Mpfuletelo Lowu Yamukeliwiki Hi Yohane 18:1-24
18 Ntsrhaku ka leswo, ni vona ntsrumi yin’wana na yi xika hi le tilweni na yi ni wulawuli lebyikulu, a ku phatima ka yone ku vaningela misava.
2 Kutani yi huwelela hi zritu ledzrikulu yi ku: “A wile! A wile Babilona Lwenkulu, nakone a ndzruluke kaya dzra mademona ni mbangu lowu mimoya hinkwayu leyi kalaka yi nga basanga kun’we ni tinyanyana leti kalaka ti nga basanga nakone ti nyenyiwaka swi tumbelaka ka wone!
3 Hikusa a popswise matiko hinkwawu hi vhinyu, ku nga ku navela kwake ka ku yentxa swa tingana hi tlhelo dzra tinkuku, nakone a tihosi ta misava ti yentxe swa tingana hi tlhelo dzra tinkuku na yene, ni vaxavisi* va le misaveni va ndzruluke swipfundzri hi mhaka ya mintxhumu ya yinyingi ya ku dula leyi hlengeletiwiki hi wansati lweyi, nakone a nga na tingana hi ku va a hlengeletela mintxhumu yoleyo.”
4 Kutani ni yingela zritu dzrin’wana na dzri pfa hi le tilweni dzri ku: “Humani kwake vhanu vanga, loko mi nga djuli ku hlengela ka swidoho swake, ni loko mi nga djuli ku weliwa hi makhombo lawa ma taka mu wela.
5 Hikusa a swidoho swake swi tale lakakuva swi tlhasa ni le tilweni, nakone Xikwembu Nkulukumba a ta mu yavanyisa hi kola ka mintxhumu ya ku biha leyi a yi yentxiki.
6 Mu tlheliselani wubihi lebyi a byi yentxeliki van’wana, futsrhi mu tlheliselani hi lani ku phindhiwiki kabidzri; ka kopo ledzri a lulamiseliki swa ku nwa ka dzrone, na yene mu lulamiselelani hi lani ku phindhiwiki kabidzri.
7 Mu xanisani mi tlhela mi mu vangela nkosi hi ku ya hi mpimu lowu a titwalisiki ha wone a tlhela a hanya hi mintxhumu ya yinyingi leyi a kalaka a nga na tingana hi ku va a yi hlengeletile. Hikusa a tsrhamela ku tibyela leswi a mbilwini yake: ‘Ni hosi ya xisati leyi nga xiluvelweni nakone a ni feliwanga hi nuna, futsrhi a ni nge ti txhuka ni ba nkosi.’
8 Hi leswo swi taka yentxa leswaku a makhombo yake ma mu tela hi siku dzrin’we, ku nga lifu, nkosi ni ndlala, nakone a ta hisiwa hi ku helela hi ndzrilo, hikusa Yehovha Xikwembu Nkulukumba lweyi a mu yavanyisaka, a ni ntamu.
9 “A tihosi ta misava leti yentxiki swa tingana hi tlhelo dzra tinkuku na yene, nakone ti hanyiki na yene hi mintxhumu ya yinyingi leyi a kalaka a nga na tingana hi ku va a yi hlengeletela, ti ta dzrila ti tlhela ti xukuvala loko ti vona ximusi nkama lowu a hisiwaka.
10 Ti ta yima hi le kule hi ku txhava ku xanisiwa kwake, ti ku: ‘Yowee, yowee, doropa ledzrikulu, wene Babilona doropa dzra ntamu, hikusa a ku yavanyisiwa kwaku ku ve ka xitxhuketa!’
11 “Na vone vaxavisi va le misaveni va le ku dzrileni va tlhela va mu bela nkosi, hikusa a ka ha na mhunu lweyi a nga xavaka mintxhumu yavu hinkwayu leyi va yi xavisaka,
12 ina, a ku na mhunu lweyi a taka xava mintxhumu yavu hinkwayu ya woru, ya prata, mazribye ya lisima, maperola, panu ya lisima,* mpahla ya muvala wa vhiyoleta, ya seda, ni ya ku pshwuka; ni mintxhumu hinkwayu leyi hambiwiki hi xigodo xa ku nun’hwela, leyi hambiwiki hi matinyo ya ndlofu, xigodo xa lisima, kobri, nsimbi, ni mazribye lawa ma nga ni mivala ya ku siyanasiyana;
13 ku patsra ni kanela, matemperu ya le Índia, muzri wa ku nun’hwela, mafuzra ya ku nun’hwela, olibanu,* vhinyu, mafuzra ya minhlwazri, mapa lamanene, trigu, tihomu, tihamba, makavhalu, tin’qolo, swikazrawa, ni wutomi bya vhanu.
14 Ina, a mintxhumu ya yinene leyi u yi naveliki yi ku helelile, ni mafehlefehle hinkwawu kun’we ni mintxhumu ya ku phatima yi ku lahlekelile, u nge he txhuki u yi kuma.
15 “A vaxavisi lava xavisaka mintxhumu leyi, nakone va viki swipfundzri hi mhaka yake, va ta yima hi le kule hi ku txhava ku xanisiwa kwake, va dzrila va ba ni nkosi,
16 va ku: ‘Yowee, yowee, doropa ledzrikulu, ledzri yambaliki panu ya lisima* ni mpahla ya muvala wa vhiyoleta, dzri tlhela dzri tixongisa hi woru, mazribye ya lisima ni maperola, hi ndlela leyi kombisaka leswaku dzri ganyile,
17 hikusa a wupfundzri lebyo lebyikulu byi nyamalale hi xitxhuketa!’
“Nakone a vakongomisi hinkwavu va maboti, vhanu hinkwavu lava yendzraka hi maboti, vaweti kun’we ni vhanu hinkwavu lava tihanyisaka hi ku tizrela a lwandle, va ta yima hi le kule
18 va bandlukana na va lavisa ximusi xa ku hisiwa kwake va ku: ‘A ku na doropa ledzri fanaka ni doropa ledzri ledzrikulu.’
19 Va titxhela ntsrhuzri a tinhlokweni tavu, va bandlukana na va dzrila va ba ni nkosi va ku: ‘Yowee, yowee, doropa ledzrikulu, ledzri vhanu hinkwavu lava a va ni maboti a lwandle va viki swipfundzri hi mhaka ya wupfundzri bya dzrone, hikusa dzri nyamalale hi xitxhuketa!’
20 “Nyonxani n’wine matilo na n’wine vaxwengi, kun’we na n’wine vapostola ni vaprofeta, hi mhaka ya leswi swi mu yentxekeliki, hikusa Xikwembu Nkulukumba a mu yavanyise hi mhaka ya leswi a mi yentxiki swone!”
21 Kutani a ntsrumi ya ntamu yi tlakula zribye dzra ku fana ni zribye dzra ku sila hi dzrone yi dzri txukumetela a lwandle, yi ku: “Babilona doropa ledzrikulu a ta txukumeteliwa hansi hi ndlela leyi, nakone a nge he ti txhuka a kumiwa.
22 Futsrhi kwaku a ku nge he ti txhuka ku yingeliwa mpfumawulu wa lava va yimbelelaka na va landzrelela xitende.* Ni vatxhayi va switiloti,* vatxhayi va swipalapala,* kun’we ni vayimbeleli van’wana, ni lava va yentxaka mintizro ya mavoko a va nge he ti txhuka va kumiwa kwaku, ni mpfumawulu wa zribye dzra ku sila hi dzrone a wu nge he ti txhuka wu yingeliwa kwaku.
23 A ka ha na livaningu ledzri taka txhuka dzri ku vaningela, nakone a ka ha na zritu dzra muteki kumbe mutekiwa ledzri taka txhuka dzri yingeliwa kwaku, hikusa a vaxavisi vaku a va li vhanu va xiyimu xa le henhla a misaveni nakone a matiko hinkwawu ma hambukisiwile hi kola ka mintizro yaku ya wungoma.
24 Ina, kwake ku kumiwe ngati ya vaprofeta ni ya vaxwengi, kun’we ni ya hinkwavu lava dlayiwiki hi ndlela ya nsele a misaveni.”
Tintlhamuxelo ta le hansi
^ Kumbe: “vaxavisi lava fambafambaka”.
^ Kumbe: “panu leyinene ya linyu”.
^ A olibanu i muzri wa ku basa lowu phatimaka nakone wa nun’hwela loko wu hisiwa.
^ Kumbe: “panu leyinene ya linyu”.
^ Kumbe: “arpa”.
^ Kumbe: “maflawuta”.
^ Kumbe: “matrombeta”.
