O Dewel organisiras i tchawen o Abrahamestar. Job gerdas kowa, (1) ha dajas lo len peskre laba, ap hoi jon hunte rikeran pen, (2) ha krajas lo dran lende i nationa un (3) ha dajas lo len i newo lab: “Israel”. Jaake wan i Israelitarja koja nationa, gai dajan garda ap o tchatcho patsepen, ninna dajan jon jakk ap i laba o Dewlestar (2. Mose 19:5). Jaake nai wans i Israelitarja i tsele manushenge i prossepen. — Dikh pala an 1. Mose 22:18.

O Dewel rodas len wri, te wenn le leskre rakepangre (Jesajah 43:10, 12). Lengro djipen tsikerell menge, gai djas lenge an ko tsiro mishto, ha shunan le ap i Dewleskre laba (Gilja 19:7, 8). Dran o djipen kola Israelitarjendar was wawaren tsikemen, ha te wenn le maala i Dewlestar. — Dikh pala an Bitchepangre 1:8, Luka 24:48.

Pal i tsiro nashran kola Isrealitarja o Dewleskro latchepen. Doleske rodas pes o Dewel i christiki kangri win (Mateo 23:37, 38; Hebrearja 8:9). Tchatche Christe hi kanne koi christiki kangri – jon hi kanne rakepangre i Jehowestar. — Dikh pala an Bitchepangre 15:14, 17.

O Jesus organisiras peskre bitchepangren, (1) te anenn le o Dewleskro lab, (2) te krenn le an haki nationa wawar rakepangren (Mateo 24:14; 28:19, 20; Remarja 10:18; Debleskro tsiro 14:6). Koi buhti his an kek tsiro bareda, ha kanne an maro tsiro. Gai anell o Jehowah kitse millione dran haki nationa an peskro tchatcho patsepen ketene, hi i newo kooma, hoi dajas an kek wawar tsiro (Debleskro tsiro 7:9, 10). Tchatche Christe hin organisiremen, te djan le penge prahlenge ap o wast, ninna te krenn le pen sorles an o patsepen. Ap i tseli phub dell pash lende an o Ketenepen i emligi biblatiki programa. — Dikh pala an Hebrearja 10:24, 25.

Pal ko bersh 1870 wajas i tikni groupa ketene, gai khaman o nashedo biblakro tchatchepen pale te hatsell. Jon djinan, gai was i christiki kangri i Jesestar organisiremen, te rakerenn le pral o Dewleskro Them. Jaake kran jon i bari aktiona, gai anan le an budeda thema o latcho lab pral o Dewleskro Them. An o bersh 1931 dan le pen ko lab Jehoweskre Rakepangre. — Dikh pala an Bitchepangre 2:1, 4; 5:42.

An Jerusalem dajan an o 1. sheeleskro bersh phureda morsha – pralstune sikepangre. Len his i jakk ap kola tsele christike kangja. Jon sikeran o tselo tsiro kokeres kowa, hoi o Jesus sikeras. Jaake atchas o Jesus o shero i kangjendar (Bitchepangre 15:2). Sawe morsha denna an maro tsiro ninna. I Pralstune Sikepangre hi pash mende ninna sawe phureda morsha. Len hi i jakk ap hako Bethel mendar, gai mari literatura – mari literatura della an budeda ha 700 tchipja – tchindes wella. Jaake nai denn i Pralstune Sikepangre menge kola laba, hoi krenn men sorles. Jon sikerenn ninna haki kangri * mendar o Dewleskro drom, te djinass, ha te djass les. An haki kangri denn ninna win rodede morsha, gai kharenn Phuresta. Kola morsha denn pengro djiestar jakk ap i bakre o Dewlestar. — Dikh pala an 1. Petro 5:2, 3.

Mer ham ninna organisiremen, te rakerah i manushentsa pral o latcho lab. Jaake, ha i Jeseskre bitchepangre, djah mer kher-pal-kher (Bitchepangre 20:20). Ap kolende, gai o tchatchepen gamenna, penah mer, gai nai lenn le mendar i Biblakro Kurso. Ham mer budeda ha i organisationa? Awa! Mer ham jek familja. O Dewel hi maro gamlo dad, jaake ham mer prahla un pehnja. Hoi ninna hi, mer ham menge koi (2. Tessalonikarja 1:3). Mer ham jaake organisiremen, te dikell o Dewel latches ap mende. Doleske ham mer i bachtlesta familja ap i tseli phub! — Dikh pala an Gilja 33:12; Bitchepangre 20:35.