Felisa: Ndakuzwa m’banja yaphinga kakamwe mu uphemberi. Mwandimomwene, acibale athu 13 akhali anyantsembe peno padre mu Katolika. M’bale wa mama wakuti akhapfundzisa mu xikola ya katolika, pidafa iye adzasankhulwa na Papa João Paulo II ninga m’bodzi wa anthu akucena. Banja yathu ikhali yakutcerenga. Baba akhali nyakufula mafero, mama akhali nyakulima. Ndine wakutoma mwa anawo asere.

Nkhondo ya ku Espanya yatoma pikhali ine na pyaka 12 pyakubalwa. Pidamala nkhondo, Baba apitiswa nkaidi. Ndzeru zace za ndale nee zikhakomeresa utongi. Mama akhanentseka toera kudyesa banja, natenepa xamwali wace apanga mama toera aendese abale anga ang’ono acikazi atatu​—Araceli, Lauri, na Ramoni​—ku nyumba inakhala akazi Acikatolika ku Espanya, mu cisa ca Bilbao. Kweneko iwo nee mbadathabuka na njala.

Araceli: Mu ndzidzi unoyu, ife tikhali na pyaka 14, 12, na 10 pyakubalwa, natenepa pikhali pyakunentsa kakamwe kusiyana na acibale athu. Ku Bilbao tikhacita basa ya unyai. Mudapita pyaka piwiri, akazi Acikatolika aticinja kuenda kunyumba ikulu ya ku Zaragoza, ikhatsalakana anthu akugwesera. Basa yathu ikhali yakucenesa mbuto yakuphikira, mbwenye ikhali yakunetesa kakamwe kwa atsikana ang’ono ninga ife.

Felisa: Pidaenda m’bale wanga ku Zaragoza, mama na nyantsembe wapacisa, wakuti akhali ng’ono wace, atonga kuti ndiendembo kaphata basa panyumba ibodzi ene. Iwo akhaona kuti kubuluka kwanga mbukudandicitisa kukhala kutali na mphale wapacisa wakuti akhapangiza cifuno kuna ine. Nakuti ndikhali ntsikana waphinga kakamwe mu uphemberi, ndakomerwa kakamwe na maonero akukhala  pa nyumba ineyi. Ndikhagumanika pa Misa ntsiku zonsene, pontho ndikhanyerezera kukhala misionaryo ninga mwana wa m’bale wa mama wakuti akhali ku Afrika.

Akazi anewa Acikatolika nee akhawangisa cifuno canga cakutumikira Mulungu m’madziko anango, pontho ndikhabva ninga ndikhali nkaidi thangwi ya makhaliro a panyumba ineyi. Natenepa, mu caka cidatowerera, ndatonga kubwerera kunyumba toera kutsalakana m’bale wa mama, wakuti akhali nyantsembe. Kusiyapo kucita mabasa a panyumba, ndikhalongambo maphembero akubwereza-bwereza camasiku. Ndikhakomerwambo na kutsalakana maluwa na kubvazika dzimunthu ya Mariya na a “anthu akucena.”

Araceli: Mwakukhonda dembuka, umaso wathu panyumba ineyi wadzacinja. Pakumala kucita mapikiro akutoma, akazi Acikatolika atimwaza. Ramoni asala ku Zaragoza, Lauri aenda ku Valencia, ine ndatumizwa ku Madridi, kudacita ine mapikiro aciwiri. Nyumba ya ku Madridi ikhali na makwartu akugona a anyakupfundza, anyakugwesera na alendo, natenepa pakhali na mabasa mazinji toera kutsalakana. Panyumba ineyi, ndikhaphata basa nkwartu inatsalakanwa atenda.

Mwandimomwene, ndikhadikhira kuti ntundu unoyu wa umaso mbudakhala wakuphindulisa kakamwe. Ndikhadikhirambo kuleri na kubvesesa Bhibhlya. Mbwenye nee m’bodzi akhalonga pya Mulungu peno pya Yezu, pontho nee tikhaphatisira Bhibhlya. Basi ene ndapfundza pang’ono Cilatini, kupfundza umaso wa “anthu akucena,” na kulambira Mariya, mbatiphata basa mwakuwanga kakamwe.

Ndatoma kupswipa ntima, mbandilonga kuna mai nkulu wa panyumba ineyi. Ndampanga kuti ndikhafunika kuwina kobiri toera kutsalakana acibale anga m’mbuto mwakuphata basa mwakuwanga toera kupfumisa anango. Iye andifungira nkwartu, mbanyerezera kuti mbidacinja manyerezero anga, mbandikhonda kubuluka panyumba ineyi.

M’maulendo matatu, akazi Acikatolika andibulusa nkwartu, basi ene toera kuona khala ndacinja maonero anga. Thangwi yakutonga kwanga, iwo andipanga toera kulemba mafala awa: “Ndikubuluka thangwi ndisafuna kutumikira Sathani m’mbuto mwa kutumikira Mulungu.” Phembo ineyi yandidzidzida kakamwe, maseze ndikhafuna kubuluka panyumba ineyi, cipo mbidalemba mafala anewa. Pakumalisa, ndaphemba toera kulonga na nyakubwekesa madawo, mbandimpanga pyonsene pidacitika. Iye alonga na bhispu toera andicinje kuti ndiende kunyumba ikakhala ine kale ku Zaragoza. Mudapita nthanda zingasi, ndatawiriswa toera kubuluka. Mwakukhonda dembuka, Lauri na Ramoni abulukambo panyumba ikakhala iwo.

Felisa: Mukupita kwa ndzidzi, ndamanga banja mbandienda kakhala ku Kantabria. Ndikhapitiriza kuenda  ku Misa mwakukhonda phonya, mbwenye Dimingu inango ndabva cidziwiso pa guwa cakuti nee ndikhacidikhira. Nyantsembe alonga mwaukali: “Lang’anani bukhu iyi!” Iye akhathonya bukhu A Verdade Que Conduz à Vida Eterna. Iye apitiriza: “Khala alipo adakupasani, ndipaseni peno itayeni!”

Nee ndikhali nayo bukhu ineyi, mbwenye ndikhafuna kukhala nayo. Buluka penepo, pidapita ntsiku zingasi, Amboni awiri adhima nsuwo wa nyumba yanga mbandipasa bukhu “yakukhondeswa.” Pidadoka dzuwa, ndaileri, pidabwera iwo pontho, ndatawira kupfundza Bhibhlya.

Mwakukhonda dembuka, undimomwene wakhuya ntima wanga. Phinga yanga yakale mu uphemberi yadzakhala ufuni kwa Yahova na phinga mu utumiki. Ndabatizwa mu caka 1973. Maseze ndikhali na miyai yakucepa toera kucedza pya undimomwene na acibale anga, mbwenye ndacita pyonsene pikhakwanisa ine. Ninga pidafokotoza ine pakutoma, iwo akhapokanya mwakuwanga pikhulupiro pyanga, makamaka m’bale wanga Araceli.

Araceli: Pyakugumana napyo pyanga pyakutsukwalisa kunyumba ya akazi Acikatolika pyandicitisa kukhala munthu wakuipirwa. Mbwenye ndikhapitiriza kuenda ku Misa m’Madimingu, pontho ntsiku zonsene ndikhalonga maphembero akubwereza-bwereza. Ndikhapitiriza kukhala na cifuno cakubvesesa Bhibhlya, pontho ndaphemba Mulungu toera andiphedze. Mbwenye Felisa andipanga pinthu pipswa pidapfundza iye, iye akhali wakugalamuka kakamwe thangwi pikhulupiro pyace, natenepa ndanyerezera kuti pikhali pyauthambi. Nee ndikhabverana naye.

Pidapita pyaka pingasi, ndabwerera ku Madridi toera kuphata basa mbandimanga banja. Mukupita kwa ndzidzi, nee ndikhatawira pontho pipfundziso pya Bhibhlya. Ndikhaona kuti anthu akhaenda ku Misa nee akhaphatisira pipfundziso pya Yezu. Natenepa, ndasiya kuenda ku gereja. Nee ndikhakhulupira pontho “anthu akucena,” kubweka madawo peno infernu. Pontho ndataya madzimunthu anga onsene. Nee ndikhadziwa khala ndikhacita pinthu pyadidi peno nkhabe. Ndikhali wakutsukwala, mbwenye ndikhapitiriza kuphembera kuna Mulungu mbandilonga: “Ndisafuna kukudziwani. Ndiphedzeni!” Ndisakumbuka kuti Mboni za Yahova zadhima nsuwo wanga maulendo mazinji, mbwenye nee ndikhafungula nsuwo. Nee ndikhakhulupira pontho mauphemberi.

 M’bale wanga Lauri akhali ku Fransa, Ramoni akhali ku Espanya. Mu pyaka 1980, iwo atoma kupfundza Bhibhlya na Mboni za Yahova. Ndikhanyerezera kuti anyengezwa ninga pikhadacitika na Felisa. Buluka penepo, ndacedza na nyakuendekana anacemerwa Anjelina, iye adzakhala xamwali wanga wa ponda ndipondembo. Iye akhalimbo m’bodzi wa Mboni za Yahova. Mwakubwereza-bwereza, Anjelina na mamunace akhandiphemba toera kupfundza Bhibhlya. Iwo adzindikira kuti maseze ndikhalonga kuti nkhabe funa kubva pya uphemberi, ine ndikhafuna kakamwe kudziwa Bhibhlya. Pakumalisa, ndaapanga: “Nkhabe pinthu. Ndinatawira kupfundza na imwe basi ene ndingaphatisira Bhibhlya yanga!” yakuti ikhali ya Nácar-Colunga.

Felisa: Pidabatizwa ine mu caka 1973, mu Santander​—nzinda ukulu wa cigawo ca Kantambria ku Espanya, mukhali na amboni 70. Tikhali na cisa cikulu kakamwe, natenepa tikhacita ulendo na maximbombo, buluka penepo na motokala toera kamwaza mphangwa mu cigawo consene. Tikhaenda cisa na cisa mpaka kumwaza mphangwa mu pisa pyonsene pya nzinda unoyu.

Mu pyaka pizinji, ndisakhala na mwai wakucitisa mapfundziro mazinji a Bhibhlya, pontho anyakupfundza 11 abatizwa. Azinji a iwo akhali Akatolika. Ndikhafunika kupangiza kupirira, ninga ine, iwo akhafuna ndzidzi wakukwana toera kudzindikira kuti pikhakhulupira iwo pikhali pyauthambi. Ndadzindikirambo kuti basi ene Bhibhlya na nzimu wakucena wa Yahova unakwanisa kukhuya mitima yawo toera kuaphedza kudzindikira undimomwene. (Aheb. 4:12) Mamunanga, Bienvenido, wakuti akhali mpolixa, abatizwa mu caka 1979, mama atoma kupfundza Bhibhlya ndzidzi pang’ono mbadzati kufa.

Araceli: Ndikhapenula kakamwe pidatoma ine kupfundza Bhibhlya na Mboni za Yahova. Mbwenye pidapita masumana, ndadzindikira kuti mabvero anga akuipirwa akhadamala. Cidandikhuya kakamwe m’makhaliro a Mboni za Yahova, ndi cakuti iwo asacita pinapfundzisa iwo. Ndatoma kukhala na cikhulupiro mbandikhala wakutsandzaya kakamwe. Anyakuendekana anango andipanga: “Araceli, pitiriza munjira idasankhula iwe!”

Ndisakumbuka phembero idacita ine mbandilonga: “Ndakhuta Yahova, thangwi yakukhonda kundisiya, pontho thangwi ya kundipasa miyai mizinji toera kugumana pikhasaka ine—cidziwiso candimomwene ca Bhibhlya.” Ndaphemba m’bale wanga Felisa toera kundilekerera thangwi ya mafala akudzidzida adalonga ine kuna iye. Buluka penepo, m’mbuto mwa kuketesana, cincino tisacedza mwadidi pya cidziwiso ca Bhibhlya. Ndabatizwa mu caka 1989 pikhali ine na pyaka 61 pyakubalwa.

Felisa: Lero ndiri na pyaka 91 pyakubalwa, ndine nzice pontho nee ndina mphambvu ninga zikhali na ine kale. Mbwenye ndisaleri Bhibhlya ntsiku zonsene, ndisagumanika pa misonkhano ungumi wanga ungatawirisa, pontho ndisacita khundu mu utumiki ninga munakwanisa ine.

Araceli: Nakuti ndikhali mu uphemberi wa Katolika, ndisakomerwa kupereka umboni kuna anyantsembe onsene na akazi Acikatolika anagumana ine mu utumiki. Ndaagawira mabukhu mazinji, pontho ndisacedza mwadidi kakamwe na iwo. Ndisakumbuka nyantsembe m’bodzi adacedzera ife m’maulendo mazinji, iye andipanga: “Araceli, ndisatawira na ntima onsene pinalonga iwe, mbwenye ndinaenda kupi na thunga iri na ine? Kodi anthu anaphembera na ine pabodzi na acibale anga analonga tani?” Ine ndantawira: “Mphapo Mulungu analonganji?” Iye asukusa nsolo mwakutsukwala, mbwenye pa ndzidzi unoyu nee akhali na cipapo toera kucinja uphemberi wace.

Ndisakumbuka ntsiku yakupambulika mu umaso wanga—ikhali ntsiku idalonga mamunanga kuti asafuna kuenda ku misonkhano pabodzi na ine. Pa ndzidzi unoyu, iye akhali na pyaka pyakupiringana 80 pyakubalwa, buluka penepo iye cipo adjomba kumisonkhano. Iye apfundza Bhibhlya mbakhala m’mwazi mphangwa wakukhonda batizwa. Ndisakumbuka midzidzi yakutsandzayisa ikhaenda ife pabodzi mu utumiki. Pidasoweka iye, zikhadasala nthanda ziwiri toera kufika ntsiku ikhafuna iye kubatizwa.

Felisa: Cibodzi mwa pinthu pinanditsandzayisa kakamwe mu umaso wanga, ndi kuona abale anga ang’ono atatu akuti pakutoma akhandipingiza, mbadzakhala abale anga auzimu. Tisatsandzaya kakamwe kukhala pabodzi, kucedza pya Mulungu wathu Yahova na Mafalace! Lero, ine na abale anga tiri akuphatana mwauzimu. *