Na yâ ti mbage so ahon, e bâ signe so Jésus asara tënë ni lani. Signe ni so afa polele so a zia Royaume ti Nzapa na yayu awe na so Jésus Christ la ayeke Gbia ni.

Bible afa so na temps so Jésus awara komandema, lo tomba Satan na asioni yingo ti lo na yayu kâ. Ti fadeso, ala yeke na ngangu gï na ndö ti sese, na a yeke mbeni oko ti araison so asara si aye aga sioni mingi na ndö ti sese depuis na ngu 1914 ti ga na ni.​—Apocalypse 12:7, 9.

Atâa so aye ti dunia ayeke ga gï sioni sioni, Jésus so a zia lo Gbia ti Royaume ti Nzapa asara ambeni ye awe ndali ti nzoni ti azo na ndö ti sese kue. Grâce na kua ti fango tënë ti Nzapa na ndö ti sese kue, mingi ti azo ayeke manda Bible nga ala yeke sara ye alingbi na amama-ndia ni na yâ ti gigi ti ala (Ésaïe 2:2-4). Azo kutu mingi amanda lege ti sara si sewa ti ala aduti na ngia nga ti zia pëpe si kua ti nginza ti ala wala amosoro ti ala aga kota mingi ahon aye kue na yâ ti gigi ti ala. A fa na ala lege ti sara si gigi ti ala aga nzoni mingi laso nga ti ga azo so Nzapa ayeda na ala ti duti na gbe ti Royaume ti lo.

Atâa so Jésus akomanse ti komande na yayu awe, agouvernement ti azo angbâ ti komande na ndö ti sese. Me, Nzapa amû yanga na lo atene: “Gue mo sö benda na popo ti awato ti mo.” (Psaume 110:2). Fafadeso, Jésus ayeke futi awato ti lo kue nga lo yeke dë bê ti azo so aye ti mä yanga ti Nzapa.

Na ngoi ni so, Royaume ti Nzapa ayeke

• Futi abungbi ti vorongo nzapa ti wataka. Abungbi ti Nzapa so atene mvene na ndö ti Nzapa na so asara si gigi akpengba na azo ayeke duti ande dä ape. Bible atene so ala yeke tongana mbeni wali-ndumba. Futingo ala ayeke duti ande mbeni ye so azo mingi ayeke ku terê ti ala na ni ape.​—Apocalypse 17:15, 16.

• Futi komandema ti azo. Royaume ti Nzapa ayeke londo ande ti futi komandema ti azo kue.​—Apocalypse 19:15, 17, 18.

• Futi azo ti sioni. Ka ti azo so angbâ ti sara aye ti sioni nga ala ke ti mä yanga ti Nzapa? “Âdu ti azo ti sioni, a yeke zi ala na ndö ti sese.”​—aProverbe 2:22.

• Futi Satan nga na asioni yingo ti lo. Satan na asioni yingo ti lo ayeke wara ande lege ti “handa amara mbeni pëpe.”​—Apocalypse 20:3, 10.

Aye so kue aye ti tene nyen ande ndali ti azo so ayeda na Royaume ti Nzapa?

Jésus so ayeke Gbia na yayu ayeke sara ande aye mingi ahon ti so azo so ayeke na komandema apeut ti sara. Azo 144 000 so a soro ala na popo ti azo na ndö ti sese ayeke komande ande tongana gbia na terê ti lo (Apocalypse 5:9, 10; 14:1, 3). Lo yeke bâ ande si a sara ye so bê ti Nzapa aye na sese ge. Aye wa la Royaume ni ayeke sara ande ndali ti azo?

• A yeke zi kobela nga na kuâ. “Zo ti kodro ni ayeke tene ande pëpe ‘Terê ti mbi ason,’” nga “kuâ ayeke duti ande dä mbeni pëpe.”​—Ésaïe 33:24; Apocalypse 21:4.

• A yeke ga na tâ siriri nga na nzoni duti. “Siriri ti amolenge ti mo ayeke duti ande mingi” nga “zo oko oko ayeke duti ande na gbe ti keke ti vigne ti lo nga na gbe ti keke ti figue ti lo, zo oko ayeke zia mbeto na yâ ti ala pëpe.”​—Ésaïe 54:13; Michée 4:4.

• A yeke mû na azo nzoni kua ti sara. “Azo so mbi soro ala ayeke wara ngia na yâ ti kua so ala sara na maboko ti ala. Ala yeke bâ pasi gï senge senge pëpe.”​—Ésaïe 65:22, 23.

• A yeke leke kpale ti aye so angoro e. “Benyama nga na ndo so ahule ngangu ayeke duti ande na ngia mingi; kpangbala ndo ti désert ayeke duti ande na ngia, nga apendere fleur ayeke sigi dä gbani gbani.”​—Ésaïe 35:1.

• A yeke fa na azo ye so ala doit ti sara ti wara fini ti lakue lakue. “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.”​—Jean 17:3.

Nzapa aye si mo kue mo wara ande aye ti nzoni so (Ésaïe 48:18). Mbage so ayeke ga so ayeke fa ye so mo peut ti sara laso ti wara apendere ye so.