Hi ku ya hi wukambisisi ku hlayiwa leswaku vampswha lava hambaka kolumu ka 80 wa mapursentu va le América va khongota, kambe i ntsena hanfu ya vone lava khongotaka siku ni siku. A swi ganaganekisi leswaku van’wana va vone va tihamba swivutiso swa ku fana ni leswi: ‘Xana xikhongoto xi yentxeliwe kuva xi pfuna vhanu leswaku va titwa na va yampswa kumbe xi va pfuna ka mintxhumu yin’wana?’

•  I yini xikhongoto?

•  Xana Xikwembu Nkulukumba a wa swi yingiseta swikhongoto?

•  I yini leswi ni nga swi hlayaka ka xikhogoto?

•  Leswi tintanga taku ti swi hlayaka

 Xikhongoto i ku vulavulisana ni muvumbi wa mintxhumu hinkwayu. Yanakanya hi leswi swi djulaka ku hlaya swone leswo! Yehova a tlakukile ka vhanu hinkwavu kambe a nga ‘kule ku hine hinkwezru’. (Amintiṛo 17:27) ku hlaya ntyiso Bibele dzri ni nyikela xizrambu lexi hlamalisaka: ‘Tsrhindzrekelani ku Xikwembu Nkulukumba; nayene a ta tsrhindzrekela ku n’wine.’—Yakob 4:8.

 U nga tsrhindzrekelisa kuyini ka Xikwembu Nkulukumba?

•   Yin’we ya tindlela i ku vulavula na yene hi xikhongoto.

•   Ndlela yin’wana i ku dondzra Bibele, ku nga ndlela leyi Xikwembu Nkulukumba a vulavulaka na wene ha yone.

 Tindlela toleto ta ku bulisana, ku nga xikhongoto ni ku dondzra Bibele, ti ta ku pfuna leswaku u va ni wunghanu lebyi tiyiki na Xikwembu Nkulukumba.

 “Ku vulavulisana na Yehovha, Xikwembu Nkulukumba lweyi a tlakukiki swinene i ndjombo leyikulu leyi vhanu va nga vaka na yone.”—Jeremy.

 “Ku byela Yehovha hi xikhongoto ndlela leyi ni titwaka ha yone swi ni yentxa ni titwa ni li kusuhi na yene.”—Miranda

 Nambiloko u pfumela ka Xikwembu Nkulukumba u tlhela u khongota kwake, minkama yin’wana swi nga ku bindzrela ku pfumela leswaku awa ku twa. Kambe Bibele dzri hlaya leswaku ‘Yehovha i muyingeli wa swikhongoto.’ (Amapsalma 65:2) Bibele dzri tlhela dzri ku zramba leswaku u ‘txukumetela ku hlatiyela’ hinkwaku ka yene. Ha yini? ‘Hikusa a zron’wa ha n’wine’.—1 Petros 5:7.

 Yanakanya hi mhaka leyi: Xana wa tinyika nkama wa ku vulavulisana ni munghanu waku nkama ni nkama? U fanela ku yentxa hi lani ku fanaka ni ka Xikwembu Nkulukumba. Vulavulisana na yene hi xikhongoto nkama ni nkama, u tlhela u mu vitana hi vito dzrake ku nga Yehovha. (Amapsalma 86:5-7; 88:9) Kunene, Bibele dzri ku zramba leswaku u ‘khongota minkama hinkwayu’.—1 Ba-le-Thessalonika 5:17.

 “Xikhongoto i ndlela leyi ni bulisanaka ha yone na Papayi wanga wa le matilweni, ni mu txhululela swa le mbilwini.”—Moises.

 “Ni vulavula na Yehovha hi mintxhumu yinyingi ku fana ni loko ni vulavula na mamana kumbe munghanu wanga.”—Karen.

 Bibele dzri li: ‘A timhakeni hinkwatu a ku kombela kwenu a ku tibyiwe hi Xikwembu Nkulukumba, hi ku khongota, ni ku kombela ni ku tlangela.’—Va-le-Filipi 4:6.

 Xana leswi swi hlaya leswaku swi lulamile kuva hi khongota ka Xikwembu Nkulukumba hi mu byela swikazratu swezru? Ina! Nakunene Bibele dzri li: ‘Nyiketa Yehovha mahanyela yaku, yene a ta ku seketela.’—Amapsalma 55:22.

 Nakunene a wu fanelanga u vulavula hi swikazratu swaku ntsena. N’hwanyana lwa vitaniwaka Chantelle a li: “Ku tsrhamela ku kombela mpfunu ntsena ka Yehovha ni nge hlayi leswaku wunghanu lebyo i byinene. Ni yanakanya leswaku i swinene ku sungula hi ku tlangela, ni tlhela ni longoloxa mintxhumu ya ku tala leyi yi ni susumetelaka kuva ni mu khensa.”

 Yanakanya hi mhaka leyi: Hi yini mintxhumu leyi u nga khensaka Yehovha ha yone a wuton’wini byaku? Xana u nga yanakanya hi mintxhumu yizrazru leyi u nga khensaka Yehovha ha yone namunhla?

 “Nambi a li mintxhumu yitsrongo ya ku fana ni swiluva swa ku xonga, swi nga hi susumetela ku khongota ka Yehovha hi mu khensa.”—Anita.

 “U nga ha yanakanyisisa hi ntxhumu wa kukazri wa ntumbuluku lowu ku nyonxisaka kumbe ndzrimana ya Bibele leyi ku nyonxisaka ngopfu, u nga khongota ka Yehovha u mu khensa hi swoleswo.”—Brian.