Евреёря 13:1-25
13 На́ парашэн тэ авэн глаба ек пала ек*, сар ԥрала.
2 На́ бистрэн тэ шон сама ек еқэс, важ кода кай дэсавэ шутэ сама лэ анӷелонэн и прилинэ лэн пэстэ, хоть екжэнэ и на ӷанэнас пала када.
3 Сэрэн пала кодэла, ко андо баруно, сар ԥэнэса тумэ бэшлоп вместе лэнца. Кадяжэ на́ бистрэн пала кодэла, каса жэстоко обжанпэ, важ кода кай тумэ тожэ мануша, савэндэ исин тила и рат.
4 Кала дуй мануша жэнинпэ, всаворэ трэбуй тэ стон патив пэ када, и о хулай и хулаи на трэбуй тэ придэн ек еқэс*, важ кода кай о Дэл лэла тэ сындой всаворэн, ко дошало андо билажавардимос, и неважно, жэнати вонэ чи най.
5 Тумэ на трэбуй тэ здран пала ловэ, авэн лошалэ кодэлэсти, со тумэндэ исин. Важ кода кай во ԥэндя: «Мэ никала на ашавава тут и никала на помэкава тут».
6 Кочай амэ барэ патяимаса ԥэнас: «О Иегова* поможый манди, мэ на лава тэ дарав. Со стерэла манди о мануш?»
7 Сэрэн пала кодэла, ко лэлпэ хуласа машкар тумэндэ, ко поможыяс тумэнди тэ полэн о алав лэ Дэвлэстар. Шон сама, сар вонэ андярэн пэс и саво лашымос када анэн, и тоди патян па лэнго примеро*.
8 О Исусо Христос кацаво жэ — арати, адес и о вико вечно.
9 На́ змардён па правильно дром, кала ашунэн, сар сытярэн варисости аврэсти. Ашэн май састэ через кода, кай о Дэл здиқэл пэр тумэндэ па пэско баро ковло ди, ай най через о законо пала хамос, саво на анэн лашымос кодэлэнди, ко лэс ритярэл.
10 Амэндэ исин жэртвенико, па саво моӷут тэ хан кати кодэла, ко терэл дила андэ катуна.
11 Пала тэрмино* сԥабарэн лэ жывотнонэн, каско рат о ӷлавно рашай анэн андо свынто ҭан сар жэртва пала бэзэх.
12 Важ када о Исусо пэрэандярдя бида пала лэ форостирэ вороты, кай тэ свынцой лэ народос пэстирэ ратэса.
13 Ни акэ, давайте вижаса пала тэрмино каринг лэстэ и ласа тэ пэрэандярас кодэва жэ лажаимос, саво пэрэандярдя во.
14 Амэ ӷанас, кай амэндэ катэ нинай пэско форо, но амэ всаворэ́ одеса аштярас о форо, саво трэбуй тэ авэл англэ.
15 Давайте через о Исусо вся и время тэ андярас лашо алав по Дэл, ԥэнэса анас лэсти жэртва — када о лашымос амаря думатар*, кала росԥэнас аврэнди пала лэско алав.
16 Кадяжэ на́ бистрэн тэ терэн лашымос и тэ делинпэ аврэнца, важ кода кай кацави дила, сар жэртва, и вой уӷодно лэ Дэвлэсти.
17 Приашундён каринг кодэла, ко лэлпэ хуласа машкар тумэндэ, и кандэн лэн, важ кода кай вонэ вся и время диқэн пала тумэндэ и трэбуй авэна тэ тердён англа Дэл по сындо* важ пэстири дила. Тоди вонэ авэна лошалэ тэ диқэн пала тумэндэ, и лэндэ на авэла кадэлэстар ԥаримос*, через со тумэнди авелоп вэрыто.
18 Мангэнпэ пала амэндэ, важ кода кай амэ ӷанас, кай амаро ди вужо, и амэ андэ вся камас тэ авас чачунэ.
19 Но со май фартэ камав тэ ԥэнав тумэнди тэ мангэнпэ, кай мэ май ӥто тэ рисавав каринг тумэндэ.
20 О Дэл, савэстар жал и мирно жызня, рисардя амарэ Барэ Хулас лэ Исусос — лэ ашунглэ барэдэрэс, саво диқэл пала пэско стадо. Када во андя лэ Дэвлэсти о рат важ о вечно доӷоворо.
21 Тэ дэл амаро Дэл тумэнди вся, со трэбуй, кай тумэ тэ уӷодин лэсти. И мэк через о Исусо Христос во поможый амэнди тэ терас кода, со лэсти чалёл. Тэ авэл во ашунгло о вико вечно. Аминь.
22 Мангав тумэн, ԥрала, старыинпэ тэ виашунэн кадэла алава, кай тэ лэн зор, важ кода кай мэ на пистросардэм тумэнди фартэ бут.
23 Ӷанэн, кай амарэ ԥралэс лэ Тимафеёс одмэклэ. Если во ӥто авэла, амэ лэса аваса тумэндэ.
24 Пэрэдэн поклоно всаворэнди, ко лэлпэ хуласа машкар тумэндэ, и всаворэ́ свынтонэнди. Тумэнди пэрэдэн поклоно и ԥрала анда Ита́лия.
25 Мэк о Дэл здиқэл пэр тумэндэ па пэско баро ковло ди.
Сноски
^ Или «тэ любин ек еқэс».
^ Или «тэ изменин ек еқэсти».
^ Или «лэн лэндар примеро, сар тэ патян».
^ Или «лаӷерё».
^ Ворта «амаря шыбатар».
^ Или «трэбуй тэ дэн отчёто».
^ Или «покута».
