Na ngoi so Jéhovah azia na sese ye so a iri ni sewa, lo mû na ababâ na amama kua ti bâ lege ti amolenge ti ala (aColossien 3:20). A yeke na mo babâ wala mama ti fa na molenge ti mo ti ye Jéhovah nga ti kono ti ga zo so ahinga ti mû adesizion (2 Timothée 1:5; 3:15). A yeke nzoni mo gi nga ti hinga ye so ayeke na yâ ti bê ti molenge ti mo ti koli wala ti wali. Me, tapande ti mo wani la ayeke kota ye. Mo yeke fa ande nzoni mingi tënë ti Jéhovah na molenge ti mo tongana mo bata ni na yâ ti bê ti mo wani kozoni.​—Psaume 40:9.

YE SO BIBLE ATENE: “A lingbi zo oko oko aduti nduru ti mä tënë, ti sara tënë hio hio pëpe.” (Jacques 1:19). Ye so mo ye ayeke ti tene amolenge ti mo abâ so a yeke ngangu na ala ape ti sara tënë na mo. A yeke nzoni ala hinga so mo yeke nduru ti mä ala tongana ala ye ti sara tënë na mo. Sara si siriri aduti na yâ ti sewa ti mo si ala bâ so a yeke ngangu ape na ala ti fa tënë ti bê ti ala (Jacques 3:18). Tongana ala bâ so mo son songo wala mo luti gi nganganga, ala lingbi ti zi bê ti ala na mo ape. Kanga bê ti mo na tere ti amolenge ti mo nga fa na ala lakue so mo ye ala.​—Matthieu 3:17; 1 aCorinthien 8:1.

YE SO MO LINGBI TI SARA:

• Duti nduru ti mä amolenge ti mo tongana ala ye ti sara tënë na mo

• Sara lisoro lakue na amolenge ti mo, me pëpe gi na ngoi so akpale ayeke dä

YE SO BIBLE ATENE: “Zo so amä tënë, fade lo wara nzoye.” (aProverbe 16:20). Na ambeni ngoi, a yeke nzoni mo hinga ye so ayeke na peko ti atënë ti amolenge ti mo si mo hinga biani ye so agbu bê ti ala. Mingi ni, amolenge ayeke kono ka yâ ti atënë wala ala yeke tene atënë so alondo biani na bê ti ala ape. Bible atene: “Zo so akiri tënë kozoni si lo mä tënë ni, so ayeke ye ti buba.” (aProverbe 18:13). Ni la, sara ngonzo hio ape.​—aProverbe 19:11.

YE SO MO LINGBI TI SARA:

• Leke na bê ti mo ti fâ tënë na yanga ti amolenge ti mo ape wala ti sara ye ahon ndo ni ape atâa tënë ti nyen la ala tene

• Tara ti dabe ti mo na ye so agbu bê ti mo lani na ngoi so mo yeke na oko ngu ti ala nga na ye so ayeke kota ye na lê ti mo

YE SO BIBLE ATENE: “Molenge ti mbi, mo mä wango tënë ti babâ ti mo, na mo zia lege ti wango tënë ti mama ti mo pëpe.” (aProverbe 1:8). A yeke ala use kue, babâ na mama, si Jéhovah azia ala na ndo ti amolenge ti ala. A lingbi mo fa na amolenge ti mo ti ne mo nga ti mä yanga ti mo (aÉphésien 6:1-3). Tongana babâ na mama aduti “biani beoko na yâ ti bibe oko” pëpe, amolenge ti ala alingbi ti hinga ni hio (1 aCorinthien 1:10). Tongana yanga ti ala ague oko ape, sara kue ti fa ni ape na lê ti amolenge ti ala, ngbanga ti so a lingbi ti sara si amolenge ni ane ala pëpe tongana ti kozo.

YE SO MO LINGBI TI SARA:

• Ala sara lisoro nga ala mä tere na ndo ti kode so ala yeke fa lege na amolenge ti ala

• Tongana bango ndo ti mo ayeke nde na ti koli ti mo wala wali ti mo na ndo ti kode ti fango ye na amolenge ti ala, gi ti hinga pensé ti lo nga

YE SO BIBLE ATENE: “Fa na molenge lege so a lingbi lo gue dä.” (aProverbe 22:6). Ti bata amolenge ti mo si ala ga anzoni zo ayeke si gi tongaso ape. A yeke nzoni mo hinga kozoni ye so mo ye ti sara, so a ndu nga fango lege na ala (Psaume 127:4; aProverbe 29:17). Fango lege na amolenge aye pëpe ti tene gi ti punir ala. A hunda nga ti mû maboko na ala ti hinga ndani so babâ na mama ti ala alu ambeni ndia (aProverbe 28:7). Fa nga na ala ti ye Mbeti ti Nzapa nga ti hinga anene tënë so ayeke na yâ ni (Psaume 1:2). Ye so ayeke mû maboko na ala ande ti duti na mbeni nzoni yingo-ti-hinga.​—aHébreu 5:14.

YE SO MO LINGBI TI SARA:

• Sara kue si amolenge ti mo abâ Nzapa tongana mbeni Babâ so ala lingbi ti zia bê ti ala kue na lo

• Fa na ala ti hinga nga ti kpe ambeni kpale, na tapande akpale so ayeke na aplace so azo ayeke sara kamarade dä na ndo ti Internet. Fa na ala tongana nyen ti kpe azo so aye ti lango na amolenge na ngangu