Jude 1:1-25
1 Jude, ngbâa ti Jésus Christ, me ita ti Jacques,+ atokua mbeti so na ala so Nzapa airi ala,+ ala so Nzapa Babâ ni andoye ala nga so a bata ala nde ndali ti Jésus Christ:+
2 Zia Nzapa angbâ ti sara nzoni bê mingi mingi na ala, ti mû na ala siriri mingi mingi nga ti ndoye ala mingi mingi.
3 Ala so mbi ndoye ala mingi, mbi sara fade ngangu kue ti sara mbeti na ala na ndö ti oko salut so mbi na ala e yeke na ni.+ Me mbi bâ so a yeke nzoni ti sara mbeti na ala ti wa ala ti tiri ngangu ndali ti mabe+ so a mû ni gï fani oko biani biani awe na azo ti be-vulu.
4 Ndani ayeke so, ambeni zo alï na popo ti ala na mayele, azo so Mbeti ti Nzapa afa ala giriri awe ti wara ngbanga so. Ala yeke azo so akpe mbeto ti Nzapa pëpe, ala mû kota nzobe ti Nzapa ti e tongana mbeni raison ti sara sioni ye sân kamene.*+ Ala duti be-ta-zo pëpe na lo oko so ayeke Wa* ti e nga na Seigneur ti e, Jésus Christ.+
5 Atâa so mbi hinga so ala hinga atënë ni kue awe, mbi ye ti dabe ti ala na ni: Jéhovah* azi lani mbeni mara na sese ti Égypte,+ me na pekoni lo futi ala so asara ye na mabe pëpe.+
6 Ti a-ange so abata lani kozo ndo ti ala pëpe, me so adö tâ ndo ti duti ti ala azia,+ lo kanga ala na achaîne so angbâ lakue lakue na lo bata ala na yâ ti bingo so avuko pitipiti ti ku na ngbanga ti kota lango ni.+
7 Sodome na Gomorrhe, legeoko na agbata so angoro ala, asara tongana a-ange so. Ala sara lani lango-sioni* ahon ndö ni na ala gue na peko ti anzara ti mitele+ so ague nde na ye so Nzapa aleke; a zia akodro so tongana mbeni tapande ti gbotongo mê ndali ti e na lege so ala wara ngbanga ti wâ ti lakue lakue.+
8 Atâa so kue, akoli so nga kue ayeke mû peko ti asioni bibe* ti ala, ala sara si mitele aga sioni na ala bâ ala so akomande* na ndö ti ala tongana ambumbuse zo. Ala yeke sara sioni tënë na terê ti ala so Nzapa amû gloire na ala.+
9 Me na ngoi so tënë alondo lani na popo ti archange+ Michel+ na Zabolo si ala papa na ndö ti kuâ ti Moïse,+ lo tara pëpe ti dë ngbanga na li ti Zabolo na asioni tënë,+ me lo tene: “Zia Jéhovah* asuku na mo.”+
10 Me akoli so ayeke sara sioni tënë ti aye kue so ala mä yâ ni mbilimbili pëpe.+ Me ti aye kue so ala mä yâ ni gï tongaso, tongana ti anyama so ahinga ndo pëpe so,+ ala ngbâ gï ti buba terê ti ala na ni.
11 Mawa na ala, ndali ti so ala mû lege ti Caïn.+ Ala dö terê ti ala ti mû sioni lege ti Balaam+ ti wara futa. A futi ala ndali ti tënë so ala tene ti ke yanga+ tongana ti Coré.+
12 Na ngoi ti amatanga so ala, aita, ala yeke sara na popo ti ala,+ akoli so aduti dä tongana akota tênë so ahonde terê ti ala na gbe ti ngu. Ala yeke aberger so agi kobe na yanga ti ala wani na mbeto pëpe.+ Ala yeke ambinda so ngu ayeke dä pëpe so pupu ahon na ni kirikiri.+ Ala yeke akeke so alë lengo pëpe tongana ngoi ni alingbi, ala kui fani use,* a gboto ala na gunda ni kue.
13 Ala yeke asioni mapo ti ngu-ingo so ayengi kirikiri si amousse ni alondo, amousse ni so ayeke asarango ye ti ala so amû kamene na ala.+ Ala yeke atongoro so mbilimbili lege ti ala ayeke dä pëpe, so a bata vukongo ndo ti bingo ndali ti ala lakue lakue.+
14 Hénok,+ so aga na molongo mbasambala ni na yâ ti hale ti Adam, atene ândö prophétie na ndö ti azo so, tongana lo tene: “Bâ, Jéhovah* aga lani na a-ange ti lo saki na saki so ayeke nzoni-kue,+
15 lo fâ ngbanga na ndö ti ala kue,+ lo wara tënë na li ti ala kue so akpe Nzapa pëpe ndali ti akusala kue so ala sara so afa so ala kpe Nzapa pëpe. Nga lo wara tënë na li ti ala na ndö ti atënë ti songo bê kue so awasiokpari so akpe Nzapa pëpe atene na terê ti lo.”+
16 Akoli so ayeke azo ti dikongo tënë na gbe ti go,+ azo so ayeke dema terê tënë ti gigi ti ala, ala yeke sara ye alingbi na nzara ti bê ti ala wani.+ Yanga ti ala ayeke sara nzoni tënë ti ala wani, si na oko ngoi ni ala yeke gonda azo gï ti wara nzoni dä.+
17 Âdu ti ala, ala so mbi ndoye ala mingi, zia ala dabe ti ala na aye so abazengele ti Seigneur ti e Jésus Christ atene ândö,
18 ala yeke tene lani na ala atene: “Na lâ ti nda ni,* azo ti hengo ndo ayeke ga ande. Ala yeke sara ye alingbi na anzara ti bê ti ala wani ndali ti aye so amû gonda na Nzapa pëpe.”+
19 Ala yeke azo so ayeke ga na kangbi,+ sarango ye ti terê ti ala ayeke tongana ti anyama,* mbeni ye ti yingo ayeke na terê ti ala pëpe.
20 Me ti ala, ala so mbi ndoye ala mingi, ala sara si ala wani ala kpengba na ndö ti fondation ni so ayeke mabe ti ala so ayeke nzoni ahon tanga ti aye kue, nga ala sambela na yingo vulu,+
21 tongaso si ala ngbâ na yâ ti ndoye ti Nzapa,+ na oko ngoi ni ala ku ti tene Seigneur ti e Jésus Christ asara nzoni bê na ala si ala wara fini ti lakue lakue.+
22 Nga, zia ala ngbâ ti sara nzoni bê+ na ambeni zo so ayeke na kite.+
23 Ala sö azo so+ na gbotongo ala na lê ti wâ. Me zia ala ngbâ ti sara nzoni bê na ambeni zo ni, ala sara tongaso na mbeto, na oko ngoi ni ala ke même bongo so mitele asara saleté na terê ni.+
24 Nzapa alingbi ti bata ala si ala pika gere pëpe nga ti zia ala na gbele gloire ti lo na yâ ti kota ngia na sioni oko na terê ti ala pëpe.+
25 Zia a mû na oko Nzapa, Sauveur ti e na lege ti Jésus Christ Seigneur ti e, gloire, kota ndo ti gbia, ngangu na komandema na angoi kue so ahon kozo, fadeso nga lakue lakue. Amen.
Akete tënë na terê ni
^ Grec: asélgéïa. Bâ na kete bakari.
^ Wala “Maître.”
^ Bâ na kete bakari.
^ Na Grec: “abango li.”
^ Ge, tënë “ala so akomande” andu Nzapa na azo so lo mû komandema na ala.
^ Wala “ala kui biani biani.”
^ Na Grec: “Na ngoi ti nda ni.”
^ Wala “ala yeke azo ti mitele.”
