Jairo aona kuti nkazi akhali na utenda wakubuluka ciropa awangiswa na Yezu. Mwakukhonda kupenula, Yezu anakwanisambo kuphedza mwanace, maseze nee akhali na cinyindiro cakuti ‘mwanace’ aciri maso. (Mateu 9:18) Kodi akhali na cidikhiro cakuti mwanace mbadaphedzwa?

Pikhalonga Yezu na nkazi adawangisa iye, abwera amuna anango kubuluka kunyumba kwa Jairo mbalonga: ‘Mwananu wankazi afa. Thangwi yanji muli kunentsa Mpfundzisi?’—Marko 5:35.

Mphangwa zenezi zikhali zakutsukwalisa kakamwe! Mamuna unoyu, wakuti akhalemedzwa kakamwe pa cisa, cidikhiro cace cikhadamala. Mwanace m’bodzi basi afa. Mbwenye pidabva Yezu pyenepi, azungunuka kuna Jairo, mbalonga mafala akuwangisa: ‘Leka gopa, basi ene khulupira.’—Marko 5:36.

Buluka penepo, Yezu aenda na Jairo mpaka kunyumba kwace. Pidafika iwo, agumana anthu onsene mbakalira, kudungunya, anango akhamenya paditi thangwi yakutsukwala. Yezu apita n’nyumba mbalonga mafala akudzumatirisa: ‘Mwana hadafa tayu, mbwenye akugona.’ (Marko 5:39) Pidabva iwo pyenepi, anthu aseka Yezu. Thangwi iwo akhadziwa kuti ntsikana afa. Mbwenye mukuphatisira mphambvu zidampasa Mulungu, Yezu akhafuna kupangiza kuti anthu adafa analamuswa muli akufa, ninga munalamusirwa munthu angakhala n’citulo cikulu.

Yezu apanga onsene toera kubuluka kunja, mbasala na Pedhru, Tiyago, Juwau na anyakubala a ntsikana adafa. Yezu aenda kukhadagoneswa ntsikana na anthu anewa axanu. Iye amphata djanja mbalonga: ‘Talita kumi,’ mafala anewa angathumburuzwa asabveka: ‘Ntsikana, ine ndiri kukupanga, lamuka!’ (Marko 5:41) Mwakukhonda dembuka, ntsikana alamuka mbatoma kufamba. Nyerezerani kutsandzaya kudakhala na Jairo na nkazace pidaona iwo pyenepi! Toera anthu akhale na cinyindiro cakuti ntsikana alamukadi, Yezu aapanga toera ampase cakudya.

M’maulendo anango, Yezu akhaphemba ale akhawangisa iye toera akhonde kupanga anthu anango pinthu pidacita iye kwa iwo, natenepa iye acita pibodzi pyene kuna banja ya Jairo. Mbwenye thangwi yakukomerwa, banja ineyi na anango amwaza mphangwa zenezi mu ‘cisa ceneci consene.’ (Mateu 9:26) Anthu anafuna imwe angalamuswa muli akufa, kodi nee munakomerwa mbamupangambo anango thangwi ya pyenepi? Unoyu ndi ulendo waciwiri udalamusa Yezu anthu muli akufa.