KOTA MAMA-TENE NI | NZAPA AYEKE BI BÊ TI LO NGA NA MO LA?
Nzapa aye si mo ga nduru na lo
“Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi.”
YE SO ASARA SI AMBENI ZO AYEKE NA KITE: Mingi ti azo so amä na bê na Nzapa apensé so lo yo na ala mingi. Christina, mbeni wali ti kodoro ti Irlande so ayeke gue ka lani yenga oko oko na eglize, atene: “Na mbi lani mbi bâ lo gi tongana Nzapa so asara aye kue, me mbi hinga lo ape nga lâ oko mbi bâ so mbi yeke nduru na lo ape.”
YE SO BIBLE ATENE: Tongana e bâ so e yo na Jéhovah, lo yeke gi lakue ti mû maboko na e. Jésus amû mbeni tapande ti fa tongana nyen la Nzapa ayeke bi bê ti lo na e, lo tene: “Tongana mbeni koli ayeke na angasangbaga ngbangbo oko, na oko ti ala agirisa, fade lo yeke zia atanga ni bale-gumbaya na gumbaya so na ndo ti ahoto ti gue ti gi oko so agirisa so pëpe?” Nyen la e lingbi ti manda dä? Jésus akiri atene: “Legeoko nga, a yeke nzoni pëpe na lê ti Babâ ti mbi so ayeke na yayu tongana mbeni oko ti akete zo so agirisa.”
Zo kue so ayeke “oko ti akete zo so agirisa” so, Nzapa ayeke bâ lo na nene ni mingi. Me tongana nyen la Nzapa ayeke “gi [lo] so agirisa so?” Tongana ti so a fa na Jean 6:44, Jéhovah ayeke gboto azo na mbage ti lo.
Laso, azo wa la ayeke gue na yanga-da ti azo nga na ando so gbâ ti azo ayeke dä ti fa tënë ti Nzapa na ala zo wa?
Zia e bâ tongana nyen la lani Nzapa amû li ni ti gboto na mbage ti lo azo oko oko so aye biani ti ga nduru na lo. Ândö na ngoi ti akozo Chrétien, Nzapa atokua lani Philippe ti gue na mbage ti mbeni kota zo ti Éthiopie ti fa na lo ye na ndo ti mbeni tënë ti prophétie ti Bible so lo ngbâ lani ti diko ni (Kusala 8:26-39). Na pekoni, Nzapa atene na bazengele Pierre ti gue na da ti mbeni turugu ti kota kamba ti Rome so a iri lo Corneille, so lo yeke sambela lani Nzapa nga lo yeke sara kue ti voro lo na lege ni (Kusala 10:1-48). Nzapa apusu lani nga bazengele Paul na amba ti lo so ayeke na tere ti lo ti gue na yanga ti ngu na gigi ti gbata ti Philippes. Kâ, ala tingbi na “mbeni wavorongo Nzapa” so iri ti lo ayeke Lydie, na “Jéhovah azi bê ti lo kota ti dengi mê”.
Na yâ ti aye so kue, Jéhovah asara kue si azo so ayeke gi lo lani awara lege ti hinga lo. Me laso, azo wa la ayeke gue na yanga-da ti azo nga na ando so gbâ ti azo ayeke dä ti fa tënë ti Nzapa na ala zo wa? Azo mingi ayeke tene: “A yeke aTémoin ti Jéhovah.” Hunda tere ti mo, mo tene, ‘Âmanke Nzapa la atokua ala ti ga ti fa tënë na mbi so ape?’ E wa mo ti sambela Nzapa ti tene lo mû maboko na mo ti yeda na ngangu so lo yeke sara ti gboto na mo na mbage ti lo. *
Bâ nga
ASANGO NA NDÖ TI E
Ndani nyen ti manda Bible?—Yongoro ni
Bible ayeke mû maboko laso na azo kutu na kutu na yâ ti dunia kue ti wara akiringo tënë na angangu tënë so ala yeke hunda na yâ ti gigi ti ala. Mo nga kue mo ye ti duti na popo ti ala?
