CHAPITRE 13
Timothée aye lani ti mû maboko na azo
Timothée ayeke lani mbeni molenge-koli so ayeke na ngia ti mû maboko na azo. Lo voyagé na ando nde nde ti mû maboko na azo. Ye so asara si lo yeke lani na aye mingi ti sara na yâ ti kua ti Jéhovah. Mo ye ti hinga tënë na ndo ti lo?—
Mama ti Timothée nga na âta ti lo afa tënë ti Jéhovah na lo
Timothée akono na kodoro ti Lystres. Na kete ti lo, âta ti lo ti wali, Loïs, nga na mama ti lo, Eunice, afa na lo ye na ndo ti Jéhovah. Tongana Timothée ayeke kono, lo ye lani ti mû maboko na azo ti hinga Jéhovah.
Tongana Timothée akpengba koli awe, Paul ahunda na lo si lo ye ti tene lo na lo avoyagé na ambeni kodoro ti fa tënë kâ. Timothée ayeda. Lo ye lani ti gue ti mû maboko na azo.
Timothée na Paul ague na Thessalonique, mbeni kete kodoro ti Macédoine. Me ti gue kâ, a hunda ti tambela na gere ngbii, nga ti mû bateau. Tongana ala si kâ, ala fa tënë ti Jéhovah na gbâ ti azo. Me, bê ti ambeni zo ni ason na tere ti Paul na Timothée ni si ala ye ti sara sioni na ala. Tongaso, aPaul ni azia kodoro ni, ala gue na mbeni ndo nde ti fa tënë kâ.
Timothée ayeke lani na ngia mingi
Ambeni ngoi na pekoni, Paul ahunda na Timothée ti gue encore na Thessalonique ni ti bâ wala aita ni kâ ayeke nzoni. Me lani na Thessalonique ni azo aye ti sara sioni na ala. Atâa so kue, Timothée asara mbeto ape, lo gue ngbanga ti so lo pensé na aita ti lo kâ. Tongana lo kiri awe, lo ga na nzoni tënë na Paul. Lo tene na lo so aita ni kâ kue ayeke nzoni.
Timothée na Paul asara lani kua ala use use a ninga. Même mbeni lâ, Paul atene so Timothée la ayeke tâ nzoni zo so lo lingbi ti tokua lo ti mû maboko na acongrégation. Timothée aye Jéhovah mingi nga lo ye azo mingi.
Mo ye azo?— Mo ye nga ti mû maboko na ala ti hinga Jéhovah?— Tongana a yeke ni, mo yeke duti ande na ngia mingi tongana ti Timothée nga mo yeke duti ande na aye mingi ti sara na yâ ti kua ti Jéhovah.
