Genèse 39:1-23
39 Âdu ti Joseph, a gue na lo na Égypte;+ na Potiphar,+ zo ti Égypte, mbeni kota zo ti yangbo ti Pharaon nga mokonzi ti agarde, avo lo na maboko ti azo ti mara ti Ismaël+ so ague na lo kâ.
2 Me Jéhovah ayeke na Joseph,+ tongaso ye kue so lo sara aga nzoni, na lo la a zia lo na ndö ti da ti wa ti lo, zo ti Égypte ni.
3 Wa ti Joseph ahinga so Jéhovah ayeke na lo, nga lo hinga so aye kue so Joseph asara, Jéhovah asara si aye ni aga nzoni.
4 Joseph anzere na lê ti wa ti lo nga lo yeke lakue na terê ti lo ti sara kua na lo. Tongaso, lo zia Joseph na ndö ti da ti lo, nga aye ti lo kue, lo zia ni na maboko ti Joseph.
5 Ti londo na ngoi so lo zia lo na ndö ti da ti lo nga na ndö ti aye ti lo kue, Jéhovah angbâ gï ti sara tufa na ndö ti da ti zo ti Égypte ni ndali ti Joseph, nga tufa ti Jéhovah ayeke na ndö ti aye kue so lo yeke na ni na yâ ti da nga na ngonda.+
6 Tongaso, lo zia aye ti lo kue na maboko ti Joseph; lo bi bê ti lo na mbeni ye oko pëpe, gï kobe so lo yeke te awe. Na ndö ni, Joseph ayeke pendere koli mingi.
7 Na peko ti aye so, wali ti wa ti Joseph ato nda ti bâ lo na nzara ni na ti tene na lo: “Lango na mbi ma.”
8 Me lo yeke ke ka, na lo yeke tene na wali ti wa ti lo, lo tene: “Bâ, wa ti mbi ayeke hunda mbi pëpe na ndö ti aye ti lo so ayeke na yâ ti da so, nga aye ti lo kue, lo zia ni na maboko ti mbi.
9 Na yâ ti da so, mbeni zo so ayeke kota ahon mbi ayeke dä pëpe, nga lo gbanzi ye oko na mbi pëpe, gï mo oko awe, ndali ti so mo yeke wali ti lo. Tongaso mbi lingbi ti sara kota ye ti sioni so tongana nyen? Nga mbi lingbi ti sara siokpari na terê ti Nzapa tongana nyen?”+
10 Tongaso, lo yeke sara tënë na Joseph lâ na lâ, me Joseph ayeda lâ oko pëpe ti bungbi na lo wala ti ngbâ na terê ti lo.
11 Mbeni lâ, na ngoi so Joseph alï na da ti sara kua ti lo, zo ti kua oko ayeke na yâ ti da ni pëpe.
12 Tongaso, wali ni agbu bongo ti Joseph na lo tene: “Lango na mbi!” Me Joseph azia bongo ti lo ni na maboko ti wali ni, na lo kpe lo sigi.
13 Gï so wali ni abâ so Joseph azia bongo ti lo na maboko ti lo na lo kpe lo sigi,
14 lo to nda ti iri azo ti kua ni nga lo tene na ala: “Ala bâ awe! Hébreu so koli ti mbi aga na lo so, lo ye ti sara si e ga ye ti ngia. Lo ga na terê ti mbi ti lango na mbi, me mbi komanse ti dekongo ngangu.
15 Gï so lo bâ so mbi yeke dekongo ngangu, lo dö bongo ti lo, lo zia na terê ti mbi, lo kpe lo sigi.”
16 Na pekoni, lo bata bongo ni nduru na terê ti lo juska wa ti Joseph akiri.
17 Lo tene na lo oko tënë ni, lo tene: “Zo ti kua ni, Hébreu so mo ga na lo na e so, lo ga na terê ti mbi ti sara si mbi ga ye ti ngia.
18 Me gï so mbi komanse ti dekongo ngangu, lo dö bongo ti lo, lo zia na terê ti mbi, lo kpe lo sigi.”
19 Gï so wa ti Joseph amä tënë so wali ti lo atene na lo, atene: “Bâ aye so zo ti kua ti mo asara na mbi so,” ngonzo agbu lo ngangu!
20 Tongaso wa ti Joseph amû lo azia lo na da ti kanga, ndo so a yeke kanga azo ti kanga ti gbia dä, na lo ngbâ kâ na da ti kanga ni.+
21 Me Jéhovah ayeke na Joseph lakue, na lo ngbâ ti fa tâ ndoye na Joseph nga lo sara si Joseph anzere na lê ti kota zo ti da ti kanga ni.+
22 Tongaso kota zo ti da ti kanga azia azo ti kanga ni kue na maboko ti Joseph. Ye kue so ala sara kâ, Joseph la amû yanga si ala sara ni.+
23 Kota zo ti da ti kanga ni ayeke bâ lege ti ye oko pëpe so a zia lo na ndö ni, ndali ti so Jéhovah ayeke na Joseph. Ye kue so lo sara, Jéhovah asara si a ga nzoni.+
