3. KOTOR
E Rahab patyajlas le Jehovas
Gindis andre, hoj ando Jeriko sam. Kado foro pe Kanaanesko phuv si. Kathe le manusha chi patyan le Jehovas. Kathe, mashkar lende trajil e Rahab.
Kana e Rahab cine shejori sas, shundas hoj o Mozesh duj puterdas o Lolo tengeri. Vi kodo shundas, sar andas avri le Devleske nipos andar o Edyiptomo. Vi pe kodo shundas ke o Jehova sar zhutindas len, tele te maren penge xolyarden. Akanak sakon pa kodo vorbisaren, hoj le Devlesko nipo cerha cirde pasha o Jeriko.
E Rahab grizhisardas po izraeliti, anda kodo ke patyajlas le Jehovas
Varisavi ratyi duj mursha mashkar le Jehovesko nipo, ando Jeriko zhan te dikhen hoj sosko zuralo si o foro. Kaj le Rahabako kher zhan. Voj andre akharel len, haj kodo phenel lenge, hoj te ashen kothe. Ratyi le forosko kraj zhanglas, hoj duj mursha avile ando Jeriko. Akanak ande Rahabako kher si. Anda kado o kraj manushen bishavel, te xutyilen len. E Rahab garavel le duj murshen ando kher. Kado phenel le ketanenge: „Kathe sas duj mursh, de aba gelinetar andar o foro. „Te sidyaren, atunchi shaj xutyilen len!” So gindines, e Rahab sostar grizhisardas pal o duj mursha? (. . .) Anda kodo ke patyal le Jehovas, thaj zhanel, hoj o Del le izraelitenge del kadi phuv.
Anglal kodi kana le mursha gelinetar kathar e Rahab, kodi phende lake, ke ando trajo mukena la thaj lake családos kana o Jeriko pustisajvela. Zhanes so phendine, kana gelinetar? (. . .) Kado phendine: „Phande kado lolo shelo ande tyiri felyastra. Kado te keres, atunchi kon ande tyiro kher avna, chi merena.” E Rahab sakofelo kade kerdas, sar le manusha phende lake. Zhanes, so pecil pala kado? (. . .)
O Jehova ando trajo muklas la Rahaba thaj lake családos
Na butara le Jehovasko nipo krujal phiren o foro, bivorbako. Zhi ko shovto dyes kado keren, sako dyes jekhar. De po eftato dyes eftavar phiren krujal o foro. Pala kado sakono opre cipisarel. Pe kado o Jehova tele pustisarel le Jerikovos. De jekh kher inke tordyol! Ande savi khereski felyastra lolo shelo si. Dikhes po kipo? (. . .) E Rahab thaj lako családo muntusardine.
So shaj sityos kathar e Rahab? (. . .) E Rahab patyajlas le Jehovas, anda kodo ke but sakofelo lasho shundas pal leste. Vi tu but sakofelo lasho shaj sityos pal o Jehova. Patyas le Jehovas, kade sar e Rahab? (. . .) Zhanas, hoj ova!
