Nawume 3:1-19
3 Khombo ka doropa ledzri vhanu va kone va dlayaka van’wana!*
Dzri tale hi wukanganyisi ni wuyivi.
A dzri tsrhami na dzri nga na leswi dzri swi phangiki!
2 Ku twala mpfumawulu wa swisepu, pongwe dzra maroda,Makavhalu lawa ma tsrutsrumaka ni tin’qolo ta yimpi leti ntlulantlulaka.
3 Vhanu lava fambaka hi makavhalu, swipada leswi phatimaka, matlhazri lawa ma hatimaka,Vafi va ntsrandzravahlayi, tinhulu ta mintsrumbu,Lava fiki a va konteki.
A vhanu va tsrhamela ku titlirinya hi vafi.
4 Leswo swi vangiwa hi kola ka swiyentxo swinyingi swa wunghwavana byake,I nghwavana leyi kokaka matihlo nakone yi xongile,Wansati lweyi a nga muloyi, a phasa matiko hi wunghwavana byake ni mindangu hi wuloyi byake.
5 “Wa swi twa! Ni lwisana na wene,”* ku hlaya Yehovha wa makhandzra,“Ni ta ku txengula saya dzri ya funeketa wuso byaku;Ni ta yentxa leswaku a matiko ma ku hlalela,Ni mimfumu yi vona tingana taku.
6 Ni ta ku txhela hi nsilaNi ku yentxa u va lweyi a dzrelekaka;Ni ta ku yentxa xihlekiso vhanwini.
7 Hinkwavu lava taka ku vona va ta tsrutsruma va va va ku:‘Ninivha a hohlotiwile!
I mani lweyi a taka mu twela wusiwana?’
Ni ta va kuma kwini vhanu va ku ku txhavelela?
8 Xana wene wa yampswa ku tlula Noamoni,* lweyi a tsrhamaka kusuhi ni mati ya Nilo?
A ku ni mati matlhelweni kwake;A wukosi byake a ku li lwandle, ni muru wake a ku li lwandle.
9 A ntamu wake lowu nga pimekiki a a wu kuma a Etiyopiya ni le Egipta.
A a pfuniwa hi Puti ni vhanu va le Libiya.
10 Kambe nambi ku li Noamoni a yentxiwe xikazrawa;A yisiwe wukazraweni.
A vanake va gavangeliwile a makhoneni ya tindlela hinkwatu.*
Ku hambiwe mpshwampshwa* akuva ku hlawuliwa ka vavanuna vake lava nga ni ndhuma,Nakone vavanuna vake hinkwavu va lisima va khomiwe va tsrimbiwa hi matxhini.
11 Na wene u ta popswa;Swi ta djula kuva u tumbela.
U ta djula mbangu wa ku tumbela nala waku.
12 A mimbangu yaku hinkwayu leyi tiyisiwiki yi fana ni minsinya ya nkuwa leyi nga ni mihandzru ya ku sungula leyi wupfiki;Loko wo za u yi hlakahla, a mihandzru ya yone yi wela minon’wini ya va di lava nga ni ndlala.
13 Wa swi twa! A masotxha yaku ma fana ni vavasati lava nga makazri kwaku.
A tinyangwa ta tiko dzraku ti ta tsrhama na tipfulekele valala vaku.
A swa ku khiya ha swone swa tinyangwa taku swi ta hisiwa hi ndzrilo.
14 Kelela mati akuva u ta ma tizrisa loko u tsrandzreliwile!
Tiyisa makhumbi ya muru.
Nghena ntsrokolweni u pfuva vumbaU va u hamba switini;
15 Nambitasu, a ndzrilo wu ta ku helisa.
U ta dlayiwa hi xipada.
U ta helisiwa hi ku helela ku fana ni ndlela leyi a swintetana swi detetelaka swibewu ha yone.
Yentxa leswaku a vhanu vaku va tala ku fana ni swintetana!
Yentxa leswaku va tala ku fana ni mintete!
16 U yentxe leswaku vaxavisi vaku va yandzra ku tlula tinyeleti ta le matilweni.
A swintetana swi titetevula swi haha,
17 A vazrindzri vaku va fana ni mintete,A vazrangeli vaku va fana ni mintlawa ya mintete.
Hi masiku ya ku titimeta yi tumbela ka mimbhovo ya muru,*Kambe loko dambu dzri vaninga yi huma yi hahaA ku na lweyi a swi tivaka leswaku yi ya kwini.
18 A vabyisi vaku va khutsriyela, We hosi ya Asiriya;A vhanu vaku va xiyimu lexi tlakukiki va tama va tsrhamisa a tindlwini tavu.
A vhanu vaku va hangalasiwe a tinhaveni,Nakone a ku na lweyi a va hlengeletaka.
19 A wu nge ti ntsrhunxeka ka mahlomulo yaku.
A xilondzra xaku a xi daheki.
Hinkwavu lava taka twa madzrungula mayelanu na wene va ta ba mavoko;Hikusa i mani lweyi a kalaka a nga xanisekanga hi kola ka wubihi byaku lebyi kalaka byi nga heli?”
Tintlhamuxelo ta le hansi
^ Hi ku kongoma: “ledzri halataka ngati”.
^ Ku hlayiwa Ninivha.
^ Ku hlayiwa Tebesi.
^ Hi ku kongoma: “a tinhlokweni ta tindlela hinkwatu”.
^ Kumbe: “wuhlolotwana”.
^ Kumbe: “ka mimbhovo ya mazribye”.
