Bâ so a hunda ti opéré mo ndali ti mbeni kobela so alingbi ti sara sioni na mo. So gigi ti mo ayeke na yâ ti maboko ti docteur ni, mo doit ti zia bê ti mo na ndo ti lo. Atâa so kue, mo yeke sara kue ti hinga wala lo sara mara ti kua ni so kozo awe si.

Ti gue oko na tapande so, lege ti ndara ayeke ti tene mo bâ bungbi ti Nzapa ti mo nzoni si. Tongana mo yeke na bungbi ti Nzapa ti mo awe, hinga so gigi ti mo na devant ti Nzapa adépend na bungbi ni so. Na lege ti bungbi ni so, mo lingbi ti wara fini wala mo lingbi ti wara ni ape.

Jésus afa mbeni ye so amû lege na e ti hinga wala mbeni bungbi ti Nzapa ayeke nzoni ni. Lo tene: “A yeke hinga keke oko oko na lege ti lengo ti lo.” (Luc 6:44). Na tapande, tongana mo mû mbeni bungbi ti Nzapa tongaso, sarango ye ti azo ni ayeke tongana nyen? Tënë ti nginza la ason akota zo ti bungbi ni mingi? Amembre ni ayeke kpe andia ti Bible na ndo ti tënë ti bira nga na nzoni sarango ye? Mbeni bungbi ti Nzapa ayeke dä so zo alingbi ti zia bê ti lo na ndo ni? Diko atënë so aga na peko so, na mo yeke bâ.