Ti wara mbeni pendere cadeau so mo ye ti mû na mbeni zo ayeke kete ye ape. Ti tâ tënë ni, zo so mo mû na lo cadeau ni so la ayeke bâ wala cadeau ni anzere na lo wala anzere na lo ape. Bango ndo ti azo na ndö ti mbeni cadeau oko alingbi ti duti nde nde.

Na tapande, ti mbeni maseka, mbeni appareil so asigi fini fini la ayeke pendere cadeau. Me ti mbeni kota zo, a yeke nzere na lo mingi tongana a mû na lo mbeni ye so ayeke ti akotara ti lo. Na ambeni kodro, cadeau so akota zo nga na amaseka aye ayeke nginza, ye so ayeke mû lege na ala ti vo na ye so ala ye.

Atâa so kue, azo mingi angbâ ti gi lakue ti wara mbeni pendere cadeau so ala lingbi ti mû na mbeni zo so ala ye lo. So warango ni ayeke ka kete ye ape so, tongana e gi ti hinga ambeni ye, a yeke sara si peut-être a yeke duti ngangu mingi ape ti mû na zo cadeau so apeut ti nzere na lo. Zia e bâ aye osio so apeut ti sara si cadeau anzere na mbeni zo.

Ye so zo ni aye ni mingi. Mbeni koli na Belfast, so ayeke na mbage ti Nord ti Irlande, abâ ti lo vélo VTT so a mû na lo na ngoi so lo yeke na ngu 10 wala 11 tongaso, tongana mbeni pendere cadeau so ahon acadeau kue so lo wara ni. Ngbanga ti nyen? Lo tene: “Ngbanga ti so mbi ye lani mingi ti wara vélo ni so.” Tënë so aye ti fa so ti tene mbeni zo aye mbeni cadeau mingi, a lingbi cadeau ni aduti nga mbeni ye so lo ye. Ni la, pensé na zo so mo ye ti mû na lo mbeni cadeau. Gi ti hinga ye so apeut ti nzere na lo ndali ti so ye so zo amû nengo na ni mingi la ayeke sara nga si zo ni asara nzara ti ye ni so. Na tapande, ambakoro abâ na nene ni mingi ti duti legeoko na afami ti ala. Ni la, nzara ti bango amolenge ti ala na a-atâ ti ala lakue lakue alingbi ti sara ala. Ti ambakoro tongaso, ti passé vacance legeoko na amolenge ti ala na a-âta ti ala ayeke mbeni cadeau so ayeke pendere mingi.

Ye so apeut ti sara si mo hinga ye so mbeni zo aye ni mingi ayeke ti mä lo nzoni. Bible awa e “ti duti nduru ti mä tënë, ti sara tënë hio hio pëpe”. (Jacques 1:19). Tongana mo yeke sara lisoro na akamarade ti mo wala na afami ti mo, mä ala nzoni tongaso si mo lingbi ti hinga aye so anzere na ala wala aye so anzere na ala ape. Tongana mo sara tongaso, mo peut ti mû na ala cadeau so anzere na ala.

 Ye so zo ni ayeke na bezoin ni. Tongana mbeni cadeau so a mû na mbeni zo ayeke tâ ye so zo ni abezoin ni, zo ni apeut ti ye ni mingi atâa cadeau ni ayeke kete wala ayeke cher ape. Tongana nyen la mo peut ti hinga ye so mbeni zo abezoin ni?

Na bango ni, zo apeut ti pensé so ti hinga ni hio ayeke gï ti hunda na zo ni nyen la lo bezoin ni wala nyen la lo ye. Me ti mingi ti azo, ti sara tongaso anzere na ala mingi ape. Ala ye mingi ti tene zo ni aku terê ti lo na cadeau so ala ye ti sara na lo so ape, so ayeke tâ ye so lo yeke na bezoin ni. Na mbage, ambeni zo apeut ti fa na mo aye so ala ye wala aye so ala ye ape, me mingi ni ala yeke fa na mo pëpe aye so ala yeke tâ na bezoin ni.

Ni la, duti zo so ayeke bâ ye nzoni nga gbu li na ndö ti zo ni. Zo ni ayeke maseka, mbakoro, kumbamba, lo sara mariage, lo sara divorce, koli wala wali ti lo akui, lo ngbâ ti sara kua, wala lo gue na retraite awe? Na pekoni, gbu li ti mo ti hinga cadeau wa la apeut ti lingbi na bezoin ti zo ni.

Ti hinga ye so zo ni abezoin ni, sara lisoro na ambeni zo so ayeke na yâ ti oko situation ti lo so. Ala peut ti fa na mo ambeni ye so azo so dutingo ti ala ayeke tongaso ayeke na bezoin ni me so tanga ti azo ahinga ni ape. Tongana mo hinga ni, a lingbi ti sara si mo mû na zo ni mbeni cadeau so lo yeke tâ na bezoin ni, so amba ti mo apensé na ni ape.

Nzoni ngoi ti mungo cadeau na zo ni. Bible atene: “Tënë so a tene na tâ ngoi ni anzere mingi.” (aProverbe 15:23). Tënë so afa so tongana e tene tënë tâ na nzoni ngoi ni, a yeke sara nzoni mingi. A yeke nga legeoko na aye so e yeke sara. Legeoko tongana ti so atënë so zo atene tâ na ngoi ni alingbi ti nzere na zo so amä ni, mbeni cadeau so zo amû tâ na ngoi ni alingbi ti sara si terê ti zo so awara cadeau ni so anzere mingi.

Angoi ti mungo cadeau na zo ayeke mingi. A peut ti duti na ngoi so mbeni kamarade ti mo aye ti sara mariage. A peut ti sara cadeau na mbeni maseka so awara Bac wala na mbeni koli na wali ti lo so ayeke ku ti wara bébé. Ambeni zo abâ so a yeke nzoni ti sara molongo ti aye ni so na mbeti ndali ti ngu ti peko. Na sarango tongaso, ala peut ti hinga nzoni cadeau wa la ala lingbi ti mû ande na zo oko oko. *

E bezoin ape ti mû cadeau na mbeni zo gï na mbeni ngoi so ayeke nde. Atâa na ngoi wa la mo mû cadeau na mbeni zo, mo yeke wara ngia lakue. Me sara hange tongana mo ye ti sara cadeau na zo. Na tapande tongana mbeni koli aye ti mû cadeau na mbeni wali si na bango ni raison ti mungo cadeau ni so ayeke dä ape, wali ni apeut ti pensé so koli ni so asara nzara ti lo. Tongana koli ni apensé tongaso ape, a peut ti ga na kpale. Ye so amû lege na e fadeso ti bâ mbeni ye so a yeke nzoni e hinga tongana e ye ti mû cadeau na zo.

Ye so apusu zo ti mû ye. Tongana ti so e londo ti bâ, a yeke nzoni zo so aye ti mû cadeau na mbeni zo agi ti bâ wala zo ni ayeke pensé ande nyen na ndö ti raison so apusu lo ti mû cadeau ni. Na mbage, a yeke nga nzoni ti tene zo so aye ti mû cadeau ni so agbu li na ndö ti raison so apusu lo ti mû ni. Mingi ti azo ayeke tene ka so gï nzoni bê la apusu ala ti sara cadeau na zo, me mingi na popo ni ayeke sara cadeau na amba ti ala ndali ti so ala bâ so ala doit gï ti sara ni. Me ambeni nga ayeke mû cadeau na zo ndali ti intérêt.

Nyen la mo peut ti sara ti hinga biani so cadeau so mo sara na mbeni zo, mo sara ni tâ na nzoni bê? Bible atene: “Zia aye kue so ala sara, ala sara ni na ndoye.” (1 aCorinthien 16:14). Tongana mo sara cadeau na mbeni zo ndali ti so mo ndoye lo nga mo pensé na lo, zo ni ayeke mû cadeau ni na ngia, nga mo yeke bâ biani so tongana zo amû ye na zo, lo yeke wara ngia mingi na pekoni. Tongana ye so mo mû na zo alondo na bê ti mo, a yeke nzere nga na Babâ ti mo ti yayu. Na ngoi so aChrétien ti Corinthe amû lani ye na ngia ti aidé aChrétien ti Judée,  bazengele Paul agonda lani ala na lo tene: “Nzapa andoye zo so amû ye na ngia.”​—2 aCorinthien 9:7.

Tongana mo sara ye alingbi na aye nde nde so e londo ti bâ so, a yeke aidé mo mingi ti mû na azo mbeni cadeau so anzere na ala. Ambage nde nde kue so e londo ti bâ nga na ambeni nde asigi polele na yâ ti pendere cadeau so ahon atanga ni kue so Nzapa amû na e. E hunda na mo fadeso ti diko ye na ndö ti pendere cadeau ni so na yâ ti mbage so ayeke ga na pekoni so.