1, 2. (a) Tënë wa la Jésus atene na ndo ti alango ti nda ni? (b) Ahundango ndo wa la e yeke kiri tënë na ni yâ ti article so?

KITE ayeke pëpe so a yeke nzere na e mingi tongana e yeke lani dä na ndo ti Hoto ti akeke ti olive, e yeke bâ temple ti Jérusalem na gbe ni, na ngoi so Jésus ayeke sara tënë na ndo ti mbeni pendere prophétie ti lo. Pierre, André, Jacques na Jean ayeke lani dä nga ala dengi mê ti ala nzoni ala yeke mä Jésus na ngoi so lo yeke sara tënë na ala na ndo ti mbeni prophétie ti lo so ayeke ga ande tâ tënë. Lo sara tënë na ala mingi na ndo ti aye so ayeke si na alango ti nda ni ti sioni dunia so na ngoi so lo yeke duti Gbia ti Royaume ti Nzapa. Lo tene na ala so na ngoi ni so, lo yeke sara kua na “ngbâa be-ta-zo so ayeke sara ye na ndara” ti mû na awakua ti lo kobe ti yingo so ala yeke na bezoin ni na ngoi ni.—Mat. 24:45-47.

² Na pekoni, gi na yâ ti prophétie so, Jésus asara tënë na ndo ti toli ti amasia bale-oko. (Diko Matthieu 25:1-13.) Na yâ ti article so, e yeke kiri tënë na ahundango ndo so: (1) Kpengba ye wa la toli ni afa? (2) Tongana nyen la aChrétien so a soro ala ti gue na yayu so ayeke be-ta-zo asara ye alingbi na wango so ayeke na yâ ti toli ni? Ye  ti pekoni ayeke so wa? (3) Tongana nyen la e oko oko kue e lingbi ti wara aye ti nzoni na lege ti toli ti Jésus so laso?

3. Ândö, a fa nda ti toli ti amasia bale-oko na yâ ti mbeti ti e tongana nyen? Nyen la alingbi ti si na peko ti fango nda ti ye so?

³ Na yâ ti article so ahon, e bâ so na yâ ti angu so ahon ade ti ninga ape, ngbâa be-ta-zo achangé lege so lo yeke fa na nda ti ambeni mbaï ti Bible. Fadeso, ngbâa be-ta-zo aluti mingi na ndo ti anzoni ye so e lingbi ti manda na yâ ti ambaï ni me pëpe na ndo ti atënë ti prophétie so ayeke na yâ ti ambaï ni. Ândö, na yâ ti mbeti ti e a fa so alampe, mafuta nga na angbenda so ayeke na yâ ti toli ti Jésus ti amasia bale-oko aye ti sara tënë ti mbeni ye wala ti mbeni zo. Me, eskê lutingo mingi na ndo ti anzene nzene tënë so ayeke na yâ ti toli ni alingbi ti kanga lege na azo ti hinga kpengba tënë so ayeke na yâ ni? Tongana ti so e yeke bâ ande, a yeke kota ye mingi ti tene e hinga kiringo tënë ni.

4. Na yâ ti toli ti amasia: (a) koli so ayeke mû wali fini fini ayeke zo wa? Nyen la afa ni? (b) Ka amasia ni ayeke azo wa? Nyen la afa ni?

⁴ Zia e bâ kpengba ye so toli ti Jésus so aye ti fa. Kozoni, zia e sara tënë na ndo ti azo ti yâ ti toli ni. Koli so ayeke mû wali fini fini ti yâ ti toli ni ayeke zo wa? A yeke polele so Jésus ayeke sara lani tënë ti lo wani. E tene tongaso ndali ti so na mbeni ngoi nde, Jésus asara tënë ti lo wani tongana mbeni koli so ayeke mû wali fini fini (Luc 5:34, 35). Ka amasia ni ayeke azo wa? Na yâ ti toli ni, Jésus atene so a lingbi amasia ni azia alampe ti ala angbâ na zango ni na ngoi so koli so ayeke mû wali fini fini ayeke si. Bâ so a yeke gi oko ye so Jésus atene na “kete kundu” ti lo, wala aChrétien so a soro ala ti gue na yayu, ti sara la. Lo tene na ala, lo tene: “Ala kanga bongo na gbe ti yâ ti ala nga zia alampe ti ala angbâ na zango ni, na ala duti tongana azo so ayeke ku wa ti ala na ngoi so lo londo na mariage ti kiri.” (Luc 12:32, 35, 36). Bazengele Paul nga ahaka adisciple ti Christ so a soro ala ti gue na yayu na amaseka-wali so ade ti hinga koli pëpe (2 aCor. 11:2). A yeke polele so Jésus amû wango so ayeke na yâ ti toli so ayeke na Matthieu 25:1-13 na adisciple ti lo so a soro ala ti gue na yayu.

5. Tongana nyen la Jésus afa ngoi so toli ti lo andu ni?

⁵ Use ni, wango ti Jésus so andu ngoi wa? Tënë so Jésus atene na hunzingo ti toli ni amû maboko na e ti hinga ngoi ni so. Lo tene: “Koli ni asi.” (Mat. 25:10). Tongana ti so e manda na yâ ti Tour ti Ba Ndo ti lango 15 ti juillet, ngu 2013, na yâ ti prophétie ti Jésus so ayeke na Matthieu chapitre 24 na chapitre 25, lo sara tënë ti “gango” ti lo wala ti “singo” ti lo fani miombe. Na ngoi kue so Jésus asara tënë ti “gango” ti lo wala ti “singo” ti lo, lo yeke sara lani tënë ti ngoi so lo yeke ga ande ti fâ ngbanga nga ti futi sioni dunia so na ngoi ti kota ye ti vundu. Tongaso, e lingbi ti tene so toli ti Jésus so andu alango ti nda ni, nga so lo yeke ga ande na ngoi ti kota ye ti vundu.

6. Kpengba ye wa la toli ni aye ti fa?

⁶ Kpengba ye wa la toli ni aye ti fa? Dabe ti mo na atënë so Jésus atene kozo na toli ni. Jésus alondo ti sara tënë ti ‘ngbâa ti lo so ayeke be-ta-zo so ayeke sara ye na ndara’. Ngbâa so ayeke duti mbeni kete groupe ti akoli so a soro ala ti gue na yayu na so ayeke mû li ni na ndo ti adisciple ti Christ na alango ti nda ni. Jésus awa akoli so lo tene so a lingbi ala ngbâ be-ta-zo. Na pekoni, lo sara tënë ti toli ti amasia bale-oko ti wa adisciple ti lo kue so a soro ala ti gue na yayu na alango ti nda ni. Lo tene na ala ti “lango pëpe” tongaso si ala wara futa ti ala so ayeke ti gue na yayu (Mat. 25:13). Zia e sara tënë fadeso na ndo ti toli ni ti bâ tongana nyen la aChrétien so a soro ala ti gue na yayu asara ye alingbi na wango so ayeke na yâ ni.

7, 8. (a) Ngbanga ti nyen amasia so asara ye na ndara ayeke ku lani singo ti koli so ayeke mû wali fini fini kungo? (b) Tongana nyen la aChrétien so a soro ala ti gue na yayu aleke tere ti ala?

⁷ Na yâ ti toli ni, Jésus atene so, nde na amasia ti buba, amasia so asara ye na ndara ayeke ku lani singo ti koli so ayeke mû wali fini fini kungo. Ngbanga ti nyen? Ngbanga ti so ala leke tere ti ala nga lê ti ala akpengba. A lingbi lani lê ti amasia ni akpengba nga ala zia alampe ti ala angbâ na zango ni na bï ni kue. Nde na amasia ti buba, amasia oku so asara ye na ndara aleke tere ti ala nzoni, ala ga na alampe ti ala so ala zia mafuta dä nga ala mû mbeni mafuta ni na tere ti ala. Tongana nyen la aChrétien so a soro ala ti gue na yayu aleke tere ti ala ndali ti singo ti Jésus?

⁸ Na alango ti nda ni, aChrétien so a soro ala ti gue na yayu asara ye tongana ti amasia so asara ye na ndara na lege so ala leke tere ti ala ti sara kua so a mû na ala juska na nda ni. Ala hinga so ti sara kua so ala yeke sara na Nzapa, a lingbi ala ke gbâ ti aye ti dunia ti Satan so, na a yeke ye so ala sara. Ala mû tere ti ala kue na Jéhovah nga ala yeke sara na lo. A yeke pëpe ndali ti so alango ti nda ni aga nduru la ala yeke sara na Jéhovah me a yeke ndali ti so ala ye lo nga na Molenge ti lo nga ala ye ti duti be-ta-zo na ala. Ala ngbâ be-ta-zo nga ala ke ti duti na bibe ti warango gbâ ti aye ti sese so, bibe ti sarango ye ti sioni nga na bibe ti kion so ayeke na yâ ti sioni dunia so. Legeoko tongana ti amasia so, aChrétien so a soro ala ti gue na yayu aleke tere ti ala awe, ala ngbâ ti za nga ala yeke ku singo ti koli so ayeke mû wali fini fini kungo, atâa so na bango ni a yeke mo bâ mo tene lo yeke ga hio ape.—aPhil. 2:15.

9. (a) Wango wa la Jésus amû so andu tënë ti lango? (b) A-Chrétien so a soro ala ti gue na yayu asara ye tongana nyen na ngoi so ala mä mbeni go so adekongo atene: “Bâ, koli ni asi awe!”? (Bâ nga kete tënë na gbe ni.)

⁹ Mbeni ye so amû maboko na amasia so asara ye na ndara ti ku koli ni kungo ayeke so lê ti ala akpengba. A lingbi ti si so aChrétien so a soro ala ti gue na yayu alango na bï na ngoi so ala yeke ku? En. Bâ so Jésus atene so “lango asara” amasia bale-oko so kue na “ala lango” na ngoi so mo bâ mo tene koli so ayeke mû wali fini fini ayeke ga hio ape. Jésus ahinga nzoni mingi so awokongo so zo ayeke na ni alingbi ti sara si même tongana zo ni ayeke ku singo ti lo kungo lo lingbi ti woko. A-Chrétien so a soro ala ti gue na yayu amä wango so nga ala sara ngangu mingi ahon ti kozo ti tene lê ti ala angbâ ti kpengba si ala lango pëpe. Na yâ ti toli ni, na ngoi so mbeni go adekongo atene: “Bâ, koli ni asi awe!” amasia ni kue alondo. Me gi amasia so lê ti ala akpengba la agbu ngangu juska na nda ni (Mat. 25:5, 6; 26:41). Legeoko nga, na alango ti nda ni, aChrétien be-ta-zo so a soro ala ti gue na yayu alondo ti sara ye na ngoi so ala mä mbeni go so adekongo atene: “Bâ, koli ni asi awe!” Ala yeda na aye so afa polele so Jésus aga nduru ti ga awe nga ala yeke ku singo ti lo kungo. * Me, na hunzingo ti toli ni Jésus asara tënë mingi na ndo ti mbeni mbilimbili ngoi. Nyen la afa ni?

10. Lisoro so amasia so asara ye na ndara na amasia ti buba asara, a sara si hundango ndo wa abâ gigi?

¹⁰ Peut-être mbage ti toli ni so ayeke ngangu mingi ti tene zo amä yâ ni ayeke lisoro so amasia ti buba na amasia so asara ye na ndara asara so ayeke nduru na hunzingo ti toli ni. (Diko Matthieu 25:8, 9.) Lisoro so amasia so asara, a sara si hundango ndo so abâ gigi: “Lawa la na yâ ti mbaï ti awakua ti Nzapa aChrétien so a soro ala ti gue na yayu ake ti  mû maboko na ambeni zo so ayeke na bezoin ni?” E lingbi ti mä yâ ti mbage ti toli so ayeke ngangu ti mä yâ ni so tongana e kiri e bâ ngoi so toli ni aye ti sara tënë ni. Ye so achangé ngbene gbungo nda ti ye ti e na amû lege na e ti hinga polele so a yeke na ngoi so kota ye ti vundu ayeke ga nduru ti hunzi la Jésus, koli so ayeke mû wali fini fini ayeke ga ti fa ngbanga. Tongaso, mbage ti toli so agboto lê peut-être na ndo ti ye so ayeke si ngoi kete kozo na hunzingo ti kota ye ti vundu. E tene tongaso ndali ti nyen? Ndali ti so ti si na ngoi ni so a yeke kpo nzoroko biani biani awe na ndo ti lê ti aChrétien so a soro ala ti gue na yayu.

11. (a) Nyen la ayeke si ande ngoi kete kozoni si kota ye ti vundu ato nda ni? (b) Amasia so asara ye na ndara aye ti tene nyen tongana ala tene na amasia ti buba ti gue na azo ti kango mafuta?

¹¹ Kozo ti tene kota ye ti vundu ato nda ni, a yeke kpo nzoroko biani biani na ndo ti lê ti aChrétien kue so a soro ala ti gue na yayu so ayeke be-ta-zo (Apoc. 7:1-4). A to nda ni na ngoi ni so, ala yeke hinga biani so ala yeke gue na yayu. Me, gbu li ti mo na ndo ti angu so aga kozoni si kota ye ti vundu ato nda ni. Nyen la ayeke si na aChrétien so a soro ala ti gue na yayu so alango na so ayeke be-ta-zo mbeni pëpe? Ala yeke wara futa ti ala na yayu pëpe. A yeke kpo nzoroko biani biani na ndo ti lê ti ala pëpe. Ti si na ngoi so kota ye ti vundu ato nda ni, a yeke soro ambeni Chrétien so ayeke be-ta-zo ti gue na yayu na place ti ala. Na ngoi so kota ye ti vundu ayeke to nda ni, peut-être li ti aChrétien ti buba so ayeke ga kirikiri ti bâ futingo Babylone, Ngangu gbata. Peut-être a yeke gi ge la ala yeke hinga so ade ala leke tere ti ala pëpe ndali ti gango ti koli so ayeke mû wali fini fini. So l’heure ahon awe so, nyen la ayeke si tongana ala hunda ti tene a mû maboko na ala? Kiringo tënë ni ayeke na yâ ti toli ti Jésus ni. Amasia so asara ye na ndara ake ti mû mafuta ti ala na amasia ti buba so nga ala tene na ala ti gue na azo ti kango mafuta. Ye oko, girisa pëpe so a yeke lani “na bê ti bï”. Ala yeke wara azo ti kango mafuta na l’heure ni so? Ên-ën. L’heure ahon mingi awe.

12. (a) Na ngoi ti kota ye ti vundu, nyen la ayeke si ande na aChrétien so a soro ala ti gue na yayu so angbâ be-ta-zo pëpe kozo ti tene a kpo nzoroko biani biani na ndo ti lê ti ala? (b) Nyen la ayeke si ande na nda ni na aChrétien so ayeke tongana amasia ti buba?

¹² Legeoko nga, na ngoi ti kota ye ti vundu, aChrétien be-ta-zo so a soro ala ti gue na yayu alingbi pëpe ti mû maboko na amba ti ala so ayeke be-ta-zo pëpe. Mbeni ye ti sara ti mû maboko na ala ayeke duti ande dä pëpe. L’heure ahon mingi awe. Tongaso, nyen la ayeke si ande na ala? Jésus afa ye so asi na ngoi so amasia ti buba ague ti vo mafuta. Lo tene: “Koli ni asi, na amasia so aleke tere ti ala awe alï legeoko na lo na matanga ti mariage ni. Na a kanga yanga-da ni na peko ti ala.” Na ngoi so Christ ayeke ga ande na yâ ti gloire ti lo nduru na hunzingo ti kota ye ti vundu, lo yeke bungbi aChrétien so a soro ala, so angbâ be-ta-zo na lo na yayu (Mat. 24:31; 25:10; Jean 14:1-3; 1 aThes. 4:17). A yeke kanga yanga-da na aChrétien so a soro ala ti gue na yayu so angbâ be-ta-zo pëpe, so ayeke tongana amasia ti buba. Peut-être ala yeke dekongo, ala tene: “Kota zo, kota zo, zi yanga-da ni na e!” Me Jésus ayeke kiri tënë na ala tongana ti so lo yeke kiri tënë na azo mingi so ayeke tongana angasa na ngoi ti fango ngbanga. Lo yeke kiri tënë na ala, lo tene: “Ti tâ tënë ni mbi tene na ala, mbi hinga ala pëpe.” So ye ti mawa!—Mat. 7:21-23; 25:11, 12.

13. (a) Ngbanga ti nyen la e lingbi ti tene pëpe so mingi ti aChrétien so a soro ala ti gue na yayu ayeke duti ande be-ta-zo pëpe? (b) Ngbanga ti nyen e lingbi ti tene so toli ti Jésus afa so lo yeke na confiance na aChrétien so a soro ala ti gue na yayu? (Bâ foto so ayeke na tongo nda ti article ni.)

¹³ Nyen la e lingbi ti tene na nda ni na ndo ti aye so e londo ti bâ so? Jésus ayeke tene lani so mingi ti aChrétien so a soro ala ti gue na yayu ayeke duti ande be-ta-zo pëpe nga a yeke changé ala? Ên-ën. Girisa pëpe so na Matthieu  chapitre 24, lo wa “ngbâa be-ta-zo so ayeke sara ye na ndara” ti ga sioni ngbâa lâ oko pëpe. So aye ti tene pëpe so lo ye ti tene mara ti ye tongaso asi. Legeoko nga, a yeke mbeni kpengba wango la lo mû ni na yâ ti toli so. Legeoko tongana ti so amasia oku ayeke amasia ti buba na ambeni oku asara ye na ndara, a lingbi Chrétien oko oko so a soro lo ti gue na yayu asoro ti leke tere ti lo nga ti lango pëpe. Tongaso pëpe, lo lingbi ti ga zo ti buba nga lo lingbi ti duti be-ta-zo pëpe. Na lege ti yingo vulu, bazengele Paul amû mara ti wango so na amba ti lo aChrétien so a soro ala ti gue na yayu. (Diko aHébreu 6:4-9; bâ Deutéronome 30:19.) Bâ so wango ti Paul so ayeke mbeni ngangu wango, me lo yeke nga na confiance so amba ti lo aChrétien ayeke wara futa ti ala. Legeoko nga, wango so ayeke na yâ ti toli ti amasia bale-oko afa so Jésus ayeke lani na mara ti confiance so na aChrétien so a soro ala ti gue na yayu. Christ ahinga so aChrétien oko oko kue so a soro ala ti gue na yayu alingbi ti ngbâ be-ta-zo nga ti wara nzoni futa.

14. Ngbanga ti nyen “ambeni ngasangbaga” alingbi nga ti wara aye ti nzoni na lege ti toli ti amasia bale-oko?

¹⁴ So Jésus atene toli ti amasia bale-oko na aChrétien so a soro ala ti gue na yayu, a lingbi e tene na nda ni so “ambeni ngasangbaga” ti Christ alingbi ti wara aye ti nzoni dä pëpe? (Jean 10:16). A yeke tongaso ape. Tënë ti toli ni ayeke polele: “Ala lango pëpe.” Tënë so abâ gi aChrétien so a soro ala ti gue na yayu? Jésus atene mbeni lâ, a tene: “Tënë so mbi tene na ala so, mbi tene ni na azo kue: Ala lango pëpe.” (Marc 13:37). Jésus ahunda na adisciple ti lo kue ti leke tere ti ala nga ti lango pëpe. Tongaso, aChrétien kue alingbi ti mû peko ti nzoni tapande ti aChrétien so a soro ala ti gue na yayu so azia fango tënë na kozo ndo na yâ ti fini ti ala. Girisa pëpe so amasia ti buba ahunda na amasia so asara ye na ndara ti mû na ala mbeni mafuta ti ala. Hundango ye ti amasia ti buba so amû lege na e ti hinga so a yeke na e ti ngbâ be-ta-zo, ti ngbâ na yâ ti tâ tënë nga ti lango pëpe. Zo oko alingbi ti sara aye so na place ti e ape. E oko oko kue e yeke kiri tënë na Juge ti mbilimbili so Jéhovah asoro lo. A lingbi e leke tere ti e. Jésus aga nduru ti ga awe!

15. Ngbanga ti nyen atâ Chrétien kue ayeke na ngia ndali ti mariage so Christ ayeke sara ande na wali ti lo?

¹⁵ A-Chrétien kue ayeke na ngia ndali ti mariage so a sara tënë ni na yâ ti toli ti Jésus. Ande, na peko ti bira ti Harmaguédon, aChrétien so a soro ala ti gue na yayu ayeke ga wali ti Christ (Apoc. 19:7-9). Azo kue so ayeke na sese ayeke wara ande aye ti nzoni na lege ti mariage so a yeke sara ni na yayu ndali ti so mariage ni ayeke mû lege na azo kue ti duti na gbe ti mbeni gouvernement so ayeke sara kua nzoni mingi. Atâa beku ti e ayeke ti wara fini na yayu wala na sese, a yeke nzoni e leke na bê ti e ti ngbâ ti sara ye alingbi na kpengba wango so ayeke na yâ ti toli ti amasia bale-oko. Zia e leke tere ti e nga e lango pëpe tongaso si e lingbi ti wara ande aye ti nzoni so Jéhovah aleke teti e.