Γράμμας σο Μπουτσσάντιλο κο Ρωμαίοι 14:1-23
14 Τι δεχτίνεν λατσσιμάσαρ οντουλές σο λέσκι πίστη ισί μπίζουρανι, αλλά μα κρίνεν οντουλέν σο τθερένα γιαβέρ γνώμη τουμένταρ.
2 Εκ τζενό τθερέλα ζουρανί πίστη ντα χάλα σαρέ ο πράγματα. Αλλά ο τζενό σο λέσκι πίστη ισί μπίζουρανι χάλα σάντε λαχανικά.
3 Οντουβά σο χάλα τι σεβάνελ οντουλές σο να χάλα, ντα οντουβά σο να χάλα μα τι κρίνελ οντουλές σο χάλα, σόσκε ο Ντεβέλ δεχτιντάς-λες λατσσιμάσαρ.
4 Κον ισινάν τούι σο κρίνεσα εκχέ γιαβερέσκε υπηρετής; Λέσκο κύριος κα βακερέλ άμα βοβ ισί σωστός ή λάθος.* Ο Ιεχωβά* κα βοηθίνελ-λες τι τζαλ-λεν λατσσές.*
5 Εκ τζενό πακιάλα ότι εκ ντιβές ισί πο σημαντικός εκχέ γιαβερέ ντιβεσέσταρ. Εκ γιαβέρ πακιάλα ότι εκ ντιβές ισί ίδιος σαρέ ι γιαβερέ ντιβεσέντζαρ. Ο κάθε εκ τι αβέλ ντιπ σίγουρος πιρέ γκοντιάτε.
6 Οντουβά σο ντικχέλα εκ ντιβές σαρ πο σημαντικός, ντικχέλα-λες αντικάς ι Ιεχωβάσκε.* Οντουβά σο χάλα, χάλα ι Ιεχωβάσκε,* σόσκε βακερέλα ευχαριστώ κο Ντεβέλ κι προσευχή. Ντα οντουβά σο να χάλα, να χάλα ι Ιεχωβάσκε* ντα βακερέλα βοβ-ντα ευχαριστώ κο Ντεβέλ κι προσευχή.
7 Καέκ αμένταρ να τζουβντιόλα σάντε πέσκε. Ντα καέκ αμένταρ να μερέλα σάντε πέσκε.
8 Άμα τζουβντιάσα, τζουβντιάσα ι Ιεχωβάσκε,* ντα άμα μεράσα, μεράσα ι Ιεχωβάσκε.* Άρα, είτε τζουβντιάσα είτε μεράσα, ισινάμ ι Ιεχωβάσκε.*
9 Ο Χριστός ανταλέσκε μουλό ντα αβιλό πάλι κι ζωή, για τι αβέλ Κύριος εμ ι μουλένγκο εμ ι τζουβντένγκο.
10 Αλλά τούι σόσκε κρίνεσα τι πφραλές; Ή τούι σόσκε να σεβάνεσα τι πφραλές; Σαρέ αμέν κα ατσσάς ανγκλάλ κο Ντεβέλ, ντα βοβ κα κρίνελ-αμέν.
11 Σόσκε ισί γραμμέ: «“Καζόμ σίγουρος ισί ότι με τζουβντιάβα”, βακερέλα ο Ιεχωβά,* “σαρέ κα περέν κοτσίντζαρ ανγκλά-μάντε ντα σαρέ κα βακερέν ανγκλάλ κο γιαβερά ότι με ισινόμ ο Ντεβέλ”».
12 Άρα, ο κάθε εκ αμένταρ κα ντελ λογαριασμός πι νεαυτόσκε κο Ντεβέλ.
13 Οτθάρ, τι τσσιναβάς τι κρίνας ο εκ ι γιαβερές. Αλλά τι αβάς αποφασισμέ μα τι κεράς ποτές κάτι σο κα κερέλ μπίζουρανι ι πίστη εκχέ πφραλέσκι ή κα κερέλ-λες τι περέλ.
14 Ισινόμ ντιπ σίγουρος κο Κύριος Ιησούς ότι καέκ πράγμας σο χαλιόλα νανέ μαγαριμέ από κορκορό. Αλλά άμα εκ τζενό αμντίνελα ότι κάτι ισί μαγαριμέ, αζομάν ισί λάθος τι χαλ-λες.
15 Άμα το πφραλ νιωθίνελα μπέτι ιτιρί κατά χαμπέ σο χάσα τούι, να σικαβέσα αγάπη. Ο Χριστός μουλό ανταλέ τζενέσκε. Μα κερέλ-λες τι χασαρέλ πι πίστη ιτιρί κατά χαμπέ σο χάσα.
16 Μα κερέν καεκχές τι αρακχέλ λόγος τι βακερέλ μπέτι πράγματα ι λατσσιμάσκε σο κερένα.
17 Η Βασιλεία ι Ντεβλέσκι να τθερέλα τι κερέλ ι πραγματέντζαρ σο χάσα ντα πιάσα. Ανταβά σο ισί πο σημαντικός ισί τι αβάς δίκαιοι, τι τθεράς ειρήνη ντα χαρά αντράλ κατά άγιος πνεύμας.
18 Ο τζενό σο υπηρετίνελα σαρ δούλος ι Χριστός ανταλέ τροπόσαρ κερέλα ο γκι εμ ι Ντεβλέσκο εμ ι τζενένγκο.
19 Άρα, πρέπει τι κεράς σο νακχέλα αμαρέ βαστένταρ για τι κεράς ειρήνη ντα τι ντας ζορ ο εκ ι γιαβερές.
20 Μα καταστράφινε ιτιρί κατά χαμπέ οντουβά σο κερντάς ο Ντεβέλ. Ισί μπαγιά ότι σαρέ ο χαμπίματα χαλιόνα,* αλλά ισί λάθος τι χαλ εκ τζενό κάτι άμα ανταβά κα κερέλας εκχέ γιαβερές τι περέλ.*
21 Πο λατσσές μα τι χας μας ούτε τι πις μολ ούτε τι κερές κάτι σο κερέλα τι πφραλές τι περέλ.*
22 Ι πίστη σο τθερέσα, ατσσίκιαρ-λα τι νεαυτόσκε ανγκλάλ κο Ντεβέλ. Ευτυχισμέ ισί ο τζενό σο να κρίνελα πο νεαυτός οντουλέσαρ σο τραμπίνελα τι κερέλ.
23 Αλλά άμα νανέ σίγουρος ντα χάλα, ο βάρετα ισί οπρά-λέστε, σόσκε κερέλα-λες ανταβά χωρίς πίστη. Οτθάρ, άμα εκ τζενό κερέλα κάτι χωρίς πίστη, αμαρτίνελα.
Υποσημειώσεις
^ Κι Πουρανί Μπαλαμανί βακέρντιβελας «άμα βοβ ατσσόλα ή περέλα».
^ Κι Πουρανί Μπαλαμανί βακέρντιβελας «Ο Ιεχωβά μπορίνελα τι κερέλ-λες τι ατσσόλ».
^ Κι Πουρανί Μπαλαμανί βακέρντιβελας «σαρέ ο πράγματα ισί πάκι».
^ Γιαβέρσοϊ «κα κερέλας μπίζουρανι ι πίστη εκχέ γιαβερέσκι».
^ Γιαβέρσοϊ «σο κερέλα μπίζουρανι τι πφραλέσκι πίστη».
