Тито 1:1-16
1 Мэ, о Павло, лэ Дэвлэско рабо и лэ Исусоско лэ Христоско апостало. Мэ патяв кадя жэ, сар и кодэла, кас витидя о Дэл, и правильно ӷанав о чачимос, саво дэл тэ полас, сар тэ стас бари патив по Дэл.
2 Ай мэ моӷу тэ патяв и правильно тэ ӷанав, важ кода кай надеисавав пэ вечно жызня. Пала кадэя жызня инке андэ дэлмутни время дя алав о Дэл, саво не можэт тэ хохавэл.
3 Кала поджыля и время, о Дэл дя тэ ӷанэн и лащи новость, и во дя манди тэ росԥэнав ла. Кадя закамля о Дэл, саво спасый амэн.
4 Мэ пистросарав лэ Титости, саво манди чаче сар шаво и савэса амэ патяс еқэндар.
Мэк о Дэл, амаро Дад, и о Христос Исусо, саво спасый амэн, здиқэн пэр тутэ па пэско баро ковло ди и дэн мирно жызня.
5 Мэ ашадэм тут по Кри́то, кай ту котэ дэсо тэ подлашарэс и тэ стос андэ кажно форо лэ барэдэрэ ԥралэн, сар мэ тути ԥэндэм.
6 Барэдэр ԥрал можэт тэ авэл кодэва, пала кастэ нинай дош, кастэ ек жувли и кастэ и бэяцэ андярэн лэ Дэвлэстири время и кацавэ бэятонэн на дошалярэса, кай вонэ шалыинпэ и на кандэн.
7 О барэдэр ԥрал диқэл пала лэ Дэвлэстири дила, важ када во трэбуй тэ авэл бидошако, на трэбуй тэ авэл холинако, матимари, на трэбуй тэ тердёл пэ пэско, тэ марэл аврэн* и тэ любий и ловэ*.
8 Во трэбуй тэ шол сама аврэн, тэ любий о лашымос, здраво тэ гиндой, тэ терэл правильно дила, тэ отдэл пэско ди важ авэр, тэ ритярэл пэс андэ вас.
9 Кала во сытярэл аврэн, во трэбуй састэс тэ приритярдёл лэ чачунэ алавэсти, саво жал лэ Дэвлэстар. Кадя во лэла най кати тэ придэл зор, кала правильно сытярэл, но и тэ лажаварэл кодэлэн, ко сытярэл аврэсти.
10 Важ кода кай исин бут мануша, савэ зваздэнпэ пэ авэр, евья марэн ла шыбаса и обдилярэн, и со май бут кацавэ исин машкар кодэла, ко ԥэнэн, кай трэбуй тэ опшындён.
11 Кацавэ манушэн трэбуй тэ застависарас тэ ашэн мулком, важ кода кай вонэ розмарэн и еря, кала важ пэстири выӷода сытярэн кодэлэсти, сости на трэбуй.
12 Ек андар лэндэ, лэнго жэ особо мануш, ԥэндя: «И критяноря — вечни хохавнэ, дыки зверёря, каштунэ хавджялэ».
13 И када чачимос. Важ када строӷо лажавар лэн, кай вонэ инке май састэс тэ патян и
14 будэр тэ на шон сама пэ иудейски сказки и по законо лэ манушэндар, савэ одбанделэ лэ чачимастар.
15 Важ и мануша, савэ уӷодни лэ Дэвлэсти, вся вужо, ай важ и мэлалэ* и важ кодэла, ко на патял, нинай нисо вужо, важ кода кай лэндири годи и лэнго ди мэлало.
16 Вонэ ԥэнэн, кай ӷанэн лэ Дэвлэс, но пэ дила сыкавэн, кай отԥэндён лэстар, важ кода кай лэндар гряца, вонэ найкандинэ и на ӷодинпэ ни пэ сави лащи дила.
Сноски
^ Или «тэ розмэкэл пэстирэ вас».
^ Или «тэ авэл чорымаско каринг о хохавно затеримос».
^ Ворта «маӷримэ».
