NA GANGO ti Toñi ti peko, wali ni akiri asara tënë na lo na ngonzo. Toñi asara ye tongana nyen? Lo tene: “Ye ni ayeke lani ngangu. Lo tene asioni tënë na mbi senge senge.” Me Toñi akiri ahunda pardon na lo nga lo tene na wali ni so ni hinga pasi ti lo.

Tongana mo yeke Toñi, mo pensé nyen la mo yeke sara? Mo yeke gi ti sara ye na ngangu pëpe? A yeke duti ngangu na mo ti kanga ndo ti ngonzo ti mo? Tâ tënë, peut-être a yeke lakue kete ye pëpe ti ngbâ ti duti kpô na yâ ti mara ti ye so a fa ni ge so. Tongana e yeke na yâ ti mbeni ngangu kpale wala mbeni zo agi yanga ti e, a lingbi ti duti ngangu mingi ti ngbâ ti sara ye na ngangu pëpe.

Ye oko, Bible awa aChrétien ti sara ye na ngangu pëpe. Ti tâ tënë ni, Bible afa so sarango ye na ngangu pëpe ague oko na ndara. Jacques atene: “Zo wa na popo ti ala ayeke zo ti ndara nga zo ti gbungo nda ti ye? Zia si na lege ti nzoni sarango ye ti lo, lo fa akusala ti lo na lege ti sarango ye ti lo na ngangu pëpe so alondo na ndara.” (Jacq. 3:13). Tongana nyen la sarango ye na ngangu pëpe afa so zo ayeke na ndara so alondo na nduzu? Nyen la alingbi ti mû maboko na e ti duti na mara ti sarango ye ti Nzapa so?

Sarango ye na ngangu pëpe alingbi ti sara si ngonzo adë. “Zo so akiri tënë doucement, lo sara si ngonzo adë.”—aProv. 15:1.

Ti sara ye na ngonzo alingbi ti sara si mbeni ye akiri aga sioni mingi ndali ti so ayeke tongana tukungo essence na lê ti wâ (aProv. 26:21). Me ti kiri tënë na ngangu pëpe ayeke sara si kpale adë. A lingbi même ti dë bê ti zo so ngonzo asara lo.

Toñi wani abâ ni lani. So wali ni abâ so Toñi akiri tënë na lo na ngangu pëpe, lo tï na toto. Lo fa na Toñi so akpale ti lo nga na ti sewa ti lo ahon ndo ti lo. Toñi afa tënë pendere na wali ni na lo to nda ti mbeni étude, ndali ti so lo sara ye na ngangu pëpe nga na siriri.

Sarango ye na ngangu pëpe alingbi ti sara si e yeke na ngia. “Ngia ayeke na ala so ayeke sara ye na ngangu pëpe, teti fade sese ayeke ga ti ala.”—Mat. 5:5.

Ngbanga ti nyen la sarango ye na ngangu pëpe ayeke sara si zo aduti na ngia? Azo mingi so ayeke sara ye lani na ngangu ayeke na ngia laso ndali ti so ala sara ye na ngangu pëpe. Gigi ti ala aga nzoni na ala hinga so mbeni pendere gigi ti kekereke ayeke ku ala (aCol. 3:12). Adolfo, so ayeke surveillant ti circonscription na Espagne, adabe ti lo na gigi ti lo ti ândö kozo ti tene lo ga na yâ ti tâ tënë.

Adolfo atene: “Mbi hinga lani pëpe mbilimbili ye so mbi yeke sara na yâ ti gigi ti mbi. Mbi yeke sara ngonzo mingi tongaso même ambeni kamarade ti mbi asara mbeto so mbi yeke sara ye na ala na baba nga na ngangu mingi tongana mbeni ye asi. Na nda ni, mbeni ye asi so asara si mbi bâ so a lingbi mbi changé. Na yâ ti mbeni ngangu tiri, a kpo mbi na zembe fani omene na a ngbâ kete mênë ti mbi ayuru kue.”

Me fadeso, Adolfo ayeke fa na azo ti sara ye na ngangu pëpe na lege ti atënë ti yanga ti lo nga na tapande ti lo. Anzoni sarango ye ti lo agboto azo mingi na mbage ti lo. Adolfo atene so lo yeke na ngia ndali ti achangement so lo sara. Nga lo kiri singila mingi na Jéhovah so amû maboko na lo ti sara ye na ngangu pëpe.

Sarango ye na ngangu pëpe ayeke zia ngia na bê ti Jéhovah. “Molenge ti mbi, mo duti na ndara na mo mû ngia na bê ti mbi, si mbi lingbi kiri tënë na zo so azonga mbi.”—aProv. 27:11.

Zabolo, kota wato ti Jéhovah, ayeke gi yanga ti lo. Nzapa ayeke na raison ti sara ngonzo ndali ti so Zabolo agi yanga ti lo na mbana, me Bible atene na ndo ti Jéhovah, atene: “Ngonzo ti Lo alondo fade pëpe.” (Ex. 34:6). Tongana e gi ti sara ye tongana Nzapa so asara ngonzo hio hio pëpe nga so asara ye na ngangu pëpe, andâ e yeke sara ye na ndara la na a yeke nzere na Jéhovah mingi.—aÉph. 5:1.

Dunia ti laso asi singo na azo so aye ngonzo mingi. E lingbi ti tingbi na “azo so abâ tere ti ala kota na ndo ti amba ti ala, azo ti baba, azo ti zongango ndo . . . azo ti pango amba ti ala, azo so akanga nzara ti bê ti ala pëpe, azo so ayeke asioni zo”. (2 Tim. 3:2, 3). Me ye so akanga lege pëpe na mbeni Chrétien ti sara ye na ngangu pëpe. Bible adabe ti e so ‘ndara so alondo na nduzu ayeke sara ye na siriri na ayeke sara ye na lege ni’. (Jacq. 3:17). Tongana e sara ye na siriri nga na lege ni, e yeke fa so e yeke na ndara ti Nzapa. Ndara so ayeke pusu e ti kiri tënë yeke na ngoi so a son bê ti e na ayeke sara si e ga nduru mingi na Jéhovah so kota ndara alondo na lo.