GUHUMA canke uruhumyi biterwa n’ibintu vyinshi, harimwo amasanganya n’indwara. Ivyo birashobora kugira ingaruka ku maso, ku dutsi nsozabwenge tw’ijisho canke ku bwonko. Abantu bahumye canke batabona neza akenshi birabagora kwumva igituma ico kintu cabashikiye, bagatuntura kandi bakagira ubwoba. Ariko rero, benshi baravyifatamwo neza kandi ubuzima bukabandanya.

Mu bisanzwe, amaso ni yo adufasha kumenya ibidukikije. Igihe rero umuntu atakibona, aca ategerezwa kwikora ku bundi bubasha nko kwumva, kumoterwa, gukorakora, no guhonja.

Ikinyamakuru kimwe (Scientific American) kivuga ko ubushakashatsi bwagizwe bwerekana ko ubwonko bufise ubushobozi bwo “guhindura uko bukora bivanye n’uko ibintu vyifashe.” Congerako giti: “Ibimenyamenya vyinshi vyerekana ko igihe umuntu afise ubumuga bunaka, ubwonko bushobora gutuma ubundi bushobozi bumufasha kumenya ibidukikije bukora mu buryo budasanzwe.” Raba nk’akarorero.

Kwumva: Amajwi arashobora gutuma umuntu yiha ishusho y’ikintu, yaba ari amajwi y’abantu canke intambuko zabo. Umugabo umwe w’impumyi yitwa Fernando avuga ati: “Ndashobora kwibuka abantu no kubamenya mfatiye ku majwi yabo canke mbere ku kuntu batambuka.” Juan, na we nyene akaba ari impumyi avuga ati: “Impumyi imenya umuntu ifatiye kw’ijwi ryiwe.” Nka kurya twese tubigira, impumyi irumviriza yitonze ijwi umuntu akoresha kuko rimufasha kumenya uko nya muntu yiyumva.

Amajwi umuntu w’impumyi yumva arashobora kandi kumubwira vyinshi ku bijanye n’ibimukikije. Nk’akarorero aramenya iyo abantu bariko baraja, ingene icumba arimwo kingana canke ahari ikintu ashobora kwisekako.

Kumoterwa: Ubushobozi bwo kumoterwa na bwo nyene burashobora gutuma umuntu amenya ibintu vyinshi uretse akamoto gusa. Nk’akarorero, igihe umuntu w’impumyi ariko araca mw’ibarabara, ubwo bushobozi buratuma abona mu bwenge  ahari utubare, amaresitora, amamangazini n’ibindi. Birumvikana ko amajwi aba asanzwe amenyereye amufasha gutahura neza ivyo bintu, nka kurya ashobora kubitahura biciye ku bushobozi bwo gukorakora.

Gukorakora: Francisco avuga ati: “Intoke zanje ni yo maso yanje.” Ayo maso mwumva yoshobora kubona kure umuntu akoresheje agakoni. Manasés yavutse ari impumyi maze ariga gukoresha agakoni akiri muto. Yavuze ati: “Hari ibindi bintu bimfasha kumenya neza aho ndi, na vyo bikaba ari ubundi bushobozi bumfasha kumenya ibinkikije, kwibuka ahantu no kuza ndakoza agakoni kanje aho nca kugira numve ingene hameze.”

Ubushobozi bwo gukorakora burafasha kandi abantu benshi bahumye gusoma ibitabu vyo mu ndome z’impumyi. Kukaba nkako, muri kino gihe abantu bahumye bararonka ibintu vyinshi bibafasha kugira ubumenyi no kwiyegereza Imana. Uretse ibitabu vyo mu ndome z’impumyi, barikora ku bintu vyafashwe amajwi canke ku buhinga bwa none. Ivyo biratuma bashobora gusoma Bibiliya n’ibindi bitabu bishingiye kuri yo. *

 Ivyo bikoresho vyarafashije cane Paqui n’umugabo wiwe bamwe twavuga mu ntango, vyongera biratuma bagira icizigiro. Vyongeye barashigikiwe n’abantu benshi bari mw’ishengero ry’Ivyabona vya Yehova ryo mu karere iwabo. Paqui avuga ati: “Ubu dufise ubuzima buri n’intumbero kandi ntiturinda gukenera abandi cane.”

Nta woharira ko guhuma biteza ingorane zidasanzwe. Ariko uwuvunitse ariga gucumbagira kandi umuntu arashobora kuvyihanganira ubuzima bukabandanya.