Ên-ën, abungbi ti vorongo Nzapa kue ayeke oko ape. A yeke wara na yâ ti Bible, gbâ ti atapande ti abungbi ti vorongo nzapa so lo yeda na ni ape. Aye use ayeke dä so zo apeut ti hinga na abungbi ti vorongo nzapa ti wataka.

Kozo ye ni: Vorongo anzapa ti wataka

 Bible afa vorongo anzapa ti wataka tongana “senge senge ye,” “asenge senge ye,” nga ‘aye so aga na ye ti nzoni oko pëpe.’ (Jérémie 10:​3-5; 16:19, 20). Jéhovah a Nzapa atene lani na azo ti Israël, lo tene: “A lingbi mo voro ambeni nzapa nde pëpe, gï mbi oko awe.” (Exode 20:3, 23; 23:24). Na ngoi so azo ti Israël avoro lani ambeni Nzapa nde, “Jéhovah asara ngonzo ngangu.”​—Nombre 25:3; Lévitique 20:2; aJuge 2:​13, 14.

 A yeke oko bango ndo so Nzapa ayeke na ni na ndö ti azo so ayeke voro ‘aye so a iri ni atene anzapa.’ (1 aCorinthien 8:​5, 6; aGalate 4:8). Lo hunda na azo so ayeke voro lo ti sara songo pëpe na azo so ayeke voro anzapa ti wataka, lo tene: “Ala sigi na popo ti azo ni, ala duti nde.” (2 aCorinthien 6:​14-​17). Tongana abungbi ti vorongo Nzapa kue ayeke oko na ague na zo na Nzapa, ka ngbanga ti nyen la lo mû mara ti commandement tongaso?

Use ye ni: Abungbi ti vorongo nzapa so ayeke voro tâ Nzapa na mbeni lege so lo yeda na ni ape

 Teti ambeni ngoi, azo ti Israël amä na bê na anzapa ti wataka nga ala sara ye tongana ti azo so avoro anzapa ni. Me, Jéhovah ake ti tene ala bungbi tâ vorongo na vorongo ti wataka (Exode 32:8; Deutéronome 12:2-4). Jésus afâ ngbanga lani na ndö ti akota zo ti bungbi ti nzapa ti ngoi ti lo ndali ti fason so ala yeke voro na Nzapa; me ala sara ye lani na handa na lege so ‘ala bâ na nene ni pëpe aye so ayeke kota so Ndia ahunda: So ti tene mbilimbili, sarango nzoni bê na zo nga dutingo be-ta-zo.’​—Matthieu 23:23.

 Legeoko nga laso, gï bungbi ti vorongo Nzapa so ayeke fa tâ tënë la ayeke gue na zo na Nzapa. A yeke wara tâ tënë ni so na yâ ti Bible (Jean 4:​24; 17:17; 2 Timothée 3:​16, 17). Abungbi ti vorongo nzapa so afa aye so ague nde na Bible ayeke sara si azo ahon yongoro na Nzapa. Mingi ti azo apensé so afango ye, tongana tënë ti Trinité, tënë ti âme so akui ape nga na tënë ti enfer alondo na yâ ti Bible, me aye ni so alondo na vorongo anzapa ti wataka. Vorongo so alondo na mara ti afango ye ni so ayeke “senge senge,” wala aye so aga na ye ti nzoni oko pëpe ndali ti so angobo ti azo amû place ti acommandement ti Nzapa.​—Marc 7:7, 8.

 Nzapa ake abungbi ti nzapa so ayeke sara ye na handa (Tite 1:​16). Ti mû maboko na azo ti ga nduru na Nzapa, mbeni bungbi ti vorongo Nzapa adoit ti sara si sarango ye ti azo ni lâ oko oko ague oko na tënë ti Nzapa ni, me pëpe ti tene azo ni asara ye alingbi na angobo wala ala sara ye ni gï tongaso. Na tapande, Bible atene: “Tongana mbeni zo abâ ti lo so lo yeke zo so lo ye Nzapa mingi si na mbage lo bata yanga ti lo pëpe, lo yeke handa bê ti lo wani la, na vorongo Nzapa ti zo ni so ayeke senge senge. Vorongo Nzapa so ayeke na sioni pëpe nga so saleté ayeke dä pëpe na lê ti Nzapa Babâ ti e ayeke so: ti bâ lege ti anyindu na awali-mua na yâ ti pasi ti ala, nga ti kpe terê ti mo si mbeni saleté ti dunia so andu mo pëpe.” (Jacques 1:26, 27; kete tënë na gbe ni). Mbeti ti Nzapa, Tënë so amu fini asara kua na tënë “vorongo Nzapa so sioni ye oko ayeke dä pëpe” ti fa vorongo so ye ti saleté ayeke dä ape nga so ye ti handa ayeke dä ape.