“Fa na molenge ti koli lege so a yeke nzoni lo mû; même na ngoi so lo ga mbakoro, lo yeke zia ni pëpe.”—aProverbe 22:6, Mbeti ti Nzapa ti fini dunia.

 “Na ngoi so molenge angbâ kete, mo fa nzoni lege na lo; atâa lo ga mbakoro, fade lo yeke zia lege ni pëpe.”—aProverbe 22:6, Mbeti ti Nzapa, Tënë so amu fini.

 Ababâ na amama so afa na amolenge ti ala ti ye Nzapa nga ti kpe andia ti lo, a yeke bâ ande so ye so ala fa na amolenge ti ala, a yeke aidé amolenge ni na yâ ti gigi ti ala kue.

 “Fa na molenge ti koli lege so a yeke nzoni lo mû.” A peut ti kiri na peko ti atënë so na “fa na molenge lege so a lingbi lo gue dä.” Fani mingi, mbeti ti aProverbe a-encouragé ababâ na amama ti fa na amolenge ti ala ye so ayeke nzoni nga na ye so ayeke sioni na ngoi so ala ngbâ kete (aProverbe 19:18; 22:15; 29:15). Me, ababâ na amama so asara ye na ndoye ahinga so, tongana ti akota zo, amolenge ti ala nga ayeke na liberté ti soro ye. Tongaso, ahon ti tene ala fa na amolenge ti ala ye so ala doit ti sara, ala sara lisoro na amolenge ni nga ala aidé ala ti tene na ngoi so ala kono ala wani apeut ti mû anzoni desizion.—Deutéronome 6:6, 7; aColossien 3:21.

 Ambeni wandara ti Bible afa so tënë so aye ti tene “fa ye na molenge alingbi na dutingo ti lo,” wala alingbi na akode ti lo. Tënë so apeut ti kpa mbeni tënë so ayeke na lege ni, me tënë ti Hébreu so a kiri peko ni na “lege so a yeke nzoni lo mû” aye ti sara tënë ti fason so zo ayeke vivre na ni so ayeke nzoni nga so ayeke mbilimbili. Mbeti ti aProverbe afa alege use so zo apeut ti mû ni. A iri mbeni lege ni “lege ti anzoni zo,” “lege ti ndara,” nga “nzoni lege.” (aProverbe 2:20; 4:11; 23:19). A iri nga mbeni “lege ti asioni zo,” “lege ti wabuba,” nga “sioni lege.” (aProverbe 4:14; 12:15; 16:29). Lege so “a lingbi” mbeni molenge ‘ague dä’ aye ti sara tënë ti “nzoni lege”, so ti tene, lege ti fini so a fa ni na yâ ti Mbeti ti Nzapa, so ayeke Bible.—Psaume 119:105.

 “Même na ngoi so lo ga mbakoro, lo yeke zia ni pëpe.” Tongana ababâ na amama afa na amolenge ti ala andia ti Nzapa, amolenge ni apeut ande ti ngbâ na ndö ti nzoni lege na yâ ti gigi ti ala kue. Me, aye ti tene ape so tongana a fa ye nzoni na mbeni molenge lo yeke “zia” ande nzoni lege ni ape wala lo yeke ke andia ti Nzapa ape. Na tapande, tongana mbeni zo amû ngoi mingi ti duti na terê ti azo so ayeke sara ye ti sioni, lo peut ande ti zia “lege ti mbilimbili” nga lo yeke sara ye so ayeke sioni (aProverbe 2:12-16; 1 aCorinthien 15:33). Même tongana ye tongaso asi ande, tongana ababâ na amama afa na amolenge ti ala ti sara ye alingbi na andia ti Nzapa, ala yeke mû lege na amolenge ni ti duti nzoni na yâ ti gigi ti ala.—aProverbe 2:1, 11.

 A yeke wara na yâ ti aProverbe chapitre 22 anduru phrase so ayeke aidé e ti sara ye alingbi na atënë ti ndara ti Nzapa na yâ ti aye nde nde na yâ ti fini ti e. Atënë so afa so ayeke kota ye ti gi ti duti na nzoni iri na gbele Jéhovah, a mbeni zo apeut ti duti na nzoni iri tongana lo sara terê ti lo kete, lo mû ye na zo nga lo sara kua ngangu (aProverbe 22:1, 4, 9, 29). Na mbage, ambeni versê afa so azo so asara ye alingbi na andia ti Nzapa ape nga so ayeke sara ye ti sioni na awayere, ala yeke wara ande aye ti peko ni.—aProverbe 22:8, 16, 22-27.

 Atâa so mingi ti aversê ti aProverbe chapitre 22 asara tënë ti fango ye na amolenge ape, me a fa mbeni lege so apeut ti sara si zo anzere na lê ti Nzapa nga lo duti na tâ ngia (aProverbe 22:17-19). Tongana ababâ na amama afa na amolenge ti ala ti mû lege ti fini, ala fa so ala ye ti tene amolenge ti ala aduti nzoni na yâ ti gigi ti ala.—aÉphésien 6:1-3.

 Bâ nduru vidéo so ti bâ ambeni ye so ayeke na yâ ti mbeti ti aProverbe.