4 | Bibiliya iratanga impanuro ngirakamaro
BIBILIYA IVUGA ITI: “Icanditswe cose . . . ni ngirakamaro.”—2 TIMOTEYO 3:16.
Ico bisobanura
Naho Bibiliya atari igitabu c’ivy’ubuvuzi, iratanga impanuro ngirakamaro. Izo mpanuro zirashobora gufasha umuntu afise ingorane z’amagara yo mu mutwe. Raba uburorero bumwebumwe.
Ingene vyoshobora kudufasha
“Abafise amagara meza ntibakenera umuganga, ahubwo abarwaye ni bo bamukenera.”—MATAYO 9:12.
Bibiliya iravuga ko vyoshika tugakenera kwivuza. Abafise indwara zo mu mutwe benshi barumvise baruhuriwe igihe bamenya amakuru atomoye ajanye n’iyo ndwara, bakongera bakaja kwivuza.
“Kumenyereza umubiri bi[ra]gira akamaro.”—1 TIMOTEYO 4:8.
Kwama ugira utumenyero twiza, birashobora kugufasha kugira amagara meza yo mu mutwe. Muri utwo tumenyero harimwo kwama winonora imitsi, gufungura neza no gusinzira bihagije.
“Umutima unezerewe ugira neza nk’umuti uvūra, mugabo umutima ukubititse wumisha amagufa.”—IMIGANI 17:22.
Gusoma imirongo iremesha yo muri Bibiliya no kwishingira imigambi ushobora gushikako, birashobora gutuma ugira umunezero. Kubona ko ibintu bizogenda neza be no kutihebura, birashobora kugufasha kwihanganira ingorane z’amagara yo mu mutwe.
“Ubukerebutsi buri kumwe n’abifata ruto.”—IMIGANI 11:2.
Kubera ko vyoshika ntushobore gukora ivyo wipfuza vyose, urakwiye kwemera ko abandi bagufasha. Incuti n’abagenzi boshobora kwipfuza kugufasha, mugabo ntibamenye ico bokora. Babwire ivyo woshima ko bogufasha. Ntubitegeko ibidashoboka. Vyongeye, niwame ukenguruka ivyo bagukorera vyose.
Ingene Bibiliya iriko irafasha abafise ingorane z’amagara yo mu mutwe
“Narumvise ko hari ikitagenda neza muri jewe, nca nja kwa muganga. Yarabonye ingorane nari mfise. Ivyo vyaramfashije kwiyakira no kumenya ingene nokwivuza mu buryo bwiza.”— Uwitwa Nicole, a akaba arwaye indwara y’ihindagurika ry’imero.
“Nasanze kwama nsoma Bibiliya ndi kumwe n’umukenyezi wanje bimfasha gutangura umusi mfise ivyiyumviro vyiza kandi biremesha. Igihe na ho iyo ndwara iba yamvyutse, ntihabura umurongo wo muri Bibiliya undemesha.”—Uwitwa Peter, akaba arwaye akabonge.
“Vyarangora kubwira abandi ingene ndwaye kubera ko vyantera isoni. Ariko hari umugenzi somambike yantega yompi abigiranye impuhwe nyinshi, kandi akagerageza kuntahura. Mu vy’ukuri, yaratumye numva norohewe kandi ko ntari jenyene.”—Uwitwa Ji-yoo, akaba yari afise ingorane yo kudafungura neza.
“Bibiliya yaramfashije kwiga kuruhuka bikwiye, aho gutwarwa n’ibikorwa. Impanuro itanga zaramfashije kwihanganira izo ngorane namana.”—Uwitwa Timothy, akaba arwaye indwara imuhungabanya cane mu bwenge.
a Bamwebamwe si ko basanzwe bitwa.
Raba kandi
INYISHU Z’IBIBAZO BISHINGIYE KURI BIBILIYA
Idini, Imana canke Bibiliya vyoba bishobora gutuma wumva umerewe neza?
Raba ingene kugiranira ubugenzi n’Imana bishobora gutuma umererwa neza ubu no muri kazoza.
BE MASO!
Ivyotuma uhimbarwa—Amagara meza no kwinanata
Igihe umuntu arwaye, vyoba bica bisigura ko agahimbare kamuciye mu myanya y’intoke?
INYISHU Z’IBIBAZO BISHINGIYE KURI BIBILIYA
Bibiliya yoba yomfasha kuronka agahimbare mu muryango?
Impanuro ziranga ubukerebutsi Bibiliya itanga ziramaze gufasha abagabo n’abagore amamiliyoni kuronka agahimbare mu rugo.
INYIGISHO ZO MURI BIBILIYA
Nugerageze kwiga Bibiliya natwe
Urashobora kwiga Bibiliya ku buntu uri kumwe n’uwukwigisha.
