Nzapa ahunda ti tene zo afa siokpari ti lo na gigi?

Na yâ ti mingi ti abungbi ti vorongo Nzapa, azo ayeke gue ka ti fa asiokpari ti ala na mbeni prêtre wala na mbeni kota zo na yâ ti bungbi ni. Ye oko, so laso e yeke na yâ ti mbeni dunia so azo ayeke kanga lê na ndo ti aye mingi, a yeke na lege ni wala a yeke nzoni ti tene zo afa siokpari ti lo na gigi?

BANGO ndo ti azo na ndo ti tënë so ayeke nde nde. Na tapande, mbeni mbeti-sango ti kodoro ti Canada (National Post) afa peko ti tënë ti mbeni zo so atene so atâa so a yeke ngangu ti tene na mbeni zo tënë ti ye ti sioni so mo sara, “tongana mo fa ni na mbeni zo, lo sambela na mo na lo fa na mo ye so a yeke nzoni mo sara, ye so ayeke sara nzoni na mo mingi.” Me mbeni buku (Bless Me, Father, for I Have Sinned) afa peko ti yanga ti mbeni koli so atene: “Tënë ti fango siokpari ti mo zo na gigi ayeke mbeni ye so ayeke sara ka na yâ ti Eglize me ayeke sara nzoni na zo pëpe. A yeke sara si zo ayeke lakue na gingo bê.” Bible atene ti lo nyen na ndo ni?

Tënë so Bible atene na ndo ni

Na yâ ti Ndia so Nzapa amû na azo ti Israël, e wara ambilimbili ye so a lingbi mbeni zo asara tongana lo sara siokpari. Na tapande, tongana mbeni zo asara siokpari na tere ti mbeni mba ti lo wala lo sara ye ague nde na ndia ti Nzapa, a lingbi lo sara tënë ni na mbeni prêtre so a soro lo na yâ ti kete mara ti Lévi. Prêtre ni ayeke mû mbeni sandaga na Nzapa ti kanga ndo ti siokpari ti zo ni si Nzapa apardone lo.​—Lévitique 5:1-6.

Angu ngbangbo mingi na pekoni, tongana prophète Nathan asuku na Gbia David ndali ti siokpari so lo sara, David asara ye tongana nyen? Na lê ni lê ni David ayeda na ni lo tene: “Mbi sara sioye so ake L’Éternel.” (2 Samuel 12:13). Nga lo sambela lo toto na Jéhovah ti sara nzoni bê na lo. Ye ti pekoni ayeke so wa? David atene: “Mbi fa siokpari ti mbi na Mo, na mbi honde sioni ti mbi pëpe. Mbi tene, Fade mbi fa tënë ti kengo-ndia ti mbi na L’Éternel; na Mo pardone ngbanga ti siokpari ti mbi.”​—Psaume 32:5; 51:3-6.

Na yâ ti congrégation ti akozo Chrétien, fango siokpari na gigi ayeke nga mbeni ye so Nzapa ahunda ti tene a sara ni. Jacques so mama ti lo na Jésus ayeke oko na so ayeke nga lani na popo ti akoli so ayeke mû li ni na yâ ti congrégation ti Jérusalem awa amba ti lo aChrétien lo tene: “Ala fa siokpari ti ala na gigi na amba ti ala nga ala sambela ndali ti amba ti ala, si ala wara sava.” (Jacques 5:16). Me asiokpari wa a hunda na aChrétien ti fa ni na gigi? A lingbi ala fa ni na zo wa?

Asiokpari wa a lingbi zo afa tënë ni na gigi?

Lâ oko oko, e so e yeke awasiokpari, e yeke nduru ti sara ye sân ti gbu li nga e yeke girisa yanga ti e. Ye so asara si e yeke sara siokpari na tere ti amba ti e (aRomain 3:23). Ye so aye ti tene so afaute kue so e sara, a lingbi e fa tënë ni na mbeni zo so ayeke na komandema?

Atâa so asiokpari kue ayeke sioni na lê ti Nzapa, na nzoni bê lo hinga so e yeke girisa lege ndali ti so a dü e na yâ ti siokpari. Tâ tënë, mbeni zo so asû psaume ayeda na tënë so, lo tene:  “O L’Éternel, tongana Mo bata tënë ti sioye, O Seigneur, ka zo nyen alingbi ti ngbâ? Me pardon ayeke na Mo, si zo alingbi kpe mbeto ti Mo.” (Psaume 130:3, 4). Tongaso, a lingbi e sara nyen tongana e sara siokpari na tere ti amba ti e, peut-être na mbana pëpe? Hinga so na yâ ti sambela so Jésus afa na adisciple ti lo, lo fa nga na ala tënë so: “Pardone asiokpari ti e teti so e nga e pardone zo kue so kuda ti e ayeke na li ti lo.” (Luc 11:4). Tâ tënë, Nzapa ayeke pardone e tongana e fa siokpari ti e na lo na e hunda lo ti pardone e na iri ti Jésus.​—Jean 14:13, 14.

Bâ so Jésus ahunda nga ti tene e pardone azo so “kuda ti e ayeke na li” ti ala. Bazengele Paul adabe ti amba ti lo aChrétien lo tene: “Ala sara nzoni na mba, ala bâ mawa ti zo mingi, ala pardone mba na popo ti ala na bê ti ala kue legeoko tongana ti so Nzapa nga apardone ala na bê ti lo kue na lege ti Christ.” (aÉphésien 4:32). Tongana e pardone afaute ti amba ti e, a yeke nzoni e hinga so Nzapa alingbi ti pardone nga afaute ti e.

Me ti akota siokpari tongana nzi, mvene so zo aleke na bê ti lo awe si lo tene ni, lango-sioni, nyongo sämba ahon ndo ni nga na ambeni siokpari tongaso, a yeke tongana nyen? Zo kue so asara mara ti asiokpari tongaso asara ye ague nde na ndia ti Nzapa so ti tene lo sara siokpari na tere ti Nzapa. A lingbi lo sara nyen?

A lingbi a fa tënë ti asiokpari na zo wa?

Nzapa amû lege pëpe na azo ti pardone asiokpari so azo asara na tere ti lo; gi lo oko la lo lingbi ti pardone ni. Bible atene na e polele atene: “Tongana e fa asiokpari ti e na gigi, lo yeke be-ta-zo nga mbilimbili ti pardone siokpari ti e na ti sukula e na aye kue so ayeke mbilimbili pëpe.” (1 Jean 1:9). Me a lingbi a fa tënë ti mara ti asiokpari tongaso na zo wa?

Teti so gi Nzapa oko lâ ayeke pardone asiokpari, a lingbi a fa tënë ni na lo. A yeke ye so David asara lani tongana ti so e bâ fade. Nyen la ayeke mû lege ti tene a pardone siokpari so mbeni zo asara? Bible atene: “Ala changé bê ti ala, na ala changé lege ti ala si a mbô asiokpari ti ala, ti tene angoi ti kiringo ti wara ngangu alingbi ti londo na gbele Jéhovah ti ga.” (Kusala 3:19). Biani, a yeke pardone siokpari ti zo gi pëpe ngbanga ti so lo yeda na ni na lo fa tënë ni na gigi, me nga ndali ti so lo yeke nduru ti zia lege ti siokpari ni. Mingi ni, ti zia lege ti siokpari ni ayeke ngangu kete. Me mbeni ye ayeke dä so alingbi ti mû maboko na zo ni.

Dabe ti mo na tënë ti disciple Jacques so e bâ fade, lo tene: “Ala fa siokpari ti ala na gigi na amba ti ala nga ala sambela ndali ti amba ti ala, si ala wara sava.” Na pekoni Jacques atene: “Sambela ti zo ti mbilimbili ti voro tere na Nzapa ayeke sara aye mingi.” (Jacques 5:16). “Zo ti mbilimbili” ni alingbi ti duti mbeni oko ti “a-ancien ti congrégation”, so Jacques asara tënë ti ala na versê 14. Na yâ ti congrégation ti aChrétien, a yeke wara “a-ancien” so ayeke mû maboko na azo so aye ti tene Nzapa apardone siokpari ti ala. Me “a-ancien” so alingbi ti pardone asiokpari ti azo pëpe ndali ti so Nzapa amû lege na mbeni zo oko pëpe ti pardone asiokpari so azo asara na tere ti lo. * Ye oko, so ala kpengba awe na lege ti yingo, ala lingbi ti zingo na mbeni zo so asara kota siokpari nga ti kiri na lo na nzoni lege. Ye so ayeke mû maboko na zo ni ti hinga so ye so lo sara so ayeke sioni mingi nga so a lingbi lo changé bê ti lo.​—aGalate 6:1.

 Ndani so a lingbi zo afa tënë ti siokpari ti lo na gigi

Atâa siokpari so mbeni zo asara ayeke kete wala kota, lo buba songo ti lo na mba ti lo zo nga na Nzapa. Ye ti pekoni ayeke so, bê ti lo ayeke gi lo wala lo yeke duti na vundu. Yingo-ti-hinga so Nzapa aleke e oko oko kue na ni la asara si zo ni ayeke na vundu (aRomain 2:14, 15). A lingbi zo ni asara nyen?

Tongana e kiri e bâ na mbeti ti Jacques, e yeke wara pendere tënë so: “Mbeni zo na popo ti ala ayeke na kobela [na lege ti yingo]? Zia lo iri a-ancien ti congrégation ti ga na tere ti lo, na zia a-ancien ni asambela ndali ti lo, ala sara mafuta na tere ti lo na iri ti Jéhovah. Na sambela so a sara na mabe ayeke sara si zo ti kobela ni awara sava, na Jéhovah ayeke mû lo na nduzu. Nga, tongana lo sara asiokpari, fade a yeke pardone lo ndali ni.”​—Jacques 5:14, 15.

Ge nga kue a hunda na a-ancien ti bâ lege ti kundu ni. Tongana nyen? A yeke gi na lege ti senge mango zo ni na fango tënë ti siokpari ti lo ni na gigi pëpe. Me teti so zo ni ayeke na kobela na lege ti yingo, a lingbi a sara mbeni ye ti tene “zo ti kobela ni awara sava”. Jacques afa so a lingbi a sara ambeni ye use.

Kozoni ye ni ayeke ‘sarango mafuta na tere’ ti zo ni. So aye ti sara tënë ti ngangu so Mbeti ti Nzapa ayeke na ni ti sava zo. Bazengele Paul atene so “tënë ti Nzapa ayeke na fini na ayeke na ngangu ti sara ye . . . na a lingbi ti hinga nda ti abibe ti bê ti zo nga na aye so bê ti zo ni aye ti sara”, so ti tene ti ndu aye so ayeke na gbe ti bê ti zo ni (aHébreu 4:12). Na sarango kusala nzoni na Bible, a-ancien alingbi ti mû maboko na mbeni zo so ayeke na kobela na lege ti yingo ti hinga ye so ayeke na gunda ti kpale ni nga ti sara aye so a lingbi lo sara ti kiri ti leke songo ti lo na Nzapa.

Use ye ni ayeke “sambela so a sara na mabe”. Même tongana asambela ti ala ni ayeke changé pëpe fango ngbanga ti mbilimbili ti Nzapa, Nzapa so ayeke nduru ti pardone siokpari ti azo na lege ti sandaga ti Christ abâ asambela so na nene ni (1 Jean 2:2). Nzapa ayeke nduru ti mû maboko na mbeni zo so asara siokpari me so achangé bê ti lo nga asara “akusala so alingbi biani na changengo bê.”​—Kusala 26:20.

Tongana mbeni zo asara siokpari na tere ti mba ti lo zo wala na tere ti Nzapa, lo yeke fa tënë ti siokpari ti lo ni na gigi kozoni kue ndali ti so lo ye ti duti na nzoni songo na Nzapa. Jésus Christ atene so a lingbi e leke tënë so ayeke na popo ti e na amba ti e nga e duti na siriri na ala kozoni si e lingbi ti voro Nzapa na mbeni nzoni yingo-ti-hinga (Matthieu 5:23, 24). A-Proverbe 28:13 atene: “Zo so ahonde kengo-ndia ti lo, ye ti lo aga nzoni pëpe, me zo so afa tënë ti kengo-ndia ti lo na gigi na lo zia lege ni, fade lo wara be-nzoni.” Tongana e sara tere ti e kete na lê ti Jéhovah Nzapa na e hunda lo ti pardone e, lo yeke bâ e na nzoni lê na lo yeke yä iri ti e na ngoi so alingbi.​—1 Pierre 5:6.

[Kete tënë na gbe ni]

[Kete tënë na lembeti 30]

Nzapa ayeke hon na ndo ti awokongo ti e na lo yeke pardone e tongana e ga na mbage ti lo na e hunda lo ti pardone e na iri ti Jésus

[Foto na lembeti 31]

Zo ayeke fa tënë ti siokpari ti lo na gigi kozoni kue ndali ti so lo ye ti duti na nzoni songo na Nzapa