Римо 15:1-33
15 Амэ, састэ мануша, трэбуй тэ поможысарас кодэлэнди, ко би зорэско, и тэ уӷодисарас най кати корко пэсти.
2 Кажно трэбуй тэ уӷодий аврэ манушэнди и тэ терэл лашымос, кай тэ придэл лэнди зор.
3 Дажэ о Христос на старыияспэ тэ уӷодий корко пэсти, сар пистромэ: «Кала пала тутэ найпативалэс дэнас дума, када пэрэ́лас манди».
4 Всаворэ алава лэ Дэвлэстар сас запистромэ, кай амэ тэ ашас годявэрнэ, и амэндэ исин пэр со тэ надеисавас, важ кода кай амэ ашаспэ састэ андэ ԥари время и лас зор, кала адиносарас и Свынти Лила.
5 Мэк о Дэл поможый тумэнди тэ ашэнпэ састэ и тэ лэн зор, и мэ мангав, кай через лэстэ тумэндэ тэ авэл кацаво жэ гиндо, саво сас кай о Христос Исусо.
6 Кадя тумэ авэна еқэ ӷуртоса и андэ ек ӷолосо лэна тэ андярэн лашо алав пэ амарэ Барэ Хуласко лэ Исусос Христоско Дэл и Дад.
7 Важ када анда ди шон сама ек еқэс, сар и о Христос анда ди шутя сама тумэн, и кадя о Дэл ашэл инке май ашунгло.
8 Ԥэнав тумэнди, кай о Христос ашэля слуӷо лэ евреёнэнди. Кадя во сыкадя, кай о Дэл вся и время ԥэнэн чачимос, и потвердисардя, кай о Дэл приритярдёл пэстирэ алавэнди, савэ дя лэндирэ ԥурэнди.
9 Кадяжэ о Христос стердя када, кай и народоря тэ андярэн лашо алав по Дэл важ кода, кай во сас одяло каринг лэндэ, сар пистромэ: «Важ када мэ лава драго тэ дав дума пала тутэ машкар о миро, лава тэ хвалисарав тиро алав андэ дили».
10 И инке котэ ԥэнэнпэ: «Лошавэн, народоря, вместе лэстирэ народоса».
11 Ай кадяжэ: «Андярэн лашо алав по Иегова*, всаворэ народоря, мэк драго дэн дума пала лэстэ всаворэ породы».
12 О Иса́я ԥэнэн: «Котэ авэла лэ Есеёско корнё, кодэва, ко ваздэлапэ, кай тэ хулаий пэ народоря; и народоря лэна тэ надеинпэ пэр лэстэ».
13 Мэк о Дэл, через саво амэ можэм тэ надеисавас, дэл тумарэ одести андэ вся тэ авэл лошало и спокойно, важ кода кай тумэ патян лэсти. Кадя через о свынто зор тумэ лэна инке май састэс тэ надеинпэ.
14 Ԥрала, мэ патяв, кай тумэ камэн тэ терэн лашымос, бут со ӷанэн и можэте тэ сытярэн ек еқэс.
15 Но пала дэсавэ маменторя мэ пистросардэм тумэнди ворта, кай инке еқвар тэ шав сама пэ када. Мэ стердэм кадя, важ кода кай о Дэл здиқля пэр мандэ па пэско баро ковло ди.
16 Мэ лэ Христоско лэ Исусоско рабо важ авэр народоря, кай тэ росԥэнав лэнди лэ Дэвлэстири лащи новость. Мэ терав кадэя свынто дила, кай вонэ тэ авэн уӷодни лэ Дэвлэсти сар жэртва, сави свынцосайля через о свынто зор.
17 Мэ лошало тэ андярав лэ Христостири лэ Исусостири время* и тэ терав лэ Дэвлэстири дила.
18 Мэ на лава тэ росԥэнав, со стердэм екжэно, ай ԥэнава кати пала кода, со мэрнэ зорэса стердя о Христос, кай авэр народоря тэ кандэн лэс. Во терэлас када через мэрнэ алава и через мэрни дила,
19 ай кадяжэ через удивительно дила и чудеса, савэ сас стердэ лэ Дэвлэстирэ зорэса. И мэ стердэм вся, кай тэ росԥэнав и лащи новость пала Христос лэ Иерусалимостар аж жы каринг о Или́рико.
20 Мэ старысававас тэ на росԥэнав котэ, кай пала лэ Христоско алав ужэ ӷанэн, важ кода кай на камавас тэ терав и дила, сави ужэ заля тэ терэл авэр,
21 сар пала када пистромэ: «Касти на ԥэнэнас пала лэстэ, вонэ диқэна, и ко на ашундя, полэна».
22 Акэ васо мандэ бут разоря на вижалас тэ авав каринг тумэндэ.
23 Но акана пэ кадэла краёря мэ ужэ всаворэнди росԥэндэм и лащи новость, тай инке мэ ужэ бут бэрша камав тэ авав тумэндэ.
24 Важ када, кала мэ жава андэ Испа́ния, мэ надеисавав тэ диқавпэ тумэнца и тэ заритярдював тумэндэ, ай потом тумэ набут проандярэна ман.
25 Ай акана мэ тидавпэ тэ жав андо Иерусалимо, кай тэ дав помощь лэ свынтонэнди.
26 И ԥрала андэ Македо́ния и андэ Аха́я сас лошалэ тэ поделинпэ кодэлэса, со лэндэ исин, лэ свынтонэнца андо Иерусалимо, савэ жувэн чорорэс.
27 Кадэла ԥрала сас лошалэ када тэ стерэн, важ кода кай сас вужылэ лэнди. И ԥрала анда Иерусалимо поделисайлэ лэнца пэстирэ лашымаса, саво дя лэнди о Дэл, кочай акана кодэла ԥрала трэбуй тэ поможын лэ ловэнца лэ ԥралэнди андо Иерусалимо.
28 Кала мэ отдава лэнди кода, со сас пэрэдино, мэ ладава андэ Испа́ния и па дром интя амэ тумэнца диқасапэ.
29 Мэ ӷанав, кай пэрэдава тумэнди бут блаӷословении лэ Христостар, кала авава тумэндэ.
30 Ԥрала, амэ патяс андо Баро Хулай андо Исусо Христос и любисарас ек еқэс кадя, сар андярэл о свынто зор, важ када мангав тумэн: всаворэ́ одеса мангэнпэ пала мандэ, сар и мэ када терав.
31 Мангэн лэ Дэвлэс, кай во тэ фэрий ман андэ Иуде́я кодэлэндар, ко на патял андо Исусо, и кай и свынти андо Иерусалимо драго тэ прилэн о подарко, саво мэ лэнди трэбуй тэ пэрэдав.
32 Тоди, если када авэла уӷодно лэ Дэвлэсти, мэ авава каринг тумэндэ и лава тэ лошавав, и амэ придаса зор ек еқэсти.
33 Тэ авэл тумэнца о Дэл, саво дэл мирно жызня. Аминь.
