Papela ledzri yaka ka Varoma 15:1-33
15 Kambe hine hi tiyiki hi fanela ku tiyiselela ku tsrana ka lava kalaka va nga tiyanga, a hi fanelanga hi yentxa leswi taka nyonxisa hine ntsena.
2 Mun’wana ni mun’wana wezru a fanela ku tikazratela ku nyonxisa mhunu mun’wana ni ku mu yentxela leswinene akuva a mu tiyisa.
3 Hikusa nambi ku li Kriste a nga tinyonxisanga, kambe hi lani swi tsraliwiki ha kone: “A swizruku swa lava ku zrukaka swi wela henhla kwanga.”
4 Hikusa mintxhumu hinkwayu leyi tsraliwiki khale a Matsralweni yi tsraleliwe ku dondzrisa hine, akuva hi ta va ni dumbo hi kola ka ku tiyisela kwezru ni hi ntxhavelelo lowu Matsralwa ma hi nyikaka wone.
5 Ingiki Xikwembu Nkulukumba lweyi a nyikanaka ku tiyisela ni ntxhavelelo a nga mi pfuna ku va ni mayanakanyela ya ku fana ni lawa Kriste Yesu a a li na wone,
6 akuva hi wumun’we ni hi zritu dzrin’we* mi dzrumisa Xikwembu Nkulukumba Papayi wa Hosi yezru Yesu Kriste.
7 Xileswo yamukelananani,* ku fana ni leswi Kriste a mi yamukeliki, akuva ku dzrumisiwa Xikwembu Nkulukumba.
8 Hikusa na mi byela leswaku Kriste a ve nandzra wa Vayuda akuva a kombisa leswaku Xikwembu Nkulukumba a ni ntiyiso, ni ku tiyisekisa swidumbiso leswi Xikwembu Nkulukumba a swi yentxeliki vakokwana vavu,
9 ni leswaku a vamatiko va kota ku dzrumisa Xikwembu Nkulukumba hi kola ka timpswalu take, hi lani Matsralwa ma hlayaka ha kone ma ku: “Hi leswo swi taka ni yentxa ni ku twalisa xikazri ka vamatiko, nakone a vito dzraku ni ta dzri yimbelelela swidzrumiso.”
10 Nakone ma tlhela ma ku: “Nyonxani n’wine vamatiko kun’we ni vhanu vake.”
11 Handle ka leswo ma tlhela ma ku: “Dzrumisani Yehovha, n’wine hinkwenu vamatiko nakone vhanu hinkwavu a va mu dzrumisi.”
12 Nakone Ezaya a tlhela a ku: “Ku ta va ni limitsru dzra Yese, ku nga lweyi a taka humelela akuva a fuma matiko; nakone a matiko ma ta mu dumba.”
13 Ingiki Xikwembu Nkulukumba lweyi a nyikanaka dumbo a nga mi nyika ku nyonxa hinkwaku ni ku zrula akuva mi ta va ni dumbo ledzrikulu ngopfu swinene* hi ku pfuniwa hi moya wa ku xwenga.
14 Vamakwezru, na kholwiseka leswaku mi tale hi wunene ni wutivi, ni leswaku ma swi kota ku dondzrisana.*
15 Nambitanu, ni mi tsralele tin’we ta tinhla leti hi ku kongoma, akuva ni mi dzrimuxa tone, ni yentxe leswo hi mhaka ya timpswalu letikulu leti Xikwembu Nkulukumba a ni kombiki tone
16 hikusa Xikwembu Nkulukumba a ni hlawule leswaku ni va nandzra wa Kriste Yesu akuva ni zrezra madzrungula lamanene ya Xikwembu Nkulukumba ka vamatiko. Ni tizra hi nkhinkhi a ntizrweni wa ku xwenga wa ku zrezra madzrungula lamanene ya Xikwembu Nkulukumba, akuva vamatiko va ta va gandzrelo ledzri yamukelekaka ledzri xwengisiwiki hi moya wa ku xwenga.
17 Xileswo na nyonxa hi ku va mudondzrisiwa wa Kriste Yesu ni hi ku yentxa ntizro wa Xikwembu Nkulukumba.
18 Hikusa a ni nge ti vulavula hi mintxhumu leyi mine ni yi yentxiki, kambe ni ta vulavula ntsena hi leswi Kriste a swi yentxiki ni ku swi hlaya hi ku tizrisa mine akuva vamatiko va mu yingiseta.
19 Va mu yingisete hi mhaka ya mahlolana ni swihlamaliso leswi ni swi yentxiki hi ku pfuniwa hi moya wa Xikwembu Nkulukumba, hi ndlela leyo ni zrezre madzrungula lamanene hi ku helela mayelanu na Kriste, ku sukela a Yerusalema ni zrezre a mimbangwini hinkwayu ni za ni ya tlhasa a Iliriya.
20 Nakunene, a ni tiyimisele kuva ni nga zrezri madzrungula lamanene lomu a vito dzra Kriste kutani a dzri tiviwa, akuva ni nga yaki a henhla ka masungulo lama bekiwiki hi mhunu mun’wana;
21 Kambe hi lani Matsralwa ma hlayaka ha kone: “Lava kalaka va nga byeliwanga ntxhumu mayelanu na yene va ta mu vona, nakone lava kalaka va nga yingelanga ntxhumu mayelanu na yene va ta swi twisisa.”
22 Hi leswo swi yentxiki leswaku minkama yinyingi ni siveliwa ku ta kwenu.
23 Kambe a ka ha na mbangu lowu ni kalaka ni nga wu yendzrelanga a migangeni leyi, nakone i malembe* na ni swi navela ngopfu ku mi yendzrela.
24 Xileswo loko ni ya Xipanya na dumba leswaku ni ta khaluta ni mi vona ni leswaku mi ta ni heleketanyana ntsrhaku ka loko ni tsrhame nkamanyana na n’wine.
25 Kambe swoswi ni djula ku yendzra ni ya Yerusalema ni ya tizrela vaxwengi.
26 Hikusa vamakwezru va le Makedoniya ni le Akaya va nyikele mintxhumu yavu hi timbilu tavu hinkwatu akuva va pfuna vaxwengi lava nga swisiwana lava tsrhamaka a Yerusalema.
27 Ina, va swi yentxe hi mbilu hinkwayu hikusa nakunene a vo va devha, hikusa vamakwezru va le Yerusalema va yavelane na vone mintxhumu yavu ya moya, xileswo na vone a va devha ku yavelana mintxhumu yavu ni vamakwezru va le Yerusalema.
28 Kutani ntsrhaku ka loko ni heleketele vamakwezru va le Yerusalema a minyikelo leyi* ya ka kwavu, ni ta khaluta ni mi vona loko ni ya Xipanya.
29 Handle ka leswo, na swi tiva leswaku loko ni ta ta halanu, ni ta mi buyela ni matovoko manyingi ya Kriste.
30 Leswi hi nga ni lipfumelo ka Hosi yezru Yesu Kriste nakone a ntamu wa Xikwembu Nkulukumba wu yentxaka leswaku hi zrandzranana, na mi tsratsriya vamakwezru, leswaku mi tipatsra na mine mi ni khongotelela ka Xikwembu Nkulukumba hi lani na mine ni tiyentxelaka ha kone,
31 akuva ni kota ku huluxiwa ka vhanu va le Yudeya lava nga liki vapfumeli ni leswaku a ntizro lowu ni yelaka wone a Yerusalema wu ya yamukeliwa ha hombe hi vaxwengi,
32 ku yentxela leswaku loko Xikwembu Nkulukumba a swi zrandzra, ni ta kwenu na ni nyonxile hi va hi tiyisanana.
33 Ingiki Xikwembu Nkulukumba lweyi a nyikanaka ku zrula a nga va na n’wine hinkwenu. Amen.
Tintlhamuxelo ta le hansi
^ Hi ku kongoma: “ni hi nomu wun’we”.
^ Kumbe: “hoyozelananani”.
^ Kumbe: “ledzri yentxaka hi ku halakela”.
^ Kumbe: “kawukana”.
^ Kumbexana: “i malembenyana”.
^ Hi ku kongoma: “handzru lowu”.
