Матфеё 6:1-34
6 Следин, кай тумэ тэ на висыкавэн англа авэр пэстири правильно дила, а то тумэнди на авэла блаӷословения* тумарэ небеснонэ Дадэстар.
2 Кала поможыс лэ чорорэнди*, на́ путюв англа всаворэ, сар када терэн и двухлични мануша андэ синагоги и пэ вулицы, кай пала лэндэ драго тэ дэл дума о миро. Чаче ԥэнав тумэнди: лэнди ужэ дорэсляпэ вся и блаӷословения, сави лэнди прижал.
3 Ай тутэ, кала поможыс лэ чорорэнди, мэк о лево вас на́ ӷанэн, со терэл о право,
4 кай тири лащи дила тэ терэлпэ чоралэс. И тоди тиро Дад, саво диқэл вся, со терэлпэ чоралэс, блаӷословия тут.
5 Кадяжэ, кала мангэнпэ, на́ андярэн пэс сар двухлични мануша, савэнди чалёл тэ мангэнпэ андэ синагоги и пэ барэ вулицы*, кай лэн тэ диқэл о миро. Чаче ԥэнав тумэнди: лэнди ужэ дорэсляпэ вся и блаӷословения, сави лэнди прижал.
6 Ай ту, кала мангэспэ, зажа андэ пэско цэр*, ԥандав и вудара, и мангпэ тирэ небеснонэ Дадэсти*. И тоди тиро Дад, саво диқэл вся, со терэлпэ чоралэс, блаӷословия тут.
7 Кала мангэнпэ, на́ ԥэнэн ек и ек, сар и мануша анда авэр народоря, савэ гиндон, кай о Дэл ашунэла лэн, если вонэ бут дэна дума.
8 На́ авэн сар кадэла мануша, важ кода кай тумаро Дад ӷанэн, со тумэнди трэбуй, инке жы каринг кода, сар тумэ лэс мангэна.
9 Важ када мангэнпэ кадя:
«Амаро небесно Дад, мэк тиро алав авэл свынто*.
10 Мэк правий тиро Царство. Мэк вся ашэл кадя, сар тути уӷодно, и пэ ԥув, и по небо*.
11 Дэ амэнди котор марно пэ кадэва дес
12 и простисар амэнди амаро вужылимос*, сар и амэ простисардям кодэлэн, ко амэнди вужылэ*.
13 Поможысар амэнди тэ на подаспэ лэ бэзэхэсти и фэрисар амэн лэ Бэнгэстар*».
14 Если тумэ простин кодэлэн, ко стердя бэзэх против тумэндэ, тоди и тумаро небесно Дад простия тумэн.
15 Ай если тумэ на простин кодэлэн, ко стердя бэзэх против тумэндэ, тоди и тумаро Дад на простия тумэнди тумаро бэзэх.
16 Кала ритярэн о посто, старыинпэ тэ следин пала пэстэ, кай тумэ тэ на авэн сар двухлични мануша, савэ ԥирэн помэклэ муеса*, лиш бы о миро тэ диқэл, кай вонэ ритярэн о посто. Чаче ԥэнав тумэнди: лэнди ужэ дорэсляпэ вся и блаӷословения*, сави лэнди прижал.
17 Ай ту, кала ритярэс о посто, мак о шэро вулееса и халав о муй,
18 и ужэ най о миро диқэла, кай ту ритярэс о посто, ай кати тиро небесно Дад*. И тоди тиро Дад, саво диқэл вся, со терэлпэ чоралэс, блаӷословия тут.
19 Парашэн тэ стидэн о барвалимос пэ ԥув, кай лэс можэт тэ похал и моль и тэ римой и ржавчина и кай лэс моӷут тэ чорэн и мануша.
20 Но тидэн о барвалимос по небо, кай лэс на похала и моль и на римоя и ржавчина и каринг на заӷулена и чордэӷаря.
21 Вижал, кай тиро барвалимос, котэ авэла и тиро ди.
22 Лампа важ и тила— када и яқа. Важ када если тирэ яқа диқэн пэ варисо ек*, тоди вся тири тила лэла тэ светийпэ.
23 Но если тирэ яқа завидуин*, тоди вся тири тила авэла тэмно. Ай если о свето андэ тири тила — када тэмнота, тоди пэскати дэ бари кадэя тэмнота!
24 Нико не можэт тэ авэл рабо кай дуй хула́я, важ кода кай или еқэс вэрыцыя, ай аврэс любия, или еқэс кандэла, ай аврэс на шола сама. Тумэ не можэте тэ авэн раборя и лэ Дэвлэсти, и лэ барвалимасти.
25 Важ када мэ ԥэнав тумэнди: парашэн тэ пережываете пала пэстири жызня — со тумэнди тэ хан или со тэ пэн, ай кадяжэ пала пэстири тила — андэр со тэ утидэнпэ. Хэба и жызня най май куч лэ хамастар, ай и тила — ла ӥдатар?
26 Шон сама пэ чирикля: вонэ на сеин, на стидэн о зэрно и никай лэс на гаравэн, но тумаро небесно Дад праварэл лэн. Пэскати жэ тумэ май куч лэндар!
27 Если варико андар тумэндэ лэла тэ пережывает, сможэт во тэ продлий пэстири жызня хоть пэ часостэ*?
28 И пала ӥда состэ пережываете? Диқэн, сар барён и лилии пэ мал. Вонэ на терэн бути и на терэн ҭава,
29 но ԥэнав тумэнди, кай дажэ о царё Саламоно, саво сас фартэ барвало, на утидэласпэ кадя, сар любо андар лэндэ.
30 Если о Дэл кадя утидэл и цвиторя пэ мал, савэ адес исин, ай тэся авэна андо бов, хэба во на утидэла тумэн, ко на допатял*?
31 Кочай никала не пережывайте и на́ ԥэнэн: «Со амэнди тэ хас?», или «Со тэ пас?», или «Со тэ лас пэр пэстэ?»
32 Важ кода кай пала вся када кати и гиндон и мануша анда авэр народоря. Тумаро небесно Дад ӷанэн, кай тумэнди вся када трэбуй.
33 Ни акэ, вся и время стон лэ Дэвлэско Царство и лэско правильно* законо по пэрво ҭан андэ пэстири жызня, и тоди вся када авэла дино тумэнди.
34 Никала не пережывайте пала кода, со авэла тэся, важ кода кай тэся кадяжэ авэла дила, пала сави прижалапэ тэ гиндон. Пэ кажно дес хутилэл пэско ԥаримос.
Сноски
^ Или «наӷрада».
^ Или «пэ вуӷлоря пэ барэ вулицы».
^ Или «пэстири комната».
^ Или «тирэ Дадэсти, савэс нико не можэт тэ диқэл».
^ Или «мэк стон бари патив пэ тиро алав».
^ Или «Стер пэ ԥув вся, со ту камэс, сар када исин по небо».
^ Или «против амэндэ стердя бэзэх».
^ Или «амарэ бэзэха».
^ Ворта «лэ найлашэстар».
^ Или «на следин пала пэско внешнё видо».
^ Или «наӷрада».
^ Или «тиро Дад, савэс нико не можэт тэ диқэл».
^ Или «драго диқэн». Ворта «про́сти».
^ Или «найдраго диқэн». Ворта «вэрыти».
^ Или «би патяимастирэ».
^ Или «справедливо».
