Pangaoneka cidengwa, mwakucimbiza Mboni za Yahova zisatoma kuphata basa toera kuphedza abale awo adakhuyiwa. Kuwangisira kweneku kusapangiza ufuni wathu wandimomwene kuna anango. (Jwau 13:34, 35; 1 Jwau 3:17, 18) Tisaphedza tani?

Tisapereka kobiri. Pidaoneka njala ikulu ku Yudeya, Akristu akutoma a ku Antyokiya atumiza kobiri kuna Akristu a ku Yudeya. (Machitiro 11:27-30) Mu njira ibodzi ene, tingabva kuti abale athu ku madziko anango akutamba nyatwa, tisatumiza pyakupereka kubulukira pa mpingo wathu toera kuphedza abale anewa akuti ali na kusowa kukulu kakamwe.—2 Akorinto 8:13-15.

Tisapereka pinthu pyakufunika. Akulu a mpingo a pa mbuto idacitika cidengwa asasaka kudziwa piwalo pya mpingo ubodzi na ubodzi toera kukhala na cinyindiro cakuti munthu onsene asagumanika pa mbuto yakutsidzikizika. Komiti ya ciphedzo isakwanisa kucita masasanyiro akupereka cakudya, madzi adidi, nguwo, mbuto yakukhala na mitombwe. Mboni za Yahova zizinji zakuti ziri na maluso anafunika zisaperekeka mukuphatisira mpfuma zawo toera kuenda kacita khundu m’basa yacisudzulo, peno toera kusasanyira nyumba za abale na Nyumba za Umambo zidagudjuka. Kuphatana kwathu ninga gulu na pyakugumana napyo pinakhala na ife pakuphata basa pabodzi pisaticitisa kucita pinthu mwakucimbiza m’midzidzi ya nyatwa. Ngakhale kuti tisafuthula djanja yathu kwa “abale athu,” tisaphedzambo anango khala ndi pyakukwanisika, mwakukhonda tsalakana uphemberi wawo.—Agalata 6:10.

Tisapereka ciphedzo cauzimu na ca manyerezero. Anyakugwerwa na pidengwa asafuna kakamwe ciwangiso. M’midzidzi ineyi, tisatambira ciwangiso cakubuluka kwa Yahova, Mulungu “anabalangaza anthu onsene.” (2 Akorinto 1:3, 4) Mwakukomerwa tisalonga mapikiro a Bhibhlya kwa ale anasowa cidikhiro, mbatipereka cinyindiro cakuti mwakukhonda dembuka Umambo wa Mulungu unadzamalisa pidengwa pyonsene pyakuti pisabweresa kuthabuka na nyatwa.—Apokalipse 21:4.

• Thangwi yanji Mboni za Yahova zisakwanisa kupereka ciphedzo mwakucimbiza m’midzidzi ya pidengwa?

• Ndi ciphedzo cipi cauzimu cakuti tinakwanisa kucipereka kwa ale adagwerwa na cidengwa?