Imana yasezeraniye intumwa yiwe Aburahamu yuko umwe mu bo mu ruvyaro rwiwe yotumye “amahanga yose yo kw’isi” ahezagirwa. (Itanguriro 22:18) None uwo muntu yobaye nde?

Haraheze imyaka nka 2.000 Imana ihaye Yezu ububasha bwo gukora ibitangaro bikomeye, kandi Yezu yakomotse mu muryango wa Aburahamu. Ivyo bitangaro vyarerekanye yuko biciye kuri Yezu, ari ho amahanga yoronse ivyo Imana yasezeraniye Aburahamu.​—Abagalatiya 3:14.

Ibitangaro Yezu yakoze vyarerekanye ko ari we Imana yatoye kugira ngo ihezagire abantu biciye kuri we. Vyarerekanye kandi ingene Imana izomukoresha mu kuronsa abantu imihezagiro y’ibihe bidahera. Raba ingene ibitangaro Yezu yakoze vyashize ahabona zimwezimwe muri kamere ziwe nziza.

Ikibabarwe​—Yezu yarakijije abarwaye.

Igihe kimwe, hari umunyamibembe yatakambiye Yezu ngo amukize. Yezu yaciye amukorako maze amubwira ati: “Ndabishaka!” Iyo mibembe yaciye ikira buno nyene.​—Mariko 1:40-42.

Gutanga​—Yezu yaragaburiye abashonje.

Yezu ntiyashaka ko abantu bicwa n’inzara. Mu bihe bitandukanye, yaragaburiye ku gitangaro abantu ibihumbi n’ibihumbi mu kugwiza imikate mikeyi n’udufi dukeyi. (Matayo 14:17-21; 15:32-38) Bose barafunguye barahaga, mbere harasigara n’ibitari bike.

Impuhwe​—Yezu yarazuye abapfuye.

Yezu abitumwe n’“ikigongwe,” yarazuye umwana w’ikinege w’umupfakazi ata n’umwe yari asigaranye wo kumwitwararika.​—Luka 7:12-15.