6
Savi nada isi e muljendže?
1. So e Devljeso Lafi vačeri odoljestar?
Ked o Isus reslja ki Vitanija uzo Jerusalim, oljeso amal o Lazar već hine štar dive mulo. O Isus dželo e Marta hem e Marija ko grobo kuri oljengo phral hine parumo. Palo odova, but manuša čedisalje. Šaj lji te zamisline kobor i Marta hem i Marija hine bahtalje ked o Isus irija e Lazare ko dživdipe? Čitinen Jovan 11:21-24, 38-44.
I Marta već džandža o šukar haberi ando mulje. Oj džandža so o Jehova ka uskrsnini e muljen ki Phuv. Čitinen Jov 14:14, 15.
2. So ovela e muljenca ked merena?
O Devel vačerdža e Adamese: „Ando phuvjako prao hijan čerdo hem ko phuvjako prao ka irinetu.“ (1. MOJSIESO 3:19).
O manuša tane čerde ando phuvjako prao (1. Mojsieso 2:7; 3:19). Amen na hijam duhija hem ano amende nane duša koja palo meribe živini ko aver than. Ked amen mera amari godi na čerela hem sa amare mislija našaldžona. Odoljese o Lazar ked hine uskrsnimo na pheja so živija ko disavo aver than, sose o mulje nane svesna nisostar. Čitinen Psalam 146:4 hem Vačerutno 9:5, 6, 10.
Da lji o Devel mučini e manušen ki jag palo meribe? I Biblija mothovi so o mulje na džanena ništa. Odoljese o sikavibe ando pakao kuri thabljola i jag tano hovavno hem ladžačeri e Devlje. E Devljese tano gadno so o manuša mislinena so ov mučiniljen ki jag. Čitinen Jeremija 7:31.
Dikh o kratko film U kakvom se stanju nalaze mrtvi?
3. Šaj lji o mulje te vačeren amenca?
O mulje našti ni te vačeren ni te šunen (Psalam 115:17). Ama, disave anđelija tane lošna hem on šaj te vačeren e manušenca hem te čerenpe sar mulje (2. Petareso 2:4). O Jehova na mukela te vačera e muljenca. Čitinen 5. Mojsieso 18:10, 11.
4. Ko ka irinipe ko dživdipe?
But manuša kola mulje ka irinenpe ko dživdipe ki Phuv. Ka uskrsninen čak hem okola so na pendžardže e Devlje hem kola čerdže lošna buča. Čitinen Luka 23:43 hem Čeriba e Apostolengo 24:15.
Okola so ka uskrsninen ka oveljen prilika te sikljoven o čačipe ando Devel hem ka mothoven pi vera ko Isus adžahar so ka šunenlje (Pučaribe 20:11-13). Ako ka čeren šukar buča šaj te živinen večno ki Phuv. Čitinen Jovan 5:28, 29.
5. So o uskrsenje mothovi amendže ando Jehova?
O Devel dijamen nada so ka ušten sa okola so mulje amendar, adžahar so bičhaldža pe Čhave te merel amendže. O uskrsenje mothovi amendže e Jehovaso mangipe hem oljeso šukaripe kova na zaslužijam. Ked ka irinenpe o mulje ko dživdipe, kas posebno bi mangeja te dikhe? Čitinen Jovan 3:16 hem Rimskonendže 6:23.
