1. Σόσκε βακεράσα ότι πρέπει ο Χριστιανοί τι μοιάζεν κο δέντρα; (Ντικχέν ι φωτογραφία-ντα)

 «ΚΑΝΑ κερέλα μπουτ μπαρμπάλ, ο δέντρος σο κουνιάντιβελα να πφανγκιόλα». Ανταβά λάφι σικαβέλα ότι ο δέντρα πρέπει τι κουνιάντιβεν κάνα κερέλα μπουτ μπαρμπάλ για τι μπορίνεν τι ατσσόν ζουρανέ. Για τι μπαριόν πνευματικά ο Χριστιανοί, πρέπει τι αβέν σαρ ανταλά δέντρα. Καλέ πραγματέντε; Πρέπει τι σικαβάς ότι ισινάμ λογικοί καζόμ κεράσα ο αλλαγές σο χρειαζίντιβενα κάνα ο πράγματα αμαρέ ζωγιάτε αλλάνενα ντα καζόμ σεβάνασα ο απόψεις ντα ο αποφάσεις ι γιαβερένγκε.

2. Καλά ιδιότητες κα βοηθίνεν-αμέν τι κεράς ο αλλαγές σο χρειαζίντιβενα κάνα ο πράγματα αμαρέ ζωγιάτε αλλάνενα, ντα σο κα ντικχάς ανταλέ μαθημάστε;

² Σαρ υπηρέτες ι Ιεχωβάσκε, πρέπει τι αβάς λογικοί. Πρέπει επίσης τι αβάς ταπεινοί ντα τι πφαμπάς ι γιαβερένγκε. Ανταλέ μαθημάστε, κα ντικχάς σαρ βοηθιντέ ασακέ ιδιότητες μερικέ Χριστιανόν τι ντεν-λεν πέρα κάνα λένγκε ζωές αλλάνενας. Κα ντικχάς επίσης σαρ μπορίνενα ανταλά ιδιότητες τι βοηθίνεν αμέν-ντα. Πρώτα όμως, κα σικλιάς κατά τέλειος παράδειγμας ι Ιεχωβάσκο ντα ι Ιησούσκο, σο ισί ο πο λογικοί.

3. Σο σικαβέλα ότι ο Ιεχωβά ισί λογικός;

³ Ο Ιεχωβά βακέρντιβελα «ο Μπαρ» επειδή ισί σταθερός. (Δευτ. 32:4) Όμως, ισί λογικός-ντα. Καζόμ ο πράγματα κο ντουνιάς αλλάνενα, ο Ντεβέλ κερέλα συνέχεια ο αλλαγές σο χρειαζίντιβενα για τι κερέλ τι νικιόλ μπαγιά λέσκο σκοπός. Ο Ιεχωβά κερντάς ι τζενέν τι μοιάζεν λέστε, ντα ντινάς-λεν ι ικανότητα τι κερέν ο αλλαγές σο χρειαζίντιβενα κάνα ο πράγματα αλλάνενα. Ντινάς ξεκάθαρες αρχές αντράλ κατά Γραφή σο βοηθίνενα-αμέν τι λας γκοντιαβέρ αποφάσεις σο-ντα δυσκολίες τι νακχάς. Ο παράδειγμας ι Ιεχωβάσκο ντα ο αρχές σο ντινάς-αμέν σικαβένα ότι, ενώ ο Ιεχωβά ισί «ο Μπαρ», ισί λογικός-ντα.

4. Βακερέν εκ παράδειγμας σο σικαβέλα ότι ο Ιεχωβά ισί λογικός. (Λευιτικό 5:7, 11)

 ⁴ Ο τρόπος σο συμπεριφερίντιβελα ο Ιεχωβά ισί τέλειος ντα λογικός. Βοβ νανέ σκληρός ι τζενέντζαρ. Σκεφτίνεν για παράδειγμας σαρ σικαβέλας ο Ιεχωβά ότι ισινέ λογικός ι Ισραηλιτέντζαρ. Να μανγκέλας σαριλένταρ τι κερέν ι ίδια θυσία, τσορορένταρ ντα χουλανένταρ. Ισινέ φαρ σο μουκχέλας τι ντελ ο κάθε εκ ι θυσία σο μπορίνελας.​—Διαβάνεν Λευιτικό 5:7, 11.

5. Βακερέν εκ παράδειγμας σο σικαβέλα ότι ο Ιεχωβά ισί ταπεινός ντα πφαμπόλα ι γιαβερένγκε.

⁵ Επειδή ο Ιεχωβά ισί ταπεινός ντα πφαμπόλα ι γιαβερένγκε, ανταβά τσσίντελα-λες τι αβέλ λογικός. Για παράδειγμας, ο Ιεχωβά σικαντάς ταπεινότητα κάνα ισινέ έτοιμος τι καταστραφίνελ ι πφιρνέ τζενέν σο μπεσένας κο Σόδομα. Ο Ιεχωβά μπουτσσαντάς πι αγγελόν τι βακερέν κο δίκαιος Λωτ τι τζαλ σουγκό κο βεσά. Ο Λωτ νταρέλας τι τζαλ οτθέ. Οτθάρ, ο Λωτ μολιντάς ι Ιεχωβάς τι μουκχέλ-λες τι τζαλ πι φαμιλιάσαρ κι Σηγώρ, εκ χουρντί πόλη σο κανονικά κα καταστραφίντιβελας. Ο Ιεχωβά κα μπορίνελας τι πιένελ τον Λωτ τι κερέλ ντιπ ο οδηγίες σο βακερντάας λέσκε. Αντίς τι κερέλ-λες ανταβά, ο Ιεχωβά μουκχλάς τον Λωτ τι τζαλ κι πόλη οντιά, παρόλο σο ανταβά μανγκέλας τι βακερέλ ότι να κα καταστραφίνελας-λα. (Γέν. 19:​18-22) Μπουτ μπρεσά πο σοράν, ο Ιεχωβά σικαντάς ότι πφαμπόλας ι τζενένγκε κι Νινευή. Μπουτσσαντάς ι προφητής Ιωνάς τι βακερέλ κο πφιρνέ τζενέ κι Νινευή ότι κα καταστραφίντιβενας εμ βον εμ λένγκι πόλη. Αλλά κάνα ο Νινευίτες μετανιωσάλε, ο Ιεχωβά τζιτζισάλο λένγκε ντα να καταστραφιντάς ι πόλη.​—Ιωνάς 3:1, 10· 4:​10, 11.

6. Σικαβέν εκχέ παραδειγμάσαρ σαρ ο Ιησούς ισινέ λογικός σαρ ισί ο Ιεχωβά-ντα.

⁶ Ο Ιησούς ισινέ λογικός σαρ ισί ο Ιεχωβά-ντα. Μπουτσσάντιλο κι πφουβ για τι βακερέλ ο λατσσέ αμπέρια “κο μπρακέ σο ισινέ χασαρντέ κο λαός Ισραήλ”. Όμως, σικαβέλας ότι ισινέ λογικός καζόμ κερέλας ανταβά διορισμός. Εκ φαρ, εκ τζουβέλ σο να ισινέ Ισραηλίτισσα μολιντάς-λες τι κερέλ λάκε τσσαγιά λατσσές, σο “τσσίντελας μπουτ κατά δαίμονας”. Επειδή πφαμπιλό ανταλέ τζουβλιάκε, ο Ιησούς κερντάς οντουβά σο μανγκλάς λέσταρ ντα κερντάς λατσσές λάκε τσσαγιά. (Ματθ. 15:​21-28) Ντικχέν εκ γιαβέρ παράδειγμας. Πο τζανγκλέ καζόμ κερέλας πο έργος, ο Ιησούς βακερντάς: «Κον κα κερέλ-μαν πέρα . . . , κα κεράβ-λες με-ντα πέρα». (Ματθ. 10:​33) Αλλά μήπως κερντάς πέρα ι Πετρός, σο βακερντάς τριν φαρ ότι να τζανέλας-λες; Νάα. Ο Ιησούς τζανέλας καζόμ μετανιωσάλοας ο Πέτρος ντα καζόμ πιστός ισινέ. Αφού αναστισάλο, ο Ιησούς σικαντάς-πες κο Πέτρος ντα ισί σχεδόν σίγουρος ότι βακερντάς λέσκε ότι συγχωριντάας-λες ντα ότι μανγκέλας-λες ατζέκ.​—Λουκ. 24:​33, 34.

7. Σο φήμη μανγκάσα τι τθεράς, σαρ βακερέλα ο εδάφιος Φιλιππησίους 4:5;

⁷ Ντικχλάμ ότι ο Ιεχωβά Ντεβέλ ντα ο Ιησούς Χριστός ισί λογικοί. Σο κα βακεράς αμένγκε; Ο Ιεχωβά μπεκλεντίνελα αμένταρ τι αβάς λογικοί. (Διαβάνεν Φιλιππησίους 4:5) Εκ μετάφραση ι Γραφιάκι βακερέλα ανταβά εδάφιος αντικάς: «Τι τθερέν ι φήμη ότι ισινέν λογικοί». Κα μπορίναας τι σκεφτίνας: “Ντικχένα-μαν ο  γιαβερά σαρ εκ τζενό σο ισί λογικός, σο να μανγκέλα τι νακχέλ λέσκο ντα τσσίντελα-πες παλάλ; Ή μήπως πακιάνα ότι ισινόμ αυστηρός, σκληρός ντα τζενό σο τθερέλα σορό; Μήπως επιμίναβα τι κερέν ο γιαβερά πάντα οντουβά σο πακιάβα με ότι ισί σωστός; Ή ασουνάβα ι γιαβερέν ντα δεχτίναβα οντουβά σο μανγκένα βον κάνα κάτι ασακό αβέλα-πες;” Καζόμ πο λογικοί ισινάμ, αζόμ πο μπουτ μοιάζασα κο Ιεχωβά ντα κο Ιησούς. Για τι ντικχάς καλέ ντουέ πραγματέντε χρειαζίντιβελα τι σικαβάς ότι ισινάμ λογικοί: κάνα ο πράγματα αμαρέ ζωγιάτε αλλάνενα ντα κάνα ο απόψεις ντα ο αποφάσεις ι γιαβερένγκε να συμφωνίνενα αμαρέντζαρ.

8. Σο κα βοηθίνελ-αμέν τι αβάς λογικοί κάνα ο πράγματα αλλάνενα; (Ντικχέν ι υποσημείωση-ντα)

⁸ Χρειαζίντιβελα τι αβάς λογικοί κάνα ο πράγματα αμαρέ ζωγιάτε αλλάνενα. Ανταλά αλλαγές μπέκιμ τι ανέν αμένγκε δυσκολίες σο να μπεκλεντίνασα. Μπέκιμ τι νακχάς εκ ξαφνικός πρόβλημας υγείας. Ή κάποιες ξαφνικές αλλαγές, σο τθερένα τι κερέν ι λοβέντζαρ ή με την κυβέρνηση οτθέ σο τζουβντιάσα, μπορεί τι κερέν άνω κάτω αμαρί ζωή. (Εκκλ. 9:​11· 1 Κορ. 7:​31) Ατζέ-ντα εκ αλλαγή αμαρέ διορισμόστε μπορεί τι αβέλ εκ δοκιμασία αμένγκε. Σο-ντα δυσκολία τι νακχάς, μπορίνασα τι κεράς ο αλλαγές σο χρειαζίντιβενα ντα τι τζας-λεν λατσσές κάνα κεράσα ακαλά σταρ βήματα: (1) τι δεχτίνας ότι ο πράγματα αλλαξάλε, (2) τι σκεφτίνας ο μέλλον, (3) τι ντικχάς ο λατσσέ πράγματα αμαρέ ζωγιάτε, (4) τι κεράς πράγματα ι γιαβερένγκε. b Ακανά κα ντικχάς σαρ μερικά πφραλά ντα πφενιά βοηθίντιλε κάνα κερντέ ανταλά βήματα.

9. Σαρ εκ αντρόγυνος σο ισινέ ιεραπόστολοι μπορισάλε τι νταϊντίνεν κάποιες δοκιμασίες σο να μπεκλεντίνενας λένγκε;

⁹ Δεχτίνεν ότι ο πράγματα αλλαξάλε. Ο Εμανουέλε ντα η Φραντσέσκα διορισάλε ιεραπόστολοι εκχέ ξένε τθεμέστε. Οτθέ σο αρχισάλε τι σικλιόν ι τσσιπ ντα τι γνωρίντιβεν πουμαρέ νεβέ κχανγκιριάσαρ, αβιλό ο Κορωνοϊός ντα αναγκασάλε τι ατσσόν κορκορέ. Αζομάν, η ντάι της Φραντσέσκα μουλί ξαφνικά. Η Φραντσέσκα μανγκέλας μπουτ τι τζαλ πι τζενέντε, αλλά ιτιρί κατά Κορωνοϊός να μπορίνελας τι κερέλ οντουβά ταξίδι. Σαρ μπορισάλι τι ντελ πέρα ανταλά δυσκολίες; Πρώτον, ο Εμανουέλε ντα η Φραντσέσκα, σαρ αντρόγυνος, προσευχίντιβενας για σοφία για τι νταϊντίνεν ο κάθε ντιβές ξεχωριστά. Ο Ιεχωβά απαντίνελας λένγκε προσευχιέντε κι σωστή στιγμή αντράλ κατά πνευματικός χαμπέ. Για παράδειγμας, λιντέ ζορ κάνα ντικχλέ ο βίντεος εκχέ πφραλέσκο, σο βακερντάς: «Καζόμ πο σουγκό δεχτίνασα ο αλλαγές σο αβιλέ-πες αμαρέ ζωγιάτε, αζόμ πο σουγκό κα αρακχάς πάλι αμαρί χαρά ντα κα μπορίνας τι κεράς ο πο λατσσό κο νεβέ πράγματα σο τθεράσα αμαρέ ζωγιάτε». c Δεύτερον, αποφασιντέ τι τζαν-λεν πο λατσσές κο έργος σο κερένας κατά τηλέφωνος ντα αρχισάλε τι κερέν εκχέ τζενές μελέτη. Τρίτον, εκτιμίνενας ι ζορ ντα ι βοήθεια ι πφραλένγκι σο ισινέ οντουλέ τθεμέσταρ. Για εκ μπρες, εκ λατσσί πφεν μπουτσσαβέλας λένγκε εκ χουρντό μήνυμας με εκ εδάφιος κάθε ντιβές. Άμα αμέν-ντα κα δεχτίνας ο αλλαγές σο αβιλέ-πες αμαρέ ζωγιάτε, κα αβάς χαρούμενοι οντουλέντζαρ σο μπορίνασα τι κεράς.

10. Σο χρειαζίντιλο τι κερέλ εκ πφεν σε εκ μπαρί αλλαγή σο αβιλί-πες λάκε ζωγιάτε;

¹⁰ Τι σκεφτίνεν ο μέλλον ντα τι ντικχέν ο λατσσέ πράγματα τουμαρέ ζωγιάτε. Η Κριστίνα, εκ Ρουμάνα πφεν σο τζουβντιόλα κι Ιαπωνία, πφανγκιλό λάκο γκι κάνα τσσιναντάς τι υπαρχίντιβελ η αγγλική κχανγκιρί σο τζάλας. Όμως,  να ατσσιλί κολλημέ ανταλέστε σο αβιλό-πες. Αποφασιντάς τι κερέλ ο πο λατσσό σο μπορίνελας σε εκ κχανγκιρί σο κερέλας λάφι ιαπωνικά ντα τι νικιόλ συνέχεια κο έργος οντουλέ τομεάστε. Μανγκλάς εκχέ τζενιάταρ σο κερέλας λάσαρ μπουτί ανγκλέ τι βοηθίνελ-λα τι κερέλ πο λατσσές λάφι ιαπωνικά. Βόι δεχτιντάς τι σικλιαρέλ την Κριστίνα αντράλ κατά Γραφή ντα κατά βιβλιάριος Μπουτ Σουκάρ Ζωή για Πάντα! Εκτός ότι η Κριστίνα σικλιλί τι κερέλ πο λατσσές λάφι ιαπωνικά, οντιά τζουβέλ αρχισάλι τι μανγκέλ τι σικλιόλ ι αλήθεια. Κάνα ντικχάσα ανγκλάλ, ο αλλαγές σο να μπεκλεντίνασα μπορεί τι ανέν ευλογίες σο να νακχλέ αμαρέ γκοντιάταρ.

11. Σο βοηθιντάς εκχέ αντρογυνός σο νακχλάς εκ πρόβλημας ι λοβέντζαρ;

¹¹ Τι κερέν πράγματα ι γιαβερένγκε. Εκ αντρόγυνος σο τζουβντιόλα εκχέ τθεμέστε σο η κυβέρνηση τσσιναντάς αμαρό έργος αρχισάλε τι τθερέν πρόβλημας ι λοβέντζαρ κάνα ο τθεμ τθερέλας μπαρέ οικονομικά προβλήματα. Σο χρειαζίντιλο τι κερέν; Κι αρχή, κερντέ βήματα για τι κερέν πο απλή πουμαρί ζωή. Σοράν, αντίς τι ντικχέν σάντε πουμαρέ προβλήματα, αποφασιντέ τι βοηθίνεν ι γιαβερέν ντα τι κερέν μπερεκέτι πράγματα κο έργος. (Πράξ. 20:​35) Ο ρομ βακερντάς: «Επειδή κεράας μπερεκέτι πράγματα κο έργος, τθεράας πο χάνικ σαάτι για τι σκεφτίνας αμαρέ προβλήματα ντα πο μπουτ σαάτι για τι κεράς οντουβά σο μανγκέλα ο Ντεβέλ». Κάνα ο πράγματα αμαρέ ζωγιάτε αλλάνενα, πρέπει τι ντας-αμέν γκοντί καζόμ σημαντικός ισί τι συνεχίνας τι βοηθίνας ι γιαβερέν, ειδικά αντράλ κατά έργος σο κεράσα.

12. Σαρ μπορίνελα ο παράδειγμας ι απόστολε Παυλόσκο τι βοηθίνελ-αμέν τι αλλάνας ο τρόπος σο βακεράσα ο λατσσέ αμπέρια;

¹² Κο έργος, χρειαζίντιβελα τι αβάς έτοιμοι τι αλλάνας ο τρόπος σο βακεράσα ο λατσσέ αμπέρια. Ο τζενέ σο αρακχάσα πακιάνα διαφορετικά πράγματα ι Ντεβλέσκε, ντα ισί διαφορετικέ τθεμένταρ ντα τθερένα γιαβέρ κουλτούρα. Ο απόστολος Παύλος κερέλας ο αλλαγές σο χρειαζίντιβενας, ντα μπορίνασα τι σικλιάς κατά παράδειγμας λέσκο. Ο Ιησούς διοριντάς ι Παυλός τι αβέλ «απόστολος ι τθεμένγκο». (Ρωμ. 11:​13) Καζόμ κερέλας οντουβά διορισμός, ο Παύλος βακερέλας ο λατσσέ αμπέρια κο Ιουδαίοι, κο Μπαλαμέ, κο σπουδαγμέ, κο ταπεινοί αγρότες, κο τζενέ σο τθερένας μπαρέ θέσεις ντα κο βασιλιάδες. Επειδή κερέλας έργος αζόμ μπουτέ τζενέντε, ο Παύλος αβιλό «τα πάντα σαβέ τι μανγκές τζενένγκε» για τι αγγίνελ λένγκο γκι. (1 Κορ. 9:​19-23) Σκεφτίνελας προσεκτικά ι κουλτούρα ντα ι θρησκεία ι τζενένγκι σο κερέλας λέντζαρ λάφι. Ανταβά βοηθίνελας-λες τι κερέλ λάφι τροπόσαρ σο κα βοηθίνελας ι κάθε εκχές τι πλησιάνελ ι Ιεχωβάς. Μπορίνασα αμέν-ντα τι αβάς πο λατσσέ κο έργος κάνα ισινάμ έτοιμοι τι αλλάνας ο τρόπος σο βακεράσα ο λατσσέ αμπέρια ντα σκεφτίνασα ο πο λατσσό τρόπος για τι βοηθίνας ι κάθε εκχές.

13. Καβά πράγμας σο βακέρντιβελα κο εδάφιος 1 Κορινθίους 8:9 να κα κεράς άμα σεβάνασα ο απόψεις ι γιαβερένγκε;

¹³ Άμα ισινάμ λογικοί, ανταβά κα βοηθίνελ-αμέν τι σεβάνας επίσης ο απόψεις ι γιαβερένγκε. Για παράδειγμας, μερικά πφενιά μπεϊντίνενα τι ζουζίνεν-πες, ενώ γιαβερά όχι. Μερικοί Χριστιανοί μπεϊντίνενα τι πιν χάνικ μολ ενώ γιαβερά τραμπίνενα μα τι πιν ιτς. Σαρέ ο Χριστιανοί μανγκένα τι τθερέν λατσσί υγεία αλλά τραμπίνενα διαφορετικοί τρόποι για τι αρακχαβέν πουμαρί υγεία. Άμα πακιάσα ότι αμέν τθεράσα πάντα δίκιος ντα προσπαθίνασα τι κεράς αμαρέ πφραλέν τι ακολουθίνεν οντουβά σο κερντάμ αμέν, ανταβά μπορεί τι κερέλ ι γιαβερέν τι χασαρέν πουμαρί πίστη ντα τι ανέλ διχόνοια κι κχανγκιρί. Σίγουρα, να κα μανγκάας τι κεράς-λες ανταβά! (Διαβάνεν 1 Κορινθίους 8:9· 10:​23, 24) Για τι  ντικχάς ντούι παραδείγματα σο σικαβένα σαρ βοηθίνενα-αμέν ο αρχές ι Γραφιάκε τι αβάς ισορροπημέ ντα τι ατσσικιαράς ι ειρήνη.

14. Καλά αρχές ι Γραφιάκε πρέπει τι ντας-αμέν γκοντί για το ιριαϊπέ ντα για την εμφάνιση;

¹⁴ Ιριαϊπέ ντα εμφάνιση. Αντίς τι τσσουβέλ αυστηρούς κανόνες ι ιριαϊμάσκε, ο Ιεχωβά ντινάς-αμέν μερικές αρχές. Πρέπει τι ιριαβάς-αμέν τροπόσαρ σο ταιριάνελα κο υπηρέτες κι Ντεβλέσκε, ντα τι σικαβάς ότι ισινάμ λογικοί, ντα ότι ιριαβάσα-αμέν σεΐντζαρ σο να ανένα λατζ καεκχέστε ντα «τραμπίντιβενα γκοντιάσαρ». (1 Τιμ. 2:9, 10· 1 Πέτρ. 3:3) Οτθάρ, να ταρτίνασα ι προσοχή αμαρέ νεαυτόστε ι τροπόσαρ σο ιριαβάσα-αμέν. Ο αρχές ι Γραφιάκε βοηθίνενα επίσης ι πρεσβυτερόν μα τι τσσουβέν πουμαρέ κανόνες σο τθερένα τι κερέν ι σεΐντζαρ ντα ι τροπόσαρ σο κα τσσινέλ ή κα κερέλ εκ τζενό πο μπαλά. Για παράδειγμας, ο πρεσβύτεροι εκχέ κχανγκιριάτε μανγκένας τι βοηθίνεν μερικέ τερνέ πφραλέν σο τσσιντέας πουμαρέ μπαλά σαρ ο τερνέ ι ντουνιάσκε. Δηλαδή, ενώ τσσιντέας πουμαρέ μπαλά χαρνέ, να ισινέ όμως ιτς περιποιημέ. Σαρ κα μπορίνενας ο πρεσβύτεροι τι βοηθίνεν-λεν χωρίς τι τσσουβέν εκ κανόνας; Ο επίσκοπος περιοχής βακερντάς κο πρεσβύτεροι τι βακερέν κο πφραλά: «Άμα ισινάν κο βήμας ντα ο τζενέ προσοχίνενα πο μπουτ τι εμφάνιση παρά το λάφια, αζομάν υπαρχίντιβελα πρόβλημας τι ιριαϊμάσαρ ντα τι μπαλέντζαρ». Ανταγιά απλή εξήγηση ντινάς λύση κο πρόβλημας χωρίς τι χρειαζίντιβελ τι τσσουβντιόλ κάποιος κανόνας. d

15. Καλά νόμοι ντα αρχές ι Γραφιάκε βοηθίνενα-αμέν κάνα τραμπίνασα σαρ κα αρακχαβάς αμαρί υγεία; (Ρωμαίους 14:5)

¹⁵ Υγεία. Ο κάθε Χριστιανός πρέπει τι αποφασίνελ σαρ κα αρακχαβέλ πι υγεία. (Γαλ. 6:5) Κάνα ο Χριστιανοί τραμπίνενα εκ θεραπεία, χρειαζίντιβελα τι ντεν καν κο νόμοι κι Γραφιάκε σο βακερένα μα τι τσσουβάς ρατ ντα μα τι κεράς μπενγκαλέ πράγματα. (Πράξ. 15:​20· Γαλ. 5:​ 19, 20) Εκτός ανταλένταρ, ο Χριστιανοί μπορίνενα τι τραμπίνεν σο μανγκένα βον. Κάποια τζενέ μανγκένα βοήθεια σάντε κατά γιατροί, ενώ γιαβερά τζενέ τραμπίνενα γιαβερά τρόποι για τι αβέν λατσσές. Αμέν μπορεί τι αβάς σίγουροι καγιά θεραπεία ισί λατσσί ντα καγιά νανέ λατσσί. Αλλά πρέπει τι σεβάνας ο δικαίωμας σο τθερένα αμαρέ πφραλά ντα πφενιά τι τραμπίνεν κορκορέ σαρ κα αρακχαβέν πουμαρί υγεία. Οτθάρ, πρέπει τι ντας-αμέν γκοντί ακαλά: (1) Σάντε η Βασιλεία ι Ντεβλέσκι κα νασκιαρέλ ντιπ σαρέ ο νασφαλίματα. (Ησ. 33:​24) (2) Κάθε Χριστιανός πρέπει τι αβέλ «ντιπ σίγουρος» καγιά ισί η πο λατσσί θεραπεία λέσκε. (Διαβάνεν Ρωμαίους 14:5) (3) Δεν πρέπει τι κρίνας ι γιαβερέν ούτε τι κεράς-λεν τι χασαρέν πουμαρί πίστη. (Ρωμ. 14:​13) (4) Ο Χριστιανοί σικαβένα αγάπη ντα να τσσουβένα πουμαρέ απόψεις πο οπρέ κατά ενότητα ι κχανγκιριάκι. (Ρωμ. 14:​15, 19, 20) Άμα τθεράσα αμαρέ γκοντιάτε ανταλά σημεία, κα τθεράς λατσσί φιλία αμαρέ πφραλέντζαρ ντα πφενίντζαρ ντα κα βοηθίνας τι υπαρχίντιβελ ειρήνη κι κχανγκιρί.

16. Σαρ μπορίνελα εκ πρεσβύτερος τι αβέλ λογικός ι γιαβερέ πρεσβυτερόντζαρ; (Ντικχέν ο φωτογραφίες-ντα)

¹⁶ Ο πρεσβύτεροι πρέπει τι ντεν ο λατσσό παράδειγμας ντα τι αβέν λογικοί. (1 Τιμ. 3:2, 3) Για παράδειγμας, εκ πρεσβύτερος δεν πρέπει τι μπεκλεντίνελ ότι ο γιαβερά κα δεχτίνεν πάντα λέσκε απόψεις επειδή ισί πο μπαρό κι ηλικία κατά γιαβερά πρεσβύτεροι. Αγαβέλα ότι ο πνεύμας ι Ιεχωβάσκο μπορεί τι τσσίντελ ι κάθε πρεσβυτερός τι βακερέλ κάτι σο κα βοηθίνελ-λεν τι λεν εκ γκοντιαβέρ απόφαση. Επίσης, άμα ο πο μπουτ πρεσβύτεροι συμφωνίνενα τι κερέν κάτι σο να τζάλα κόντρα κο αρχές κι Γραφιάκε, ο λογικός πρεσβύτερος κα στηρίνελ ανταγιά απόφαση, ατζέ-ντα άμα βοβ κα μανγκέλας κάτι γιαβέρ.

17. Καλά ευλογίες τθερένα ο Χριστιανοί σο ισί λογικοί;

¹⁷ Ο Χριστιανοί τθερένα μπουτ ευλογίες κάνα ισί λογικοί. Αβάσα πο λατσσέ αμαλά ι πφραλέντζαρ ντα ι πφενίντζαρ ντα η κχανγκιρί τθερέλα ειρήνη. Μπεϊντίνασα ο διαφορετικοί χαρακτήρες ντα κουλτούρες αντρέ κο λαός κι Ιεχωβάσκο. Ντα, παρόλο σο ισινάμ διαφορετικοί, ντάσα-λες λατρεία σαρ εκ ενωμέ φαμιλί. Ο πο σημαντικός ισί ότι ισινάμ ευτυχισμέ σο τζανάσα ότι μοιάζασα αμαρέ Ντεβλέστε, κο Ιεχωβά, σο ισί λογικός.