Pyenepi pingacitika mpingo usafunika kuona kuti banja idamanga iye kale yamala, pontho banja idamanga iye cincino ndi yakutawirika mwakubverana na mwambo wa mautongi. Toera kubvesesa pyenepi, tendeni tione pidalonga Yezu thangwi ya kukhondana na kumanga pontho banja.

Mwakubverana na Mateu 19:9, Yezu alonga thangwi ibodzi basi inatawirisa Bhibhlya toera anthu akhondane. Iye alonga: “Munthu onsene anakhonda nkazace mbasemba unango, akucita upombo, kusiyapo khala an’khonda thangwi nkazi acita ulukwali.” Mafala adalonga Yezu asatipfundzisa kuti (1) thangwi ibodzi basi toera kukhondana mwakubverana na Bhibhlya ndi ulukwali, pontho (2) mamuna anakhonda nkazace mwakukhonda bverana na pinalonga Bhibhlya mbamanga pontho banja na nkazi unango, ali kucita upombo. *

Kodi mafala a Yezu asabveka kuti mamuna angacita ulukwali mbakhondana na nkazace ali wakusudzuka mwakubverana na Bhibhlya toera kumanga pontho banja? Nkhabe. Mamuna angacita upombo, nkazace anasankhula khala asafuna kumulekerera peno nkhabe. Nkazi angakhonda kulekerera mamunace mbakhondana naye mwakubverana na mwambo, uwiri wawo ali akusudzuka toera kumanga pontho banja.

Panango nkazi anapangiza kuti asafuna kupitiriza na mamunace adacita upombo mbampanga kuti ali dzololo toera kumulekerera? Mphapo ninji pinafuna kucitika khala mamuna unoyu nee atawira kulekererwa, pontho asafuna kukhondana na nkazace mwakubverana na mwambo wa mautongi? Nakuti nkazace ali dzololo toera kumulekerera mbapitiriza pabodzi, mamuna unoyu nee ali wakusudzuka toera kumanga pontho banja mwakubverana na Bhibhlya. Iye angafuna kumanga pontho banja na munthu unango maseze nee ali wakusudzuka mwakubverana na Bhibhlya toera kucita pyenepi, ali kucita pontho upombo. Natenepa pyenepi pingacitika, akulu a mpingo anakhazikisa komiti inango yakutonga miseru.—1 Akor. 5:1, 2; 6:9, 10.

Mamuna wakuti nee ali wakusudzuka toera kumanga banja, angamanga banja, mpingo usafunika kuona tani banja yace yakale na ya cincino? Mwakubverana na Bhibhlya, kodi banja yace yakale isafunika kupitiriza kuoneka ninga banja? Kodi nkazi wakusowa mulando ali kupitiriza kukhala wakusudzuka toera kulekerera peno kukhonda mamunace wakale? Kodi mpingo usafunika kuona banja ipswa ninga ikucita upombo?

Kalene, tikhaona kumanga banja ipswa ninga kucita upombo khala nkazi peno mamuna adakhonda dawa aciri m’maso, khala nee amanga pontho banja, pontho khala nee acita ulukwali. Mbwenye Yezu nee alonga pya nkazi adakhonda dawa mu ndzidzi udalonga iye thangwi ya kukhondana na kumanga pontho banja. M’mbuto mwace, iye alonga kuti mamuna anakhonda nkazace mwakukhonda bverana na pinalonga Bhibhlya,  mbamanga pontho banja, akucita upombo. Natenepa, kukhondana na kumanga pontho banja kudalonga Yezu kuti ndi upombo kusamalisa banja yakale.

Mamuna angakhondana na nkazace mbamanga banja na nkazi unango, nkazi wace wakusowa mulando nee ali na ufulubve wa kumulekerera. Natenepa iye nee anafunika kucita cisankhulo cakunentsa kakamwe, cakuti ndi kulekerera peno kukhonda mamunace wakale. Kusiyapo pyenepi, mwakukhonda tsalakana khala nkazi adakhonda dawa afa, amanga pontho banja peno acita ulukwali, pyenepi nee pisacinja maonero a mpingo thangwi ya banja inango inamanga mamunace wakale. *

Mu citsandzo cidaona ife, mamuna acita upombo mbakhondana na nkazace. Mphapo ndiye tani khala mamuna nee acita upombo, mbwenye akhondana na nkazace, buluka penepo mbamanga pontho banja na nkazi unango? Peno ndiye tani khala mamuna nee acita ulukwali mbadzati kukhondana, mbwenye acita ulukwali pakumala kukhondana mbamanga pontho banja na nkazi unango, mwakukhonda tsalakana khala nkazace ali dzololo toera kumulekerera peno nkhabe? Mu pitsandzo pyenepi pyonsene, kukhondana na kumanga pontho banja ndi upombo, pontho kunamalisa banja yakale. Banja ipswa inakhala yakutawirika mwakubverana na mwambo wa mautongi. Ninga pidalongwa mu A Sentinela ya 15 de Novembro de 1979, tsamba 32, “cincino iye amanga banja ipswa, natenepa nee asafunika basi ene kubwerera kuna nkazace wakale. Thangwi banja yace yakale yamala pidakhondana iwo, pidacita iye upombo mbamanga pontho banja.

Macinjo anewa nee asabveka kuti Nkristu asafunika kunyerezera kuti banja nee ndi yakufunika peno kuti kucita upombo nee ndi madawo makulu. Mamuna anakhondana na nkazace na mathangwi akuti nee asabverana na pinalonga Bhibhlya, mbamanga pontho banja na nkazi unango mwakukhonda bverana na pinalonga Bhibhlya, akulu a mpingo asafunika kukhazikisa komiti yakutonga miseru, thangwi iye acita upombo. (Khala nkazi adamanga na iye banja ndi Nkristu, isafunikambo kukhazikiswa komiti yakutonga miseru thangwi nkazi unoyu acitambo upombo.) Maseze banja ineyi nee inaoneka ninga iri kucita upombo mamuna unoyu nee anakhala wakuthema toera kupaswa miyai yakutumikira mu pyaka pizinji mpaka abale na alongo atome pontho kumulemedza mu mpingo. Pontho mbadzati kupaswa miyai yakutumikira, akulu a mpingo asafunika kuona makhaliro a nkazace wakale na ana adasiya iye.—Mal. 2:14-16.

Nakuti kukhondana na mathangwi akuti nee asabverana na pinalonga Bhibhlya kusabweresa nyatwa zizinji, Akristu asafunika kutowezera citsandzo ca Yahova mbaona kuti banja ndi yakucena.—Koel. 5:4, 5; Aheb. 13:4.