ТЕМА ПА ОБЛОЖКА | ЛЭ ДЭВЛЭСКО ЦАРСТВО. САВО ЛАШИМОС ВО АНЭНА ТУМЭНДИ?
Лэ Дэвлэско Царство. Васо во сас куч лэ Иисусости?
Кала о Иисусо служыяс пэ ԥув, во бут пала со дэлас дума лэ манушэнца. Во сытярэлас пэстирэ учениконэн, сар тэ мангэнпэ, сар тэ уӷодин лэ Дэвлэсти и сар тэ виарақэн и чачуни бах (Матфея 6:5—13; Марка 12:17; Луки 11:28). Но пала дума, пала сави о Иисусо со май часто дэлас дума и сави сас со май пашэ лэстирэ одести, када пала лэ Дэвлэско Царство (Луки 6:45).
Сар ужэ ԥэнэнаспэ андэ статья, сави прожылям, о Иисусо вся пэстири жызня стодя, кай тэ росԥэнэн «радосно новость важ лэ Дэвлэско царство» (Луки 8:1). Во прожыля вся израильско ԥув, кай тэ росԥэнэн лэ манушэнди важ лэ Дэвлэско Царство. Андэ штар книӷи, кай пистромэ пала лэ Иисусостири служэния, пала Царство ԥэнэнпэ май бут чем 100 раз, и май часто всаворэстар када сас андэ лэ Иисусостири дума. Но када всаек кати набут кода, скати во дэлас дума пала лэ Дэвлэско Царство! (Иоанна 21:25).
Васо лэ Дэвлэско Царство сас кадя куч лэ Иисусости? Во ӷанэнас, кай о Дэл лэс витидя, кай во тэ авэл Правителёса андэ кадэва Царство (Исаия 9:6; Луки 22:28—30). Во бут со терэлас важ о Царство, но най важ кода, кай камэлас пэсти власть или слава (Матфея 11:29; Марка 10:17, 18). Кадяжэ о Иисусо на гиндояс пала пэстири выӷода. Лэ Дэвлэско Царство сас куч лэ Иисусости. О Иисусо и акана a лэс фартэ цэний, важ кода кай через о Царство во сможэт бут со тэ стерэл важ кодэла, кас во любий: важ пэско небесно Дад и важ пэстирэ предани ученикоря.
СО О ЦАРСТВО СТЕРЭЛА ВАЖ ЛЭ ИИСУСОСКО ДАД?
О Иисусо фартэ любий пэстирэ Дадэс (Притчи 8:30; Иоанна 14:31). Лэсти фартэ чалёл лэско райкано характеро. Лэ Иисусости чалёл лэстири любовь, сар во жалуий и справедливость (Второзаконие 32:4; Исаия 49:15; 1 Иоанна 4:8). И канешно жэ, лэ Иисусости фартэ на чалёл о хохаимос, саво дэн дума важ лэско Дад. О хохаимос андэ кода, кай кабута лэ Дэвлэсти всаек, кай кай и мануша ԥаримос и кай о Дэл камэл, кай амэ тэ страдаем. Када ек, васо о Иисусо пристолас бут зор, кай тэ росԥэнэн важ о Царство. О Иисусо ӷанэнас, кай прожала время и о Царство стерэла кадя, кай пала Дэл упалэ лэна тэ дэн дума ек о лашымос (Матфея 4:23; 6:9, 10). Сар када авэла?
Через о Царство о Иегова бут со парувэла, кай всаворэ манушэнди тэ авэл драго. «Во виқосэла всаворэ ясва» па яқа кай пэстирэ служытеля. О Иегова улэла кода, состар и мануша ровэнас, и стерэла кадя, кай и «смэрть будэр на авэла, нисави бида, ни дук будэр на авэла» (Откровение 21:3, 4). Через о Царство о Дэл улэла всаворэ биды и о ԥаримос b.
Най удивидельно, кай о Иисусо пристолас бут зор, кай тэ росԥэнэн лэ манушэнди пала Царство! Во ӷанэнас, кай через о Царство всаворэ полэна, пэскати лэско Дад зорало и саво во одяло (Иакова 5:11). О Иисусо кадяжэ ӷанэнас, кай о Царство парувэла лэ манушэндири жызня андэ лащи риг. И жызня парудёла кодэлэндэ, кас во любий, ай када и мануша, савэ верно служын лэ Дэвлэсти.
СО О ЦАРСТВО СТЕРЭЛА ВАЖ ЛЭ ДЭВЛЭСТИРЭ СЛУЖЫТЕЛЯ?
Инке жы каринг кода, сар о Иисусо тэ авэл пэ ԥув, во долӷо жувэлас пэстирэ Дадэса по нэбо. Через о Иисусо о Дэл создал вся. И амэн лэл лэ одестар: и звёзды, савэ фартэ бут, ӷалактики и амари ԥув (Колоссянам 1:15, 16). Но со май фартэ «[лэ Иисусости] сас куч и мануша» (Притчи 8:31).
Андэ лэ Иисусостири служэния дицолас и любовь каринг и мануша. Во сразу дя тэ полэн, кай во авеля пэ ԥув тэ росԥэнэн и лащи новость всаворэнди, ко андэр латэ нуждался (Луки 4:18). О Иисусо най кати ԥэнэнас, кай поможыя, во кажно дес пэ дила сыкавэлас пэстири любовь. Кала тидэнаспэ толпаса тэ ашунэн лэс, лэсти ашэлас «лэн жалко, и во» исцэлияс лэ насвалэн (Матфея 14:14). Кала о мурш, саво мучияспэ фартэ ԥарэ насвалимаса, ԥэндя, кай если о Иисусо кати закамэла, во сможэт лэс тэ исцэлий. О Иисусо притэлеля каринг кадэва мануш и анда ди ԥэндя лэсти: «Камав, исцэлисав» (Луки 5:12,13). Кадя о мануш сыкадя, кай патял андо Иисусо. Кала о Иисусо додиқля ла Мария, сави сас бидаса умарди, важ кода кай лако ԥрал о Лазарё муля, «во ԥарэс сԥурдя, и лэсти ашэля фартэ нэспокойно по ди» и кай о Иисусо «линэ тэ питян и ясва» (Иоанна 11:32—36). Потом во стердя кацаво, со никала на терэлас, во васкресил лэ Лазарёс, хоть во сас муло ужэ штар дес! (Иоанна 11:38—44).
О Иисусо, канешно, ӷанэнас, кай кацави помощь, када най пэ долӷонэстэ. Во полэлас, кай всаек всаворэ, кас во исцэлисардя, всаек насвавэна, и кас во васкресил всаек мэрэна. О Иисусо драго ӷанэнас, кай лэ Дэвлэско Царство навсегда улэла о насвалимос и смэрть. Кочай во най кати терэлас чудеса, но и анда вся оди росԥэнэнас «и лащи новость пала Царство» (Матфея 9:35). Кода, кай о Иисусо терэлас чудеса, во сыкадя, со ӥто стерэла лэ Дэвлэско Царство па вся и ԥув. Диқэн, со пала када пистромэ андэ Библия.
На авэла насвалимос.
«Тоди корэ лэна тэ диқэн, и кашукэ лэна тэ ашунэн. Тоди кодэва, ко лангал, лэла тэ прастэл, сар о оленё, И кодэва, ко муто, лэла радосно тэ цэпий». Ай инке «нико анда мануша, савэ катэ жувэн, на ԥэнэна: „Мэ насвало“» (Исаия 33:24; 35:5, 6).
На авэла смэрть.
«Кодэлэнди, ко кандэн лэ Дэвлэс, ашэлапэ и ԥув и вонэ жувэна пэр латэ вечно» (Псалом 37:29).
«Во улэла и смэрть пэ вся и вечность, и о Владыка Ӷосподо Иегова виқосэла всаворэ ясва» (Исаия 25:8).
Кодэла, ко мулинэ, ринапэ каринг и жызня.
«Всаворэ, ко мулинэ, ашунэна лэско ӷолосо и ущена» (Иоанна 5:28, 29).
«Мэ надеисавав по Дэл, сар и вонэ надеинпэ, кай жундёна кодэла, ко терэлас правильно и ко терэлас нэправильно» (Деяния 24:15).
Всаворэндэ авэна цэра и бути.
«И мануша лэна тэ строин и цэра и тэ жувэн андэр лэндэ, авэна тэ барярэн и винаӷрадникоря и тэ хан о винаӷрадо. На авэла кадя, кай вонэ строина, ай жувэла авэр, вибарярэна, ай хала авэр. ...И кодэла, кас мэ витидэм, авэна лошалэ кодэлэстар, со терэна пэстирэ вастэнца» (Исаия 65:21, 22).
На авэна войны.
«Во терэл кадя, кай тэ парашэн и войны па вся и ԥув» (Псалом 46:9).
«И народоря на жана ек пэ еқэстэ лэ мечоса и на лэна будэр тэ сытён тэ марэнпэ, кай тэ жан пэ война» (Исаия 2:4).
На авэла боқалимос.
«И ԥув дэла пэско уражаё, о Дэл, амаро Дэл, блаӷословия амэн» (Псалом 67:6).
«Пэ ԥув авэла бут марно, упрэ пэ плая, лэс авэла ԥэрдо» (Псалом 72:16).
Будэр нико на жувэла чорорэс.
«Лэ чорорэн на лэна тэ бистрэн» (Псалом 9:18).
«Во спасыя лэ чорорэн, савэ мангэн и помощь, кодэлэн, касти ԥарэс по ди и всаворэн, касти на́й ко тэ поможый. Во жалуия лэ чорорэс и кодэлэс, ко мангэл и спасыя лэ чорорэндирэ жызни» (Псалом 72:12, 13).
Кала амэ адиносарас кадэла алава, амэ полас, васо важ о Иисусо кадя фартэ куч лэ Дэвлэско Царство. Кала во сас пэ ԥув, во камэлас, кай всаворэ тэ ӷанэн пала кадэва Царство и кочай во росԥэнэнас пала лэстэ. Во камэлас, кай и мануша, савэ камэнас лэс тэ ашунэн, тэ уӷанэн, кай лэ Дэвлэско Царство улэла вся о ԥаримос.
Ай тут лэл лэ одестар и библейски обещянии пала кода, со стерэла лэ Дэвлэско Царство? Тоди можэт ту камэс май бут пала кадэва Царство тэ уӷанэс? Ай кадяжэ тэ уӷанэс, со трэбуй тэ терэс, кай тутэ тожэ тэ авэл о лашымос, саво анэна кадэва Царство? Пала када ту сможэш тэ уӷанэс андэ послиднё статья.
a Андэ кадэя статья пала Иисусо дэлпэ дума кабута во жундо. Ай када кадя и исин. О Иисусо жундо и во находийпэ по нэбо. Кодэла времятар, сар о Иисусо рисайля по нэбо, о Царство кадяжэ фартэ пашэ лэстирэ одести (Луки 24:51).
b Пала кода, васо о Дэл пэ дэсави время домэкэл, кай кай и мануша тэ авэл ԥаримос, можно тэ уӷанэн андэ 11 ӷлава андэ книжка «Сости сытярэл и Библия». Ла вимэклэ лэ Иеговастирэ свидетеля. Кадяжэ кадэя книжка исин по сайто www.ps8318.com/rmv.
