NSOLO 3
Rahabe Akhakhulupira Yahova
Nyerezerani kuti tiri mu nzinda wa Yeriko. Nzinda unoyu uli n’dziko ya Kanani, kwakuti anthu nkhabe khulupira Yahova. Nkazi unango anacemerwa Rahabe asakhala mwenemu.
Pikhakhala iye ntsikana, Rahabe abva mbiri yakuti Mose agawa tani madzi a Nyandza Yakufuwira mbatsogolera Aisraele kubuluka mu Ejito. Iye abvambo kuti Yahova aphedza tani Aisraele toera kuwina nkhondo zakuthimbana na anyamalwa awo. Cincino iye abva kuti Aisraele ali duzi na Yeriko!
Rahabe atsidzikiza anyakusuzumira thangwi iye akhakhulupira Yahova
Ntsiku inango cakumaulo, Aisraele awiri aenda ku Yeriko toera kuona nzinda. Iwo afika panyumba ya Rahabe. Iye aaphemba kuti apite n’nyumba. Camasiku, mambo wa ku Yeriko abva kuti anyakusuzumira apita mu nzinda, pontho kuti iwo aenda kunyumba ya Rahabe. Natenepa, mambo atuma amuna toera kuenda kaaphata. Rahabe abisa anyakusuzumira awiri ale nkwartu yandzulu pantsoi ya nyumba yace, mbapanga amuna adatumwa na mambo: ‘Anyakusuzumira akhali pano, mbwenye iwo abuluka mu nzinda. Mungaafuna, atowereni munaaphata!’ Usadziwa thangwi yanji Rahabe atsidzikiza anyakusuzumira anewa?—Thangwi iye akhakhulupira Yahova, pontho akhadziwa kuti iye mbadapereka dziko ya Kanani kuna Aisraele.
Mbadzati kubuluka panyumba ya Rahabe, anyakusuzumira apikira kuti Rahabe, anyakubalace na abaleace mbadapulumuswa pakufudzwa kwa Yeriko. Usadziwa ninji pidampanga iwo toera kucita?—Iwo ampanga: ‘Kwata nkhambala yakufuwira iyi, imanike kunja kwa janela yako. Ungacita pyenepi, munthu onsene wa panyumba yako anadzapulumuka.’ Rahabe acita pyonsene pidapangwa iye. Usadziwa ninji pidacitika?—
Yahova apulumusa Rahabe na acibale ace
Mudapita ntsiku zingasi, Aisraele azungulira nzinda mwakumatama. Mu ntsiku zitanthatu iwo azungulira nzinda, kabodzi pa ntsiku. Mbwenye pa ntsiku yacinomwe, iwo azungulira nzinda kanomwe. Buluka penepo, iwo akhuwa mwakugaluza. Yahova acitisa mipanda idazungulira nzinda kugomoka. Mbwenye nyumba idamanikwa nkhambala yakufuwira pa janela nee yagomoka! Ukuona nyumba ineyi pa cithundzithundzi?—Rahabe na acibale ace apulumuka!
Unapfundzanji kubulukira kuna Rahabe?—Rahabe akhakhulupira Yahova thangwi ya pinthu pyonsene pyakudzumisa pidapfundza iye thangwi ya Yahova. Iwembo ukupfundza pinthu pizinji pyakudzumisa thangwi ya iye. Usankhulupirambo ninga pidacita Rahabe?—Ife tisadziwa kuti usankhulupira!
