Tongana Nzapa la ayeke na gunda ti pasi ape, ka ngbanga ti nyen la si kota nzara, yere, bira, asioni kobela, nga na ngu so asuku amû ndo wala sese so ayengi ahunzi lâ oko ape so? Bible afa akota ye ota so asara si azo ayeke bâ pasi:

1. Bibe ti pensengo gï na mo wani, sarango bê ti ye nga na kengo zo. “Komandema ti zo na ndö ti mba ti lo aga gï na sioni na mba ti lo ni.” (Zo-ti-fa-tene 8:9). Mingi ni, azo ayeke bâ pasi ndali ti asioni sarango ye ti amba ti ala so ayeke azo so siokpari ayeke na terê ti ala, so ayeke pensé gï na ala wani wala so ayeke sara ye ti ngangu na azo.

2. Ye so zo aku terê ti lo na ni ape. Azo ayeke bâ pasi “ndali ti so ye so ala ku terê ti ala na ni pëpe alingbi ti si na ala kue na ngoi kue.” (Zo-ti-fa-tene 9:11). So aye ti tene so a-accident apeut ti passé, aye ti sioni apeut ti si na azo ndali ti so ala tï na nzoni ngoi ape na sioni place wala kpale apeut ti si ndali ti so azo asara ye na hange ape wala ala sara erreur.

3. Zo ti sioni la akomande dunia. Bible afa polele kozo ye so ayeke na gunda ti pasi ti azo, atene: “Dunia so kue ayeke na gbe ti Zo ti sioni.” (1 Jean 5:19). “Zo ti sioni” ni so ayeke Satan Zabolo, mbeni ngangu créature ti yingo so lo yeke ândö ange ti Nzapa me “lo ngbâ na yâ ti tâ tënë pëpe”. (Jean 8:44). Ambeni ange nga amû peko ti lo na ala sara kpengba-li na Nzapa ti sara ye so bê ti ala aye, ye so asara si ala ga adémon (Genèse 6:1-5). Ngbene ye na ngoi so Satan na adémon ti lo ake yanga ti Nzapa, ala yeke sara ngangu na ndö ti azo na yâ ti dunia so. E bâ ni polele laso. Fadeso, Zabolo ayeke na kota ngonzo nga “lo yeke handa azo na ndö ti sese kue;” ye so asara si ‘mawa ayeke na sese.’ (Apocalypse 12:9, 12). Satan ayeke mbeni sioni zo ti komande so asara ye ti ngangu na zo. Terê ti lo ayeke nzere tongana lo bâ azo abâ pasi. A yeke biani Satan la asara si azo abâ pasi, me Nzapa ape.

GBU LI NA NDÖ TI TËNË SO: Zo so apeut ti sara si azo abâ pasi senge senge apeut ti duti gï mbeni zo so ayeke bâ mawa ti zo ape, so ayeke na sioni bê nga so ayeke sara sioni na zo na mbana. Me Bible atene: “Nzapa ayeke ndoye.” (1 Jean 4:8). So Nzapa ayeke sara ye na ndoye, lo lingbi “lâ oko pëpe ti sara ye ti sioni, Lo so ngangu ti lo ahon angangu kue alingbi ti sara sioni pëpe.”—Job 34:10.

Me, peut-être mo yeke hunda terê ti mo, mo tene: ‘Nzapa ayeke zia Satan na sioni komandema ti lo so juska lawa? Tongana ti so e bâ awe, Nzapa ake sarango sioni nga tongana lo bâ so e bâ pasi, a sara lo vundu mingi. Na ndö ni, Bible atene: “Ala mû agingo bê ti ala kue ala bi ni na ndö ti lo, ngbanga ti so lo yeke bi bê ti lo na ndö ti ala.” (1 Pierre 5:7). Nzapa aye e nga lo yeke na ngangu ti zi apasi kue tongana ti so e yeke gue ti bâ na yâ ti mbage so ayeke ga na peko. *