Mintizro ya Vapostola 5:1-42
5 Nambitanu, wanuna mun’we lweyi a vitaniwaka Ananiya, kun’we ni nsati wake Safira, va xavise mbangu wa kukazri lowu a wu va lumba.
2 Kambe Ananiya a pambule mali ya kukazri a yi tlhota, leswo swi ve swi tiviwa ni hi nkatake, kutani a teka leyi saliki a ya yi nyikela ka vapostola.
3 Kambe Petro a mu vutisa a ku: “Ananiya, ha yini u pfumelele Sathana a ku hlohlotela kuva u hembela moya wa ku xwenga ni ku tlhela u pambula mali ya kukazri ya mbangu lowu u wu xavisiki u yi tlhota?
4 Na u nga si na wu xavisa mbangu lowo a wu nga li waku? Nakone ntsrhaku ka loko u wu xavisile, a mali a yi nga li yaku? Ha yini u pimise ku yentxa mintxhumu ya ku biha ya ku fana ni leyi? Phela a wu hembelanga vhanu, u hembele Xikwembu Nkulukumba.”
5 Loko Ananiya a twa leswo, a wa hansi a fa. Hinkwavu lava twiki leswo va txhava ngopfu swinene.
6 Kutani ku sekeleka madjaha ma mu tsrondzriyela hi tipanu, ma huma na yene ma ya mu lahla.
7 Ntsrhaku ka loko ku khalute kolomu ka mawora mazrazru, ku nghene nsati wake, na a nga swi tivi leswi yentxekiki.
8 Petro a mu vutisa a ku: “Ni byeli, leyi hi yo mali hinkwayu ya mbangu lowu mi wu xavisiki?” Yene a mu hlamula a ku: “Ina, hi xavise hi mali yoleyo.”
9 Xileswo Petro a ku: “Ha yini mi pfumelelane ku dzringa moya wa Yehovha? Wa swi twa! Lava yiki lahla nkataku va kola nyangweni, swoswi va ta zrwala wene.”
10 A tekela ku wa hansi a fa mahlweni ka Petro. Loko madjaha wolawo ma nghena ma kuma leswaku a file, ma mu tlakula ma famba na yene ma ya mu lahla a tlhelweni ka nuna wake.
11 Kutani a bandla hinkwadzru ni hinkwavu lava twiki mhaka leyo, va txhava ngopfu swinene.
12 Handle ka leswo, a vapostola a va ya mahlweni va yentxa mahlolana ni swihlamaliso a vhanwini, nakone hinkwavu a va tlhangana mbangwini lowu vitaniwaka Ndlela ya Solomoni.
13 Nakunene, a nga kone ni mun’we ka lavan’wana a viki ni xixixi xa ku tipatsra na vone, nambitanu a vhanu a va vulavula ha hombe ha vone.
14 Handle ka leswo, ku yengeseleke vavanuna ni vavasati vavanyingi lava a va pfumela ka Hosi.
15 Va patsre ni ku buyisetela timbabyi a tindleleni letikulu va ti lata ka swibedwana ni ka tinkuku, akuva loko Petro a khaluta, van’we vavu va kota ku hanyisiwa nambi ku ngo va ntsena hi ku funeketiwa hi xintsrhuti xake.
16 A ku tlhasetela ni switsrhungu leswi a swi huma ka madoropa ya le kusuhi ni Yerusalema, na swi buyisa timbabyi ni vhanu lava kazratiwaka hi mademona, kutani hinkwavu a va hanyisiwa.
17 Kambe a muprista lwenkulu ni hinkwavu lava a va li na yene, lava a va li va ntlawa wa Vasaduki, va sekeleka na va tale hi matsrhoho.
18 Kutani va khoma vapostola va ya va pfalela djele.
19 Kambe ni wusiku, a ntsrumi ya Yehovha yi pfula swipfalu swa djele, yi va humesa handle yi gama yi ku:
20 “Fambani mi ya yima tempeleni mi ya mahlweni mi byela vhanu mintxhumu hinkwayu mayelanu ni wutomi lebyi taka.”
21 Ntsrhaku ka ku twa leswo, va nghene tempeleni na bya ha ku xa va sungula ku dondzrisa.
Loko muprista lwenkulu ni lava a va li na yene va tlhasa, va vitana Sanedri kun’we ni vakulukumba hinkwavu va tiko dzra Israyele, kutani va zruma valaveleli leswaku va ya djele va ya teka vapostola va buya navu.
22 Kambe loko valaveleli va tlhasa djele a va va kumanga. Xileswo va tlhela, va tlhasa va va dzrungulela
23 va ku: “A djele hi dzri kume na dzri khiyiwe ha hombe, na vo valaveleli hi va kume na va yime tinyangweni, kambe loko hi pfula a hi kumanga mhunu ndzreni.”
24 Loko muzrangeli wa tempele kun’we ni vaprista lavakulu va twa leswo, va kazrateka hi leswaku a ku ta yentxeka yini.
25 Kambe ku tlhasa mhunu wa kukazri a va byela a ku: “Vavanuna lava mi va pfaleliki djele, va le tempeleni va dondzrisa vhanu.”
26 Kutani a muzrangeli ni valaveleli vake, va va yela va ya va teka kambe na va nga yentxi hi ku va lwisa, hikusa a va txhava ku khandliwa hi mazribye.
27 Xileswo va buya na vone va tlhasa va va yimisa mahlweni ka Sanedri. Kutani a muprista lwenkulu a va hamba swivutiso
28 a gama a ku: “Hi mi byele hi ku kongoma hi ku mi nga ha dondzrisi hi vito ledzri, kambe vonani leswi, mi tate Yerusalema hi tidondzro tenu, nakone mi tiyimisele ku hi zrwexa nandzru wa ngati ya wanuna lweyi.”
29 Petro ni vapostola lavan’wana va va hlamula va ku: “Hi fanela ku yingiseta Hosi Xikwembu Nkulukumba ku tlula vhanu.
30 Xikwembu Nkulukumba wa vakokwana vezru a pfuxe Yesu, lweyi n’wine mi mu dlayiki hi ku mu hayeka mhandzrini.*
31 Xikwembu Nkulukumba a mu tlakuxile a mu beka vokweni dzrake dzra xinene, swanga Muzrangeli wa wutomi ni Muhuluxi, akuva a nyika Israyele mukhandlu wa kuva a tisola, ku yentxela leswaku a dzrivaleliwa swidoho.
32 Nakone hine ni moya wa ku xwenga lowu Xikwembu Nkulukumba a wu nyikaka lava mu yingisetaka swanga Hosi, hi timboni ta mintxhumu leyi.”
33 Loko va twa leswo, va hlundzruka ngopfu swinene lakakuva va djula ni ku va dlaya.
34 Kambe Mufarisi wa kukazri lweyi a vitaniwaka Gamaliyele, lweyi a a li mudondzrisi wa Nawu lweyi a hloniphiwaka hi vhanu hinkwavu, a sekeleka a Sanedri a leleta leswaku vapostola va humesiwa handle swa nkamanyana.
35 A gama a va byela a ku: “Vavanuna va Israyele, tivonelani ka leswi mi djulaka ku va yentxa swone vavanuna lava.
36 Hi xikombiso, ku ke ku va ni wanuna lweyi a a vitaniwa Tewudasi lweyi a a ku yene i mhunu wa lisima, nakone a landzreliwe hi vavanuna vavanyingi, kolomu ka 400 wa vone. Kambe a game a dlayiwa, kutani lava a va mu landzrela va hangalaka, a makungu yavu ma nga pfuni ntxhumu.
37 Ntsrhaku kwake ku ve na Yudasi wa Mugalileya, lweyi a humeleliki hi masiku ya ku tsralisa vhanu a va a hlohlotela vhanu leswaku va mu landzrela. Wanuna yelweyo na yene a file nakone hinkwavu lava mu landzreliki va hangalakile.
38 Xileswo ka mhaka leyi, na mi byela: Mi nga tinghenisi ka timhaka ta vavanuna lava, kambe va tsrhikani. Hikusa loko nkongometo wavu kumbe ntizro wavu wu li wa vhanu, a wu nge ti tlhaveliwa hi dambu;
39 kambe loko wu li wa Xikwembu Nkulukumba, a mi nge ti swi kota ku va tsrhikisa. Tivonelani hikusa mi nga ha tikuma na mi lwa na Xikwembu Nkulukumba hi ku kongoma.”
40 Xileswo va yingiseta xitsratsriyo xake, kutani va vitana vapostola va va ba, va tlhela va va byela leswaku va tsrhika ku vulavula hi vito dzra Yesu, va gama va va tsrhika va famba.
41 Xileswo va huma Sanedri na va nyonxile, hi leswi va viki ni ndjombo ya ku xanisiwa hi kola ka vito dzra Yesu.
42 Nakone siku ni siku a va nga tsrhiki ku dondzrisa ni ku twalisa madzrungula lamanene mayelanu na Kriste Yesu, a tempeleni ni hi muti ni muti.
Tintlhamuxelo ta le hansi
^ Kumbe: “nsinyeni”.
