Azo mingi atene ala mä na bê na Nzapa. Me tongana a hunda ala a tene Nzapa ayeke zo wa, kiringo tënë ti ala ayeke nde nde. Ambeni zo atene so Nzapa ayeke mbeni sioni juge so aye gï ti punir azo. Ambeni atene ti ala so lakue Nzapa ayeke ndoye zo nga lo yeke pardonné zo atâa nyen la lo sara. Nga ambeni atene so Nzapa ayo na e mingi na lo yeke sara sanka ti e. Atënë so kue asara si azo mingi apensé so zo apeut ti hinga Nzapa nzoni ape.

Eskê a yeke kota ye ti hinga Nzapa nzoni? En, a yeke kota ye. Tongana zo ahinga Nzapa nzoni, lo yeke hinga ndani so lo yeke na fini (Kusala 17:26-28). Tongana mo ga nduru na Nzapa, lo yeke ye mo mingi nga lo yeke aidé mo (Jacques 4:8). Nga, ti hinga Nzapa nzoni ayeke sara si mo wara fini ti lakue lakue.—Jean 17:3.

Mo yeke sara tongana nyen ti hinga Nzapa nzoni? Gbu li na ndö ti mbeni zo so mo hinga lo nzoni, na tapande mbeni kota kamarade ti mo. Ala ga kamarade tongana nyen? Peut-être mo gi lani ti hinga iri ti lo, asarango ye ti lo, aye so lo ye na aye so lo ke, aye so lo sara na ati so lo leke na bê ti lo ti sara nga na ambeni ye ni nde. So mo hinga aye so na ndö ti lo la asara si mo na lo aga akamarade.

Legeoko nga, e yeke hinga Nzapa nzoni tongana e gbu li na ndö ti ahunda so:

• IRI TI NZAPA AYEKE NYEN?

• ASARANGO YE TI TERÊ TI NZAPA AYEKE SO WA?

• AYE WA LA NZAPA ASARA?

• AYE WA LA NZAPA AYEKE SARA ANDE?

• AYE TI NZONI WA LA MO YEKE WARA TONGANA MO HINGA NZAPA?

Mbeti so ayeke mû lege na mo ti wara akiringo tënë ti Bible na ndö ti ahunda so. Atënë ti yâ ni ayeke aidé mo ti hinga Nzapa nzoni nga na aye ti nzoni so mo yeke wara ande tongana mo yeke na nzoni songo na lo.