Mo mä na bê so Nzapa ayeke dä? Tongana a yeke tongaso, nyen la afa na mo so lo yeke dä? Aye ayeke dä so afa so Zo so asara aye kue ayeke dä, nga lo yeke na ndara, lo yeke na ndoye na lo yeke na ngangu. A yeke aye wa? Ti hinga ni, bâ tënë so bazengele Paul atene na yâ ti mbeti ti lo na aChrétien so ayeke na Rome.

Paul atene: “Asarango ye ti tere ti Nzapa so lê abâ ni pëpe asigigi polele ngbene ye so a leke dunia ti ga na ni, ngbanga ti so a bâ ni na lege ti aye so lo sara, so ti tene ngangu ti lo so ayeke lakue lakue na dutingo ti lo tongana Nzapa, si a lingbi ti wara mbeni raison oko pëpe ti zi tënë na li ti ala.” (aRomain 1:20). Tongana ti so Paul atene, aye so Nzapa asara afa so lo yeke dä. Zia e hasa yâ ti tënë ti Paul so nzoni.

Paul atene so “ngbene ye so a leke dunia ti ga na ni,” zo alingbi ti hinga asarango ye ti tere ti Nzapa. Tënë so a kiri pekoni ge na “dunia” aye ti sara tënë ti sese ape, me ti azo. * Tongaso Paul aye ti tene so ngbene ye so a créé azo, ala lingbi ti hinga asarango ye ti tere ti Nzapa na lege ti aye so lo sara ni awe.

Asarango ye ti tere ti Nzapa “asigigi polele” na yâ ti aye kue so angoro e. Akete kete ye nga na akota ye afa polele so Nzapa ayeke dä, nga afa ambeni ye na ndo ti lo Nzapa ni. Na tapande, ambeni pendere ye so e bâ afa so Nzapa ayeke na ndara. Gbâ ti atongoro so ayeke na lê ti nduzu na ngangu pupu so ayeke ya afa so lo yeke ngangu mingi. Apendere kobe nde nde so anzere na e, pendere sigingo ti lâ nga na lindango ti lâ afa so Nzapa aye e azo mingi.​—Psaume 104:24; Ésaïe 40:26.

Aye so afa so Nzapa ayeke dä ayeke tâ polele? En, a yeke tâ polele; ni la si azo so ake ti mä na bê so Nzapa ayeke dä, raison oko ayeke dä ape ti “zi tënë na li ti ala”. Mbeni wandara amû mbeni tapande ti fa ni: Lo tene so tongana mbeni chauffeur abâ mbeni ye na yanga ti lege so ahunda na lo ti hon na mbage ti wali, me lo ke si mbeni policier agbu lo, a yeke hunda na lo ti futa amende. Chauffeur ni alingbi ti tene so ni bâ mbeti ni ape. Me policier ni apeut ti zia lo ape ndali ti so mbeti ni ayeke fade polele nga lo chauffeur ni ayeke na kpale ti lê ape. Nga, so lo yeke chauffeur, a yeke ti lo ti bâ mara ti ambeti ni so nga ti kpe ni. Legeoko nga, aye so afa atene Nzapa ayeke dä ayeke dandara na lê ti e azo. Tongaso e lingbi pëpe ti tene so e bâ ni ape.

iani, aye so Nzapa asara afa na e aye mingi na ndo ti lo. Me mbeni ye so akiri afa na e aye mingi na ndo ti Nzapa ayeke Bible. Na yâ ti Bible, e yeke wara kiringo tënë na hunda so: Nyen la Nzapa aye ti sara ndali ti sese nga na e azo? Tongana mo hinga kiringo tënë ni, a yeke mû maboko na mo ti ga nduru na Nzapa so ‘asarango ye ti tere ti lo so lê abâ ni pëpe asigigi polele’ na yâ ti aye so angoro e.