Ambeni matabisi ayeke dä so ngere ni ayeke ngangu mingi ndali ti so mbeni kota zo wala mbeni zo so azo ane lo mingi la amû ni na e. Ti ambeni matabisi ni, atâa so ngere ni ayeke kete, azo alingbi ti ye ni mingi ndali ti so ayeke mbeni fami ti ala wala mbeni kamarade ti ala so ala sara confiance na lo la amû ni na ala. A yeke legeoko tongana ti matabisi so Russell amû na Jordan, so asara tënë ni na yâ ti mbage so ahon so. Tongana nyen la a lingbi ti haka matabisi ni so na sacrifice ti Jésus?

Kozoni, Bible atene so “Nzapa atokua lani oko Molenge ti lo na dunia so si e lingbi ti wara fini na lege ti lo.” (1 Jean 4:9). Ye so asara si ngere ti matabisi ni so ayeke ngangu mingi. Mbeni kota zo ti kodro ti hon Nzapa ayeke dä ape. Mbeni zo ti sungo psaume so ayeke Hébreu, atene: “Mo so iri ti mo ayeke Jéhovah, Mo oko la mo yeke Lo so ayeke na nduzu na ndö ti aye kue, na ndö ti sese kue.” (Psaume 83:18). Mbeni kota zo alingbi ti mû na e mara ti matabisi tongana ti so pëpe.

Use ni, Nzapa ayeke “Babâ ti e.” (Ésaïe 63:16). Tongana nyen? Na lege so lo mû na e fini. Na ndö ni, lo yeke bibe na e tongana mbeni nzoni babâ so ayeke bibe na amolenge ti lo. Nzapa ahunda ambeni wakua ti lo ti giriri, na tapande Éphraïm, lo tene: “Eskê mbi bâ Éphraïm na nene ni ape? lo yeke molenge so mbi ye lo mingi ape? . . . Mbi ngbâ ti ye lo mingi na yâ ti bê ti mbi kâ. Biani, mbi yeke bâ ande mawa ti lo.” (Jérémie 31:20). Nzapa ayeke na oko bibe ni so  na mbage ti awakua ti lo ti laso. Lo yeke gï pëpe Nzapa so acréé e nga so ngangu ti lo ahon angangu kue, me lo yeke nga nzoni Babâ ti e na Kamarade ti e. Ye so asara si matabisi so lo mû na e ayeke tâ kota mingi!

Ambeni matabisi ayeke kota mingi ndali ti so mbeni zo la amû ni na mba ti lo, a gbu lo gbungo na ngangu ape, me ayeke tâ ndoye la apusu zo ni ti sara ni. Mbeni nzoni zo so amû ye na bê use ape, a yeke ku pëpe ti tene a futa lo na peko ti nzoni bê so lo sara.

Nzapa amû Molenge ti lo na e ndali ti so lo ye e mingi. Bible atene: “A bâ ndoye ti Nzapa na mbage ti e na lege so: Nzapa atokua lani oko Molenge ti lo.” Lo sara ye so ndali ti nyen? “Si e lingbi ti wara fini na lege ti lo.” (1 Jean 4:9). A forcé Nzapa ti sara ye so? Ên-ën. Bible atene: “Ye so Christ Jésus afuta ti zi azo” afa “kota nzobe” ti Nzapa.—aRomain 3:24.

Ngbanga ti nyen matabisi ti Nzapa so afa “kota nzobe” ti lo? Bible atene: “Nzapa azia ndoye ti lo na gbele e na lege so, tongana e ngbâ lani awasiokpari, Christ akui ndali ti e.” (aRomain 5:8). A yeke tâ ndoye la apusu Nzapa ti sara ye tongaso na mbage ti azo so awoko, azo so ayeke na bezoin ti tene a mû maboko na ala nga na azo so siokpari ayeke na terê ti ala. E lingbi na ndoye ni so ape, nga e lingbi même pëpe ti futa ni na lo. Matabisi ti lo so afa kota ndoye so lo yeke na ni na mbage ti e.

Ambeni matabisi ayeke kota ye mingi ndali ti so zo so amû ni asara mbeni kota sacrifice. Tongana mbeni zo ayeda na bê ti lo wani ti mû na e mbeni ye so ngere ni ayeke ngangu mingi na lê ti lo, e yeke ye tâ matabisi ni so mingi ndali ti sacrifice so zo ni asara so.

Nzapa amû “gï oko Molenge ti lo”. (Jean 3:16). Mbeni zo so ayeke tâ nduru mingi na lo ti lingbi na molenge ti lo so ayeke dä ape. Nzapa a sara dunia aninga mingi. Na ngoi ni so Jésus asara lani kua na terê ti lo na lo ga zo so Nzapa ‘aye lo mingi’. (aProverbe 8:30). Jésus ayeke “Molenge ti [Nzapa] so lo ndoye lo mingi” nga “image ti Nzapa so lê ayeke bâ lo pëpe”. (aColossien 1:13-15). Lâ oko mbeni mara ti kpengba songo tongaso ayeke na popo ti azo use ape.

Me Nzapa azi “même Molenge ti lo wani na yâ ti kpale pëpe”. (aRomain 8:32). Jéhovah amû tâ nzoni ye ti lo ndali ti e. Mbeni matabisi so ayeke kota mingi na lo ti lingbi na so ayeke dä ape.

Ambeni matabisi ni ayeke kota ye mingi ndali ti so ayeke mû na zo tâ ye so lo yeke na bezoin ni, même fafadeso. Na tapande, mo yeke kiri singila mingi na mbeni zo so ayeda na bê ti lo kue ti vo na mo mbeni yorö so mo yeke na bezoin ni ti sava na terê ti mo. Mbeni yorö so mo peut ti vo ni ape. Mara ti matabisi tongaso ayeke tâ kota mingi na lê mo ape?

“Legeoko tongana ti so na yâ ti Adam ala kue ayeke kui, tongaso nga na yâ ti Christ ala kue ayeke wara fini.” (1 aCorinthien 15:22). E kue so e yeke amolenge ti Adam e yeke “kui,” na zo oko alingbi ti kpe kobela nga na kuâ ape wala ti kiri ti leke songo na Nzapa nga ti zi ngbanga so ayeke na li ti e ndali ti siokpari ti Adam. Nga, teti so e yeke senge zo, e lingbi pëpe ti sara si e wani wala mbeni zo nde awara “fini.” Bible atene: “Zo oko na popo ti ala alingbi même pëpe ti zi ita ti lo zo, wala ti futa mbeni ye na Nzapa ndali ti lo, . . . a yeke hon ti lo ngangu ti ala lakue.” (Psaume 49:7, 8). E yeke tâ na bezoin ti tene a mû maboko na e ndali ti so e lingbi pëpe ti futa  sacrifice so a sara ti zi e so. Tongana a mû maboko na e ape, a yeke ngangu na e.

Kota ndoye ti Jéhovah asara si lo yeda ti payé “ye” so e yeke na bezoin ni ti sö fini ti e, so ti tene na lege ti Jésus ‘azo kue ayeke wara fini.’ Tongana nyen la sacrifice so ayeke sara ye ni so? Bible atene: “Mênë ti Molenge ti lo Jésus asukula e na a zi asiokpari kue awe.” Biani, tongana e mä na bê na mênë ti Jésus so atuku, a yeke zi lege ti tene a pardonné asiokpari ti e nga ti tene e wara ande fini ti lakue lakue (1 Jean 1:7; 5:13). Nyen la sacrifice ni so ayeke sara ndali ti azo so e ye ala mingi si akui so? Bible atene: “Ndali ti so kuâ aga na lege ti koli oko, zingongo ti akuâ aga nga na lege ti koli oko [Jésus].”—1 aCorinthien 15:21. *

Mbeni kota matabisi so ndoye la apusu zo ti mû ni ti lingbi na ti Jésus so ayeke dä ape. Mbeni zo oko ade ti mû na e mbeni kota ye ahon ti so Jéhovah Nzapa amû na e so ape. Mbeni matabisi so amû na e ye so e yeke na bezoin ni mingi ti hon mara ti matabisi so azi e na gbe ti siokpari nga na kuâ so, ayeke dä ape. Biani, mbeni matabisi alingbi même pëpe ti lingbi na sacrifice so.