Kodi imwe mwaleri mwacidikhodikho misolo iyi ya Ncenjezi? Khala mwaileri, onani khala munakwanisa kutawira mibvundzo inatowera:

Yahova asatsalakana tani akazi?

Iye asatsalakana akazi mwakusowa tsankhulo, pontho nee asaona amuna ninga akufunika kakamwe kupiringana akazi. Iye asaabvesera, pontho asatsalakana mabvero awo na pinthu pinaadzudzumisa. Iye ali na cinyindiro cakuti iwo anakwanisa kucita mabasa onsene anapaswa iwo.—Ncenjezi 01.24, tsa. 15-16.

Tinaphatisira tani lemba ya Aefesi 5:7 inalonga kuti: “Lekani kucitambo pinthu pinacita iwo”?

Mpostolo Paulu akhacenjeza toera tikhonde kucita uxamwali na anthu anakhonda bvera Yahova. Pyenepi pisaphataniza kucedza nawo nkhope na nkhope na mu redes sociais.—Ncenjezi 03.24, tsa. 22-23.

Ndi mphangwa zipi zauthambi zakuti tisafunika kucita nazo mphole-mphole?

Tisafunika kucita mphole-mphole na mphangwa zinatumizwa na abale na alongo peno axamwali athu zakuti nee taziona khala ndi zandimomwene, kuphatanizambo mphangwa zinatumizwa na munthu wakupanduka analonga kuti asafuna undimomwene.—Ncenjezi 04.24, tsa. 12.

Ninji pinadziwa ife na pinakhonda dziwa ife thangwi ya njira inafuna kutonga Yahova Mambo Salomoni, ale adafa mu nzinda wa Sodhoma na Gomora na pa Madzi Makulu?

Ife nee tiri na cinyindiro khala Yahova atonga kuafudza kwenda na kwenda. Mbwenye pinadziwa ife ndi pyakuti Yahova asadziwa pinthu pyonsene thangwi ya iwo, pontho ndi wantsisi kakamwe.—Ncenjezi 05.24, tsa. 3-4.

Ndi cinyindiro cipi ciri na ife thangwi yakudziwa kuti Yahova ndi “Mwala”? (Deut. 32:4)

Yahova anakwanisa kukhala pakuthawira pathu. Iye ndi wakunyindirika, pontho ndzidzi onsene asacita pinalonga iye. Kusiyapo pyenepi, iye nkhabe cinja makhaliro ace na cifuniro cace.—Ncenjezi 06.24, tsa. 26-28.

Ninji pinafuna kutiphedza toera kudzolowera mpingo upswa?

Nyindirani kuti Yahova anakuphedzani ninga pidaphedza iye atumiki ace nduli. Lekani kulandanisa mpingo wanu wacincino na wakale. Citani mabasa mu mpingo wanu upswa, pontho wangisirani toera kukhala na axamwali apswa.—Ncenjezi 07.24, tsa. 26-28.

Tisapfundzanji na Misangani mitatu inagumanika pa Mateu kapitulu 25?

Nsangani wa mabira na mbuzi usapangiza kuti tisafunika kukhala akukhulupirika. Nsangani wa amiyali andzeru na akusowa ndzeru usapangiza kuti tisafunika kukhala akukhunganyika na akuyang’anira. Pontho nsangani wa matalento usapangiza kuti tisafunika kuphata basa mwakuwanga na kucita pyonsene pinakwanisa ife.—Ncenjezi 09.24, tsa. 20-24.

Khonde ya templo ya Salomoni ikhadalapha tani?

Pa 2 Kronika 3:4, malemba anango akale asalonga “makhono 120” peno mametru 53 aulaphi. Mbwenye malemba anango akunyindirika asalonga “makhono 20” peno mametru 9 aulaphi, akuti asabverana na mphindza ya mapfufu a templo.—Ncenjezi 10.24, tsa. 31.

Mafala akuti ntumiki wakutumikira ‘asafunika kukhala mamuna wa nkazi m’bodzi’ asabvekanji? (1 Tim. 3:12)

Asabveka kuti iye asafunika kumanga banja basi ene na nkazi m’bodzi, pontho nee asafunika kucita ulukwali. Kusiyapo pyenepi, iye nee asafunika kusirira akazi anango.—Ncenjezi 11.24, tsa. 19.

Thangwi yanji tinakwanisa kulonga kuti mafala anagumanika pa Juwau 6:53 nee akhalonga pya Cakudya Cancidodo ca Mbuya?

Pa Juwau 6:53 Yezu alonga kufunika kwa kudya manungo ace na kumwa ciropa cace. Yezu alonga mafala anewa mu caka 32 P.K.K., ku Galileya, kuna Ayuda akuti nee akhankhulupira. Mbwenye Cakudya Cancidodo ca Mbuya cakhazikiswa mu Yerusalemu pakupita caka cibodzi. Penepo Yezu alonga na anthu anafuna kutonga pabodzi na iye kudzulu.—Ncenjezi 12.24, tsa. 10-11.