislinen hem ađahar te zorjaćeren pi vera ko Devel hem ki Biblija.

3. Sostar ka vaćera ko akava članko?

³ Ko akava članko ka vaćera sar šaj o roditeljija te pomožinen pe ćhavenđe (1) te ovel len zorali vera ko Jehova hem ki Biblija, (2) te haljon sose tane e biblijake merilija aso olengo šukaripe hem (3) te vaćeren ando pe verovanja averenđe. Isto ađahar, ka vaćera hem sose tano šukar o ćhave te ovel len pućiba hem ka oven disave predlogija sar šaj te vaćere olencar ando amare verovanja.

POMOŽIN TE ĆHAVENĐE TE OVEL LEN ZORALI VERA KO JEHOVA HEM KI BIBLIJA

4. Kola pućiba šaj te ovel len tumare ćhave hem sose?

⁴ O roditeljija đanena so i vera ko Devel nane diso so nasledini pe. Ked bijandiljan, tu na hine tut odmah vera ko Jehova, ađahar ni te ćhave nane len. Odolese, sar đala  o vreme on šaj te počminen te pućen: „Sar šaj te đanav so ćaće isi Devel? Da li ćaće šaj te verujinav ko odova so pisini ki Biblija?“ Ki Biblija pisini so valjani te „koristina amari godi“ hem „sa te proverina“ (Rimlj. 12:1; 1. Sol. 5:21). Sar tegani šaj te pomožinen tumare ćhavenđe te ovel len zorali vera?

5. Sar šaj o roditeljija te pomožinen pe ćhavenđe te uverinen pe so odova so pisini ki Biblija tano tačno? (Rimljanima 12:2)

⁵ Podstaknin te ćhaven kokri te uverinen pe so odova so pisini ki Biblija tano tačno. (Čitin Rimljanima 12:2.) Ked te ćhave isi len pućibe, koristin odija prilika te mothove lenđe sar šaj kokri te arakhen o odgovor ko Indeks ando publikacije hem ko Vodič kotar publikacije ando Jehovase svedokija. Ko vodič ki tema „Biblija“ šaj te dikhen o deo „Nadahnuta od Boga“ te šaj te arakhen dokazija so i Biblija nane samo jekh šukar knjiga koja pisinđe o manuša, već soj tani oj „e Devleso Lafi“ (1. Sol. 2:13). Na primer, on šaj te istražinen andi purani asirsko diz koja vićinđa pe Niniva. Angleder, disave izučavaocija phenđe so i Niniva niked ni na postojinđa. Ama oko 1850. berš, disave manuša kola hanđe arakhlje o ruševine andi odija diz hem ađahar dokažinđa pe so odova so pisini ki Biblija tano ćaće (Sof. 2:13-15). Ki Biblija hine proreknimo so i diz Niniva ka ovel uništimi. Ako mangeja te đane sar ispuninđa pe odova proročanstvo, dikh o članko „Da li đanđan?“ ki Stražarsko kula ando novembar 2021. berš. Ohrabrin te ćhaven te uporedinen odova so amare publikacije phenena odoleja so pisini ko enciklopedije hem ko avera pouzdana knjige. Odova ka pomožini len te zorjaćeren pi vera so odova so pisini ki Biblija tano tačno.

6. Sar šaj o roditeljija te pomožinen pe ćhavenđe te arakhen dokazija so odova so pisini ki Biblija tano tačno? Vaćer jekh primer. (Dikh i slika.)

⁶ Pomožin te ćhavenđe te arakhen dokazija so odova so pisini ki Biblija tano tačno. Rode prilika te vaćere te ćhavencar andi Biblija hem andi vera ko Devel. Odova šaj te ćere ked đana ko muzej, ki botanička bašta ja ki disavi izložba andi amari podružnica. Na primer ked posetinena disavo muzej, bilo uživo ili prekalo internet, šaj te vaćeren ando disavo istorijsko događaj ja ando disavo predmet kova ka zorjaćeri olengi vera ko odova so i Biblija tani tačno. Da li te ćhave đanena so e Devleso anav pisini ko jekh bar kova  tano 3 000 berš purano? Odova bar tano penđardo sar Moavsko bar. O originalno bar tano ko muzej Luvr, ko Pariz, ki Francuska. Isto ađahar, i kopija ando odova bar tano deo andi izložba „I Biblija hem e Devleso anav“ ko amaro glavno sedište ko Vorvik. O Moavsko bar mothovi so o kralj Misa ando Moav pobuninđa pe protiv o Izraelcija. Odolestar pisini hem ki Biblija (2. Kralj. 3:4, 5). Ked te ćhave pe jaćhencar ka dikhen o dokazija so odova so pisini ki Biblija tano tačno, olengi vera ka ovel pozorali. (Uporedin e stihoja andi 2. Letopisa 9:6.)

7-8. (a) So šaj te sikljova ando šuže oblikija kola dikhaja ki priroda? Vaćer jekh primer. (Dikh i slika.) (b) Kola pućiba šaj te pomožinen tumare ćhavenđe te zorjaćeren pi vera ko Devel?

⁷ Podstaknin te ćhaven te razmislinen andi priroda. Đi phirena ki priroda ja ćerena buti ki bašta, pomožin te ćhavenđe te dikhen disave šuže buća kola okružinena len. Sose? Odolese so on dokažinena so isi jekh inteligentno Stvoritelj. Na primer, o naučnikija but berša proučinđe o spriralna oblikija. O biofizičar o Nikola Fameli phenela so ako brojineja o spiralna oblikija kaj god isi ki priroda, uvek ka dikhe jekh određeno niz ando broja. Odola broja vićinena pe Fibonačijev niz. O spiralna oblikija šaj te dikha ko but buća ki priroda. Na primer, asavke oblikija isi len disave galaksije, i ljuštura ando puž nautilus, o listija ando disave biljke hem o raspored ando semenke kotar suncokret. a

⁸ Te ćhave ki škola ka sikljon ando pana disave buća kola isi ki priroda. Na primer, svako pahuljica isi la jekh geometrijsko oblik kova vićini pe fraktal. O fraktalna oblikija šaj te dikhen pe hem ko avera buća ki priroda. Ama, ko ćerđa odola but šuže oblikija? So pobuter te ćhave ka razmislinen ando akava, verovatno pana pobuter ka verujinen so sa odova ćerđa o Devel (Jevr. 3:4). Sar barjona šaj te puće len: „Ako o Devel sa akava ćerđa, so mislinena da li tano logično ov najšukar te đanel so valjani te ćera te šaj te ova bahtale?“ Tegani šaj te phene lenđe so o Devel dinđa amen i Biblija te sikavi amen sar šaj te ova bahtale.

POMOŽIN TE ĆHAVENĐE TE HALJON KOBOR TANE VAŽNA E BIBLIJAKE MERILIJA

9. Sose o ćhave šaj te pućen pe da li ćaće isplatini pe te ićeren pe ko biblijake moralna merilija?

⁹ Disavo puti te ćhave šaj te pućen pe da li ćaće vredini te ićeren pe ko biblijake  moralna merilija. Tegani, trudin tut te haljove sose pućena odova. Da li ćaće na složinena pe odoleja so pisini ki Biblija ili na đanena sar averenđe te objasninen ko so verujinena? So god te ovel, đi proučinena i knjiga Ov bahtalo zauvek! pomožin lenđe te haljon sose tano amare šukaripase te šuna e Jehovase zapovestija. b

10. Sar šaj te pomožine te ćhavenđe te razmislinen ando po amalipe e Jehovaja?

¹⁰ Podstaknin te ćhaven te ceninen po amalipe e Jehovaja. Đi proučinena, koristinen o pućiba hem o slike andi knjiga Ov bahtalo zauvek! te šaj te pomožinen len te phenen odova so mislinena (Posl. 20:5). Na primer, ki 8. lekcija o Jehova tano uporedimo jekhe but šukar amaleja kova phenela amenđe sar te arakha amen. Palo odova so ka vaćeren andi 1. Jovanova 5:3, šaj te puće len: „Akana ked đanaja so o Jehova tano amaro but šukar amal, sar valjani te dikha ko odova so rodela amendar te ćera?“ Odova tano šaj jednostavno pućibe, ama šaj te pomožini te ćhavenđe te haljon so o Jehova dela amen zapovestija sose mangela amen (Is. 48:17, 18).

11. Sar šaj te pomožine te ćhavenđe pana pobuter te ceninen e biblijake načelija? (Poslovice 2:10, 11)

¹¹ Vaćeren odolestar sose tano šukar te ićeren pe ko biblijake načelija. Ked čitinena i Biblija ja e diveso stiho vaćeren ando odova sar e biblijake načelija pomožinđe tumare porodicaće. Na primer, tegani šaj te pomožine te ćhavenđe te haljon kobor tano važno te oven bućarne hem te na hovaven (Jevr. 13:18). Isto ađahar, tegani šaj hem te vaćere lenđe so e biblijake načelija šaj te arakhen amaro sastipe hem šaj te pomožinen amen te ova pobahtale (Posl. 14:29, 30). Ked vaćeraja amare ćhavencar ando odova, verovatno pana pobuter ka ceninen e biblijake savetija. (Čitin Poslovice 2:10, 11.)

12. Sar jekh dad pomožini pe ćhavese te haljol kobor tano važno te ićeri pe ko biblijake načelija?

¹² O Stiv hem olesi romni isi len ćhavo kova vićini pe Itan. Ov isi le 16 berš. O Stiv vaćeri sar on pomožinena e Itanese te haljol so o Jehova dela amen zakonija sose mangela amen. O Stiv phenela: „Amen pućaja le: ’Sose o Jehova phenela amenđe te ićera amen ko akava načelo? Sar odova mothovi so o Jehova mangela amen? So ka ovel ako na ićeraja amen ko odova načelo?‘ “ Asavke razgovorija pomožinđe e Itanese te prihvatini e Jehovase moralna merilija ko po životi. O Stiv pana phenela: „Amaro cilj tano te pomožina e Itanese te haljol so i mudrost koja tani ki Biblija tani but pobari andi manušikani mudrost.“

13. Sar šaj o roditeljija te sikaven pe ćhaven te ićeren pe ko biblijake načelija? Vaćer jekh primer.

¹³ Sikav len sar te ićeren pe ko biblijake načelija. Jekh način sar te ćere odova tano ked te ćhave valjani te čitinen disavi knjiga ja lektira asi škola. O manuša ki odija knjiga šaj ćerena o buća aso kola o Jehova phenela soj tane pogrešna, na primer ćerena nemoral ja tane nasilna. Ki odija knjiga odola buća nane mothovde sar diso lošno. Šaj te podstaknine te ćhaven te razmislinen sar o Jehova osetini pe ked o manuša ćerena odola buća (Posl. 22:24, 25; 1. Kor. 15:33; Fil. 4:8). Odova šaj te pomožini te ćhavenđe te dikhen sose tano šukar te šunen e Jehova. Ako o nastavnik ja neko ando  razred pućela len te phenen po mišljenje andi knjiga tegani šaj te vaćeren ando pe verovanja.

SIKAV TE ĆHAVEN SAR TE VAĆEREN ANDO PE VEROVANJA

14. Sostar o terne darana hem sose?

¹⁴ Disavo puti o terne darana te vaćeren ando odova ko so verujinena. Na primer, šaj te lađan ked valjani te objasninen sose na verujinena ki evolucija. Sose? Olenge nastavnikija šaj te phenen so i evolucija tani činjenica, a na teorija. Sar šaj te pomožine te ćhavenđe te oven hrabra đi vaćerena ando odova ko so verujinena?

15. So šaj e ternenđe te pomožini te oven uverime ko odova ko so verujinena?

¹⁵ Pomožin te ćhavenđe te oven pobuter uverime ko odova ko so verujinena. Tumare ćhave na valjani te lađan sose verujinena ko Stvoritelj (2. Tim. 1:8). Sose? But naučnikija haljona so o životi našti hine te ovel slučajno. On dikhena o dokazija so samo neko koj tano but inteligentno šaj hine te stvorini sa akala đivde buća. Odolese odola naučnikija na verujinena ki teorija andi evolucija koja sikavi pe ko but škole ko celo sveto. Jekh buti koja šaj te pomožini te ćhavenđe te zorjaćeren pi vera tani te razmislinen ando odova so avere phralen hem phenjen uverinđa so isi Stvoritelj kova sa ćerđa. c

16. Sar šaj o roditeljija te pomožinen pe ćhavenđe te đanen sar te objasninen averenđe sose verujinena ko Devel? (1. Petrova 3:15; dikh i slika.)

¹⁶ Pomožin te ćhavenđe te đanen sar te objasninen averenđe sose verujinena ko Devel. (Čitin 1. Petrova 3:15.) Šaj zajedno ko amaro sajt te dikhen o člankija andi serija „Mladi pitaju – Stvaranje ili evolucija?“ Palo odova šaj te birinen diso so mislinena so šaj te pomožini averenđe te haljon so postojini Stvoritelj. Podsetin len so na valjani te svađinen pe pekle amalencar ki škola. Podstaknin len ko jekh jednostavno hem logično način te vaćeren nekasa koj tano zainteresujimo. Na primer, jekh amal šaj te phenel: „Me verujinava samo ko odova so dikhava, a e Devle niked na dikhljum.“ Onda jekh terno Svedoko šaj te phenel: „Zamislin so phireja ki jekh šuma koja tani but dur andi diz hem aveja ko jekh bunari kova  tano gradimo ando bara. So ka misline? Neko morandilo te gradini odova bunari. Te šaj amari planeta hem sa o buća uzo amende te postojinen neko morandilo te stvorini len.“

17. Sar šaj o roditeljija te podstaknin pe ćhaven te arakhen načinija te vaćeren averencar kotar ćaćipe? Vaćer jekh primer.

¹⁷ Podstaknin te ćhaven te arakhen načinija te vaćeren averencar kotar ćaćipe (Rimlj. 10:10). Ked o ćhave trudinena pe te vaćeren averencar andi Biblija odova šaj te uporedina odoleja sar ked neko trudini pe te sikljol te bašali disavo instrumenti. Najangleder, o manuš vežbini o đilja kola lokho šaj te bašalen pe. Sar đala o vreme, olese tano sa polokho te bašali. Ko slično način, jekh terni osoba šaj te počmini te propovedini ko jekh jednostavno način. Na primer, šaj te pućel jekhe amale: „Da li đaneja so o naučnikija često kopirinena odova so isi ki priroda? Ka mukhav tuće jekh but šužo video odolestar.“ Palo odova so ka mukhel lese disavo video andi serija Da li je to neko osmislio?, ov šaj te phenel: „Ako o naučnikija lena slava aso odova so kopirinena odova so već postojini ki priroda, kase najangleder valjani te da slava aso odola buća?“ Tegani šaj odova amal ka mangel te sikljol diso pobuter andi Biblija.

HEM PONODRI POMOŽINEN TUMARE ĆHAVENĐE TE ZORJAĆEREN PI VERA

18. Sar šaj o roditeljija hem ponodri te pomožinen pe ćhavenđe te zorjaćeren pi vera?

¹⁸ Živinaja ko sveto kova tano pherdo e manušencar kola na verujinena ko Devel (2. Petr. 3:3). Odolese, roditeljija podstakninen tumare ćhaven te istražinen o teme kola ka pomožinen len poviše te poštujinen e Devleso Lafi hem olese moralna merilija. Pomožinen len pohor te razmislinen hem te zorjaćeren pi vera ađahar so ka vaćeren olencar ando buća kola o Jehova stvorinđa. Pomožinen len te haljon e biblijake proročanstvija kola već ispuninđe pe. A soj tano najvažno, molinen tumen olencar hem olenđe. Ako ćerena odova, oven sigurno so o Jehova ka blagoslovini tumaro trud (2. Let. 15:7).