Fani mingi Bible wani afa polele azo so asû atënë ti yâ ni. Na ambeni mbage ti Bible ni akomanse atënë ni na tenengo tënë so: “Tënë ti yanga ti Néhémie,” “tënë ti aye so Ésaïe . . . abâ na yâ ti vision”, nga na “Jéhovah atene na Joël”.—Néhémie 1:1; Ésaïe 1:1; Joël 1:1.

 Gbâ ti azo so asû Bible ayeda so ala sû ni na iri ti Jéhovah, so ayeke oko tâ Nzapa, nga so ala sû ni na gbe ti fango lege ti lo. Aprophète so asû mbage ti Bible so ayeke na yanga ti Hébreu atene mbeni tënë ahon fani 300 tongaso, tënë ni so ayeke: “Bâ tënë so Jéhovah atene la.” (Amos 1:3; Michée 2:3; Nahum 1:12). Ti ambeni zo ti sungo Bible ni, a-ange la afa peko ti atënë ti Nzapa ni na ala.—Zacharie 1:7, 9.

 Akoli 40 tongaso la asû Bible na a mû ngu 1600 tongaso ti tene a hunzi ni. Ambeni asû ambeti ti Bible ni mingi ahon amba ti ala. Bible ayeke mbeni kete bibliothèque ti abuku 66. A yeke wara na yâ ni abuku 39 ti Bible so a sû na yanga ti Hébreu, so azo mingi a iri ni Testament ti Giriri, nga na abuku 29 so aChrétien asû na yanga ti Grec, mingi ni a iri ni Fini Testament.