MAI wanga andibvundzisa: “Thangwi yanji nee usafuna kulambira makolo ako? Nee usadziwa kuti uli na umaso thangwi ya iwo? Thangwi yanji nkhabe kupereka takhuta kuna iwo? Thangwi yanji usapwaza misambo yakuti tisaiphatisira kutomera kale? Kukhonda kulemedza makolo athu ndi sawasawa na kulonga kuti ulambiri wathu ngwapezi.” Buluka penepo, mai wanga atoma kulira.

Nee ndatawira kuti ndi mama akhalonga pyenepi. Kusiyapo pyenepi, ndiye adacita masasanyiro toera ndipfundze Bhibhlya, maseze iye acita pyenepi toera akhonde kupfundziswa Bhibhlya. Ndzidzi onsene ndikhabvera mama, natenepa pikhandinentsa kupwaza pitsogolero pyace. Mbwenye cincino ndikhafunika kucita pyenepi toera kukomeresa Yahova. Mwakusowa ciphedzo ca Yahova, ine nee mbandidakwanisa kucita pyenepi.

Ninga anthu azinji a ku Japau, ife tikhali auphemberi wa Budhista. Mbwenye pidapita nthanda ziwiri mbandikapfundza Bhibhlya na Mboni za Yahova, ndakhala na cinyindiro cakuti Bhibhlya ndi yandimomwene. Pidapfundza ine kuti ndiri na Baba wakudzulu, mwandimomwene, ndafuna kakamwe kundziwa. Ine na mama tikhacedza mwakutsandzaya thangwi ya pikhapfundza ine. Ndatoma kuenda kumisonkhano Kunyumba ya Umambo n’Dimingu. Pikhathimizirika cidziwiso canga caundimomwene, ndapanga mama kuti nee mbidacitabve khundu m’misambo ya uphemberi wa Budhista. Mwakucimbiza, iye acinja manyerezero ace. Iye alonga: “Mphyamanyadzo kukhala na munthu m’banja wakuti nee asafuna makolo athu.” Iye atonga kuti ndileke kupfundza Bhibhlya nee kuenda kumisonkhano. Cipo ndanyerezera kuti mama mbadalonga mafala anewa! Iye akhadacinja kakamwe.

Pai wanga aphedzera maonero a mama. Pa Aefesi kapitulu 6, ndapfundza kuti Yahova asafuna kuti ndibvere anyakubalanga. Natenepa, ndatonga kuabvera, mbandinyerezera kuti pinatiphedza toera kukhala pontho mu ntendere pa banja yathu. Pa ndzidzi unoyu, ndikhafunika kukhunganyika toera kucita exame kuxikola, ndatonga kubvera maonero a anyakubalanga mu nthanda zitatu. Mbwenye ndapikira kuna Yahova kuti ndinadzaenda pontho kumisonkhano pakumala kwa ndzidzi unoyu.

Cisankhulo canga nee cikhali cadidi munjira ziwiri. Pakutoma, ndanyerezera kuti mabvero anga nee mbadacinja mu nthanda zitatu. Mbwenye mwakukhonda dembuka, uxamwali wanga na Yahova watoma kufewa. Buluka penepo, m’mbuto mwakunditsalakana mwadidi, baba na mama atoma kundipingiza kakamwe toera ndisiye kutumikira Yahova.

Kunyumba ya Umambo, ndadziwana na abale na alongo azinji akuti akhathimbanambo na mitcingo ya anyakubala awo. Iwo andipasa cinyindiro _cakuti Yahova mbadandiphedza. (Mat. 10:34-37) Alonga kuti kubulukira mwa ine, acibale anga mbadakwanisa kudziwa Yahova na kuwina umaso. Natenepa, ndatoma kucita phembero mwaphinga, na cifuno cakupfundza kunyindira Yahova.

M’banja mwathu, mitcingo ikhacitika munjira zakusiyana-siyana. Mama andidembetera toera ndisiye kupfundza Bhibhlya mbayesera kundipanga mathangwi ace. Mbwenye kazinji kene, ndikhamatama pyanga. Pikhatoma ine kulonga, tikhaketesana thangwi uwiri wathu tikhayesera kupangiza kuti tiri na mathangwi adidi. Natenepa, ndadzindikira kuti ndingalemedza mabvero a mama na pinakhulupira iwo, nee mbatidaketesana. Anyakubalanga andipasa mabasa mazinji toera ndikhonde kubuluka panyumba. Midzidzi inango akhandifungira kunja peno kukhonda kundisiyira cakudya.

Mai wanga akhaphemba ciphedzo ca anango. Iye alonga na mpfundzisi wanga, mbwenye pyenepi nee pyaphedza. Iye andikwata mbatienda kuna patrau wace wakubasa toera ndikhulupire kuti mauphemberi onsene mbapezi. Panyumba, Mama akhayesera kumenyera ntokodzi acibale akusiyana-siyana, pontho akhalira mu ndzidzi ukhaphemba iye ciphedzo. Pyenepi pikhanditsukwalisa kakamwe, mbwenye pa misonkhano akulu ampingo andipanga kuti mu ndzidzi ukhalonga mama na anthu anango thangwi ya pyenepi, iye akhapereka umboni kuna iwo.

Anyakubalanga akhafuna kuti ndiende ku universidade toera patsogolo ndigumane basa yadidi. Tonsene nee tikhabverana pikhayesera ife kucedza ya pyenepi, natenepa ndalembera anyakubalanga matsamba mazinji mbandiapanga pifuno pyanga. Baba akhadaipirwa kakamwe, mbalonga:  “Khala usanyerezera kuti unagumana basa, uigumane mangwana, ungakhonda kuigumana ubuluke panyumba ino.” Ndacita phembero kuna Yahova, mbandimphemba toera andiphedze. Mangwana mwace, pikhali ine mu utumiki, ndagumanikana na alongo awiri m’midzidzi yakusiyana, iwo andiphemba toera kupfundzisa anawo. Ngakhale tenepo, Baba nee akomerwa na pyenepi, atoma kundipwaza mbasiya kulonga na ine. Mama alonga kuti mbapidakhala mwadidi kwa ine kukhala phanga, mbuto mwakukhala m’bodzi wa Mboni za Yahova.

Midzidzi inango ndikhapenula khala Yahova asafunadi kuti ndithimbane na anyakubalanga munjira ineyi. Natenepa ndikhacita phembero kuna Yahova na kunyerezera mwacidikhodikho pinalonga Bhibhlya thangwi ya ufuni wace, pyenepi pyandiphedza toera kubvesesa kuti anyakubalanga akhanditsalakana munjira ineyi thangwi akhadzudzumika na ine. Yahova andiphedza toera ndikwanise kukhala na manyerezero akulinganira na kudziwa njira toera kutsalakana nkandzo unoyu. Kusiyapo pyenepi, ndikhali wakutsandzaya kakamwe thangwi yakucita khundu mwakukwana mu utumiki. Natenepa, ndakhazikisa cifuno cakutumikira ninga mpainiya.

Pidabva alongo awiri kuti ndisafuna kutumikira ninga mpainiya, iwo andipanga kuti ndikhafunika kudikhira mpaka anyakubalanga akhurudzike. Ndacita phembero mbandiphemba udziwisi, ndafufudza, pontho ndadinga mabvero anga na kucedza na abale na alongo akukola mwauzimu. Buluka penepo, ndadzindikira kuti ndikhafunika kukomeresa Yahova. Kusiyapo pyenepi, ndabvesesa kuti maseze ndidikhire pang’ono toera kutumikira ninga mpainiya, anyakubalanga mbadapitiriza kunditcinga.

Ndatoma kutumikira ninga mpainiya mu caka cakumalisa ca mapfundziro anga akuxikola. Mudapita pyaka pingasi mbadikatumikira ninga mpainiya, ndakhala na cifuno cakutumikira mu cisa cakuti cikhafunika kakamwe amwazi mphangwa. Mbwenye anyakubalanga nee akhafuna kuti ndibuluke panyumba. Natenepa, ndadikhira mpaka kukwanirisa pyaka 20 pyakubalwa. Buluka penepo, ndaphemba Ofesi ya Filiali toera katumikira kubangwe kwa dziko ya Japau kwakuti kukhali na acibale athu, toera anyakubalanga akhonde kudzudzumika.

Pikhatumikira ine kweneku, ndikhali wakutsandzaya kakamwe na kuona anyakupfundza anga a Bhibhlya mbakabatizwa. Nakuti ndikhali na cifuno cakuthimizira utumiki wanga, ndatoma kupfundza Cingerezi. M’mpingo ukhatumikira ine, mukhali apainiya awiri akupambulika. Ndikhakwanisa kuona phinga yawo na njira ikhaphedza iwo anango. Buluka penepo, ndakhazikisambo cifuno cakukhala mpainiya wakupambulika. Pa ndzidzi unoyu, mai wanga aduwala kakamwe m’maulendo mawiri. Natenepa, ndabwerera kawiri kunyumba toera kuntsalakana. Pyenepi pyankhuya kakamwe, pontho atoma kupangiza cilemedzo pang’ono kwa ine.

Mudapita pyaka pinomwe, ndatambira tsamba ya Atsushi, m’bodzi wa apainiya akupambulika adalongwa padzulu. Iye alonga kuti akhanyerezera pya kumanga banja, pontho akhafuna kudziwa makhaliro anga na mabvero anga. Mbwenye nee ndikhali na mabvero aufuni kuna Atsushi, peno kunyerezera kuti iye akhandifuna. Mudapita nthanda ibodzi, ndatumiza ntawiro, mbandimpanga kuti ndikhafuna kundziwa mwadidi. Buluka penepo, tadzindikira kuti tikhali na pifuno pibodzi pyene, mwacitsandzo, tonsene tikhafuna kupitiriza m’basa ya ndzidzi onsene mwakukhonda tsalakana ntundu wa basa ikhafuna ife kupaswa. Mukupita kwa ndzidzi, tamanga banja. Ndikhali wakutsandzaya kakamwe pidaona ine baba na mama, pabodzi na acibale anango adagumanika pa ntsiku yathu yakumanga banja!

Mudapita ndzidzi wakucepa, mbatikatumikira ninga apainiya a ndzidzi onsene, Atsushi aphembwa toera kutumikira ninga nyakuphedzera wa  muyang’aniri wa cisa. Mwakukhonda dembuka, tatambira nkhombo zinango. Takhazikiswa ninga apainiya akupambulika, buluka penepo tatumikira ninga muyang’aniri wa cisa. Pakumala kucedzera mipingo yonsene ya cisa cathu paulendo wakutoma, Ofesi ya Filiali yatimenyera ntokodzi, mbatibvundza: “Munatawira kuenda katumikira ninga muyang’aniri wa cisa ku Nepal?”

Ndikhadzudzumika kuti anyakubalanga mbadapibva tani thangwi ya kuenda kwanga katumikira kutali kakamwe. Natenepa, ndam’menyera ntokodzi. Baba atawira, mbalonga: “Mbuto inafuna imwe kuenda ndi yadidi kakamwe.” Mbidzati kufika sumana idamenya ine ntokodzi, Baba akhadapaswa bukhu na xamwali wace, inalonga pya ku Nepal, natenepa, iye anyerezera kuti ineyi ikhali mbuto yadidi toera kaiona.

Anthu a ku Nepal ndi auxamwali kakamwe, pontho ife tikhakomerwa kakamwe na basa yathu. Ntsiku inango tambira nkhombo inango. Cisa cathu mbacidaphataniza dziko ya Bangladesh, yakuti ikhali cifupi na Nepal, mbwenye ikhali yakusiyana kakamwe. Basa ya m’munda ikhacitwa mwakusiyana-siyana. Mudapita pyaka pixanu, taphembwa toera kubwerera ku Japau, mpaka lero, tisatumikira kuno na mamunanga wakuti ndi muyang’aniri wa cisa.

Pikhatumikira ine ku Bangaladesh, Nepal na ku Japau, ndapfundza pizinji kakamwe thangwi ya Yahova! Anthu a m’madziko anewa ali na misambo na makhaliro akusiyana-siyana. Pontho anthu onsene ndi akusiyana. Ndaona kuti Yahova asatsalakana tani anthu. Iye asaatawira, asaaphedza na kuapasa nkhombo.

Yahova andiphedza kakamwe, toera kundziwa mwadidi, kuntumikira, pontho na kundipasa mamuna wadidi Wacikristu. Mulungu andiphedza toera kucita pisankhulo pyadidi, lero ndiri na uxamwali wakuwanga na iye, pontho na anyakubalanga. Ndikupereka takhuta kuna Yahova, thangwi cincino ine na mama tisabverana kakamwe. Ndikupereka takhuta kakamwe thangwi ndiri mu ntendere na Mulungu na mai wanga.