A yeke na lege ti a-offrande so aTémoin ti Jéhovah amû na bê ti ala wani la ala yeke wara nginza ti sara na akua ti ala na yâ ti dunia kue. a A zia aboîte ti offrande na yâ ti ando so e yeke sara bungbi ti e dä, nga ambeni lege ti mungo a-offrande ni ayeke na ndö ti site jw.org na mbage “A-offrande”. A fa alege nde nde so mbeni zo apeut ti mû a-offrande ti aidé na akua ti e na yâ ti dunia kue wala ti aidé na yâ ti adépense ti ndo so e yeke dä, wala ti aidé na yâ ti aye ni use kue.

 A-Témoin ti Jéhovah ayeke hunda pëpe na azo ti bi dîme, ti mû mbeni mbilimbili wungo ti pata wala ti mû mbeni mbage ti nginza ti kua ti ala (2 aCorinthien 9:7). E yeke hunda lâ oko pëpe na azo ti bi nginza si ala ga na abungbi ti e wala ndali ti so ala ga na abungbi ti e, nga ti payé mbeni nginza ndali ti batême, lungo kuâ, mariage wala ndali ti ambeni kua so a sara na yâ ti bungbi ti e. E yeke wara pëpe nginza na lege ti ambeni ye so e kä ni moins cher, akermesse, amatanga, wala na lege ti ambeni ye so e organisé ni wala e hunda azo ti mû na e nginza. A yeke fa lâ oko ape, iri ti mbeni zo so amû nginza ti tene azo kue ahinga lo (Matthieu 6:2-4). Na ndö ti site Internet ti e nga na ambeti ti e ayeke wara pëpe apublicité so apeut ti sara si e wara gbâ ti nginza.

 Nze na nze, na yâ ti acongrégation ti aTémoin ti Jéhovah kue, a yeke fa wungo ti apata kue so a wara na ngoi ti abungbi ti e so zo kue apeut ti gue dä senge. Congrégation oko oko ayeke vérifié adossier ti nginza ni lakue, ti duti sûr so a yeke sara kua na anginza ni na lege ni (2 aCorinthien 8:20, 21).

•   Aboîte ti offrande: Mo peut ti zia nginza wala chèque na yâ ti aboîte ti offrande so ayeke na yâ ti aDa ti Royaume, aDa ti assemblée wala na ambeni ndo so e yeke sara bungbi dä.

•   A-offrande so a mû na lege ti Internet: Na yâ ti mingi ti akodro, mo peut ti gue na ndö ti mbage “Ti mû mbeni offrande na aTémoin na Jéhovah” ti mû offrande na lege ti carte ti crédit, carte bancaire, ti sara virement na banque wala na ambeni lege ni nde na lege ti Internet. b Ambeni Témoin ti Jéhovah amû desizion ti ‘zi mbeni ye ti bata’ nze oko oko ti mû na offrande lakue na mbeni oko ti alege so (1 aCorinthien 16:2).

•   Offrande so a leke tënë ti mungo ni kozo awe: Ambeni offrande ni so a hunda ti tene a leke aye ni kozo wala a bezoin wango ti azo so ahinga ye na ndö ti ndia. Mara ti lekengo aye ni so apeut ti sara si mo wara aye ti nzoni mingi na lege ti impôt ti kodro ti mo. Mingi ti azo awara aye ti nzoni mingi ndali ti asango kue so ala wara na ndö ti aye so a leke ti mû na a-offrande na ngoi so zo ni angbâ na fini wala na peko ti kuâ ti lo. Tongana mo ye ti mû offrande na popo ti mbeni oko ti alege so ge, e tisa mo ti iri ndo na filiale ti aTémoin ti Jéhovah ti ndo so mo yeke dä ti wara asango mingi na ndö ni:

  •   Compte bancaire

  •   Contrat ti assurance nga na nginza ti retraite

  •   Ada nga na akungba

  •   Actions nga na obligations

  •   Testaments nga na fidéicommis

 Ti wara asango mingi na ndö ti alege nde nde ti mungo a-offrande na ndo so mo yeke dä, gue na mbage “Ti mû mbeni offrande na aTémoin ti Jéhovah.”