Prophète Moïse atene lani so tongana e bata acommandement ti Nzapa, Lo yeke iri tënë nzoni na ndö ti e (Deutéronome 10:13; 11:27). E yeke mä yanga ti Nzapa ndali ti so e sara mbeto ti tene lo punir e ape. Apendere sarango ye ti terê ti lo la apusu e ti mä yanga ti lo ndali ti so e ye lo na e ye ti zia vundu na bê ti lo ape. “Ndoye ti Nzapa ayeke so: e bata acommandement ti lo.”—1 Jean 5:3.

Me tongana nyen la mango yanga ti Nzapa alingbi ti sara si lo iri tënë nzoni na ndö ti e? Zia e bâ ambeni lege ni use.

“Mbi Jéhovah, mbi yeke Nzapa ti mo. Mbi la mbi yeke fa ye na mo ti tene mo bâ nzoni dä. Mbi la mbi yeke fa na mo lege so a yeke nzoni mo mû ni.”—ÉSAÏE 48:17.

Jéhovah Nzapa, Zo so acréé e, ahinga e nzoni nga lo mû na e awango so e bezoin ni. Tongana e ye ti tene awango ti Nzapa a-aidé e ti mû anzoni desizion, a lingbi e manda Mbeti ti lo ti hinga ye so lo ye ti tene e sara nga e sara ye alingbi na ni.

“Ngia ayeke na ala so amä tënë ti Nzapa na abata ni!”—LUC 11:28.

Laso, azo kutu mingi so asara ye alingbi na Mbeti ti Nzapa ayeke na tâ ngia. Bâ ye so asi na mbeni koli na Espagne, so aninga ka lani na ngonzo ape nga so ayeke sara ye na azo na lege ni ape, même na wali ti lo kue. Mbeni lâ, lo diko mbeni tënë so prophète Moïse atene na ndö ti Joseph, molenge ti Jacob, so ayeke sara ye na ngangu ape. A kä Joseph na ngbâa lani nga a bi lo senge senge na da ti kanga; me lo ngbâ lani ti sara ye na azo na ngangu ape, lo gi ti duti na siriri na azo nga lo pardonné ala (Genèse chapitre 37-45). Koli ti kodro ti Espagne so atene: “Ti gbu li na ndö ti tapande ti Joseph apusu mbi ti sara ye na azo na ngangu ape, na nzoni bê nga ti kanga nzara ti bê ti mbi. Ye ti pekoni ayeke so, fadeso mbi yeke na ngia na yâ ti fini ti mbi.”

Mbeti ti Nzapa amû awango mingi so afa lege ti sara ye na mbage ti amba ti e. E yeke sara tënë na ndö ni mingi na yâ ti mbage so ayeke ga na peko.