Ambeni zo ayeke hunda wala a changé ambeni tënë na yâ ti Mbeti ti Nzapa. Prophète Ésaïe atene lani so tënë ti Nzapa “ayeke ngbâ lakue.” (Ésaïe 40:8). Nyen la afa biani na e so a bata Mbeti ti Nzapa nzoni?

Nzapa ayeke na ngangu ti bata Mbeti ti lo nga ti bâ si a changé atënë ti yâ ni ape. Ândö tongana a yeke sû peko ti Mbeti ti Nzapa, azo ni ayeke sara hange mingi, ala yeke diko alettre ni oko oko kue tongaso si ala duti sûr so a zia mbeni tënë na yâ ni ape, a changé ni ape wala a zi mbeni ape. Me ndali ti so e azo e yeke na siokpari na terê ti e, a sara si ambeni asara ambeni kete erreur, me so achangé pëpe nda ti tënë ni.

Laso, a yeke wara acopie ti angbene kugbe-mbeti ti Mbeti ti Nzapa ngbangbo mingi. Tongana a haka acopie ni nde nde, a yeke duti ngangu ape ti hinga ndo so erreur ayeke dä. Ti hinga ambeni tënë na ndö ni, gue na ndö ti jw.org na bâ tënë so atene “La Bible a-​t-​elle été modifiée ou falsifiée ?”

Na tapande, gbu li na ndö ti angbene mbeti so a iri ni arouleau ti Mer Morte, so a wara ni lani na yâ ti adû ti tênë na terê ti Mer morte na ngu 1947. Na yâ ti angbene kugbe-mbeti so, a yeke wara ambeni mbage ti Mbeti ti Nzapa, so a sû ni ahon ngu 2 000 awe. Akota awandara ahaka angbene kugbe-mbeti so na Mbeti ti Nzapa so e yeke na ni laso so. Nyen la ala bâ?

Awandara so amanda ye na ndö ti Bible abâ so atënë ti yâ ti Mbeti ti Nzapa so e yeke na ni laso ayeke oko na ati so a sû na tongo nda ni. * E lingbi ti duti sûr so Nzapa abata atënë ti yâ ti Mbeti ti lo nzoni ndali ti e.

Tongaso, e lingbi ti sara confiance na atënë ti Bible so e yeke diko na ti zia bê ti e kue na ni. Na hingango ni tongaso, zia e bâ tongana nyen la e peut ti manda ye na ndö ti Nzapa na lege ti aprophète ti lo.