Usadziwa ndi Umambo upi unalonga ife?— Inde, ndi Umambo wa Mulungu, Umambo wakuti unadzacitisa dziko yapantsi kukhala paradizu. Usafuna kupfundza pizinji thangwi ya Umambo unoyu?—

Maumambo onsene ali na mambo. Pontho, mambo asatonga anthu a n’dziko yace. Usadziwa mbani Mambo wa Umambo wa Mulungu?—Ndi Yezu Kristu. Iye asakhala kudzulu. Mwakukhonda dembuka, iye anadzakhala Mambo wa anthu onsene pa dziko yapantsi! Usanyerezera kuti tinadzakhala akutsandzaya Yezu angadzakhala Mambo wa dziko yonsene yapantsi?—

Tinadzakhala akutsandzaya kakamwe! Mu Paradizu, anthu nkhabe kudzamenyana, peno kuenda kunkhondo. Anthu onsene anadzafunana unango na ndzace. Nkhabe anafuna kudzaduwala peno kufa. Maboliboli anadzaona, anthu anakhonda kubva anadzabva, anacimwana kufamba anadzathamanga mbanumpha. Anthu onsene anadzakhala na pyakudya pizinji. Pinyama pinadzasendzeka pabodzi pene cinango na cindzace, pontho pinadzasendzekambo na ife. Anthu adafa anadzalamuswa. Azinji mwa amuna na akazi adapfundza iwe m’bruxura ino, ninga Rebeka, Rahabe, Dhavidhi, na Eliya anadzalamuswambo!  Usafuna kuonana nawo angadzalamuswa?—

Yahova asakufuna, pontho asafuna kuti ukhale wakutsandzaya. Ungapitiriza kupfundza pizinji thangwi ya Yahova, mbumbvera, unadzakhala maso kwenda na kwenda mu paradizu yakubalika! Ndi pyenepi pinafuna iwe?—