Mo yeke sambela ka lakue lakue? Azo mingi ayeke sambela ka, même ambeni zo so atene Nzapa ayeke dä ape. Me, azo ni ayeke sambela ngbanga ti nyen? Mbeni gingo nda ti ye na France afa so ndambo ti azo ti France ni ayeke sambela ngoi na ngoi wala ala yeke gbu li “gi ti wara nzerengo tere.” Tongana ti gbâ ti azo ti Poto, ala yeke sambela, me na bibe ti vorongo Nzapa ape. Ala yeke gi ti wara gi “dengo bê so zo ayeke wara na peko ti sambela.” Na mbeni mbage, ambeni wamabe ayeke sambela Nzapa gi na ngoi so ala yeke na yâ ti bezoin, ala ye ti wara aye ti ala ni gi na lê ni lê ni.—Ésaïe 26:16.

Ka ti mo, sambela ayeke mû gi maboko na mo ti hinga tâ mbilimbili ye so mo lingbi ti sara? Tongana mo yeke wamabe, sambela amû maboko na mo awe? Wala mo bâ so Nzapa amä sambela ti mo ape? Bible alingbi ti mû maboko na mo ti bâ sambela tongana mbeni kota ye so ayeke sara si mo ga nduru na Nzapa, me pëpe tongana mbeni ye so ayeke mû gi na mo nzerengo tere.